Өнөөдөр плей-оффын 4 тоглолт боллоо. Эдгээрийн 3 нь маш сонирхолтой болсон бол нэг нь буюу Кливленд – Детройтын тоглолт өмнөх 3 тоглолт шигээ нэг багийн илт давамгайлал дор өндөрлөлөө.

“Чикаго” – “Бостон” – 121:118 2 НЦ (18:19, 27:27, 20:24, 31:26, 14:14, 11:8)

Ч: Д. Роуз – 23 + 11 самбар + 9 дамжуулалт. Б. Гордон – 22. Салмонс – 20.

Б: Пирс – 29. Р. Аллен – 28. Рондо – 25 + 11 самбар + 11 дамжуулалт.

Цувралын харьцаа – 2:2.

Энэ цуврал маш өрсөлдөөнтэй болж байна. 4 дэх тоглолтонд бүр 2 ч удаа цаг сунгалаа. Үндсэн цаг дуусахаас 9.8 секундын өмнө Рэй Аллен 3 онооны шидэлтээ амжилттай болгож, тоог тэнцүүлсэн бол эхний нэмэлт цаг дуусахаас 4.5 секундын өмнө Бен Гордон мөн 3 онооны шидэлтээ амжилттай болгож дахин сунгах болсон. 2 дахь нэмэлт цагт талбайн эзэд давуу тоглосоор хожил авлаа. Буллзыг Роүз, Гордон нар оноогоор тэргүүлсэн, мөн Салмонс сайн тоглосон. Тэрээр сүүлийн 26 секундэд 4 торгуулийн шидэлтээ амжилттай болгож, Пирсийн тоог тэнцүүлэх боломжтой сүүлийн шидэлтийг блокдсон юм.

Буллз ийнхүү Бостоныг 13 плей-оффын тоглолтноос ердөө 2 дахь удаагаа хожиж байна. Мөн өнөөдөр Буллзын талбайд гарсан бүх тоглогчид 10-аас дээш оноо авчээ.

Селтиксийн хувьд плей-оффт 3 тоглогч нь 25-аас дээш оноо авсан ч хожигдлоо. Өмнө нь1987 оны 5 сарын 13-нд Селтикс Бакст хожигдоход Бёрд 26, МакХэйл 27, Пэриш 30 оноо авч байжээ. Мөн Ражон Рондо энэ цувралд 2 дахиа трипл-дабл хийлээ. Нэг цувралд 2 трипл-даблыг Бостоны тоглогчдоос хамгийн сүүлд Ларри Бёрд 1986 онд хийж байж. Харин лиг даяар 2002 онд Жейсон Кидд бүсийн шигшээд Нетс – Селтиксийн цувралд 3 трипл-дабл хийж байснаас хойш өөр тоглогч нэг цувралд 1-аас олон трипл-дабл хийгээгүй юм байна.

“Филадельфи” – “Орландо” – 81:84 (22:24, 14:12, 19:28, 26:20)

Ф: А. Миллер – 17. Т. Янг – 15. Игуодала – 13 + 11 дамжуулалт.

О: Дуайт Ховард – 18 + 18 самбар. Р. Льюис – 17. Туркоглу – 17.

Цувралын харьцаа – 2:2.

Бостон-Буллзын цувралаас гадна энэ 2 багийн цуврал ч тун тэнцүүхэн өрнөж байна. 4 тоглолтноос мөн л 3 дахь тоглолтын ялагч сүүлийн мөчид тодорлоо. Өмнө нь Филли сүүлийн довтолгооноо амжилттай болгож хожоод байсан бол энэ удаа Орландогийн ээлж байж. Хедо Туркоглу тоо тэнцүү байхад 3 онооны шидэлтээ амжилттай болгосноор цувралын харьцаа 2:2 болов.  4 дэх тоглолтонд оноог тэргүүлэгч 11 удаа солигдож, 10 удаа тэнцсэн байна.

Мэжик энэ тоглолтонд ердөө 3-хан удаа довтолгооны самбараас бөмбөг авсан ба бүгд Дуайт Ховардынх. Харин Филли 2005 оноос хойш плей-оффт хожсоныхоо дараагийн тоглолтонд дандаа ялагдаж байна. Өөрөөр хэлбэл дараалж огт ялсангүй.

“Детройт” – “Кливленд” – 78:99 (27:26, 15:25, 18:22, 18:26)

Д: Макдайсс – 26 + 10 самбар. Байнэм – 22. Стаки – 14.

К: Жеймс – 36 + 13 самбар + 8 дамжуулалт. Уильямс – 24. Уэст – 12. Илгаускас – 8.

Цувралын харьцаа – 0:4.

Энэ цувралын хувь заяа эхнээсээ л тодорхой байлаа. Кавальерс 4 тоглолт дараалан ялснаар дараагийн шатанд шалгарсан анхны баг болж байна. Тэд 4 ялахдаа 4-үүлэнд нь өрсөлдөгчөө 10-аас дээш онооны зөрүүтэй ялсан лигийн түүхэн дэх 3 дахь баг болжээ. Өмнө нь 1980 онд Селтикс, 2004 онд Пейсерс багууд ингэж байв.

ЛеБрон Жеймс энэ цувралд 32.0 оноо, 11.3 самбараас авалт, 7.5 оновчтой дамжуулалт дундчилж плей-оффын 1 цувралд дунджаар 30-аас дээш оноо, 10-аас дээш самбар, 7-оос дээш оновчтой дамжуулалт хийсэн Ларри Бёрд, Оскар Робертсон нарын дараах 3 дахь тоглогч боллоо.

Мөн Жеймс плей-оффын эхний 50 тоглолтондоо 1300 оноо, 400 самбар, 350 оновчтой дамжуулалт хийсэн 2 дахь тоглогч болж байна. Эхнийх нь Оскар Робертсон.

“Хьюстон” – “Портленд” – 89:88 (30:22, 20:22, 14:26, 25:18)

Х: Яо Мин – 21 + 12 самбар. Скола – 17. Баттье – 14.

П: Рой – 31. Олдридж – 19 + 10 самбар. Аутло – 14.

Цувралын харьцаа – 3:1.

Рокитс 4 дэх тоглолтонд хожсоноор дараагийн шатанд шалгарах өндөр магадлалтай боллоо. Тэд эхний шатыг давж чадахгүй олон жилийг өнгөрөөж байгаа бөгөөд 1998 оноос хойш эхний шатанд 6 удаа хожигдоод байгаа юм. Мөн нийтдээ плей-оффын 7 цувралд дараалан хожигдсон амжилттай. Мөн Яо Мин Рокитсийн тоглогч болсноос хойш плей-оффын цувралд 0-3. Үүнээс 2-т нь Рокитс цувралыг 2:0-ээр тэргүүлж байгаад хожигдож байлаа. Гэхдээ энэ удаа Рокитс болон Яо тэрхүү хар цувралуудаа зогсооход ойрхон боллоо.