Нэр хүндээрээ Ролан Гарросын дараа ордог шороон талбайн тэмцээн болох Ром Мастерс эхэллээ. Эрэгтэйчүүдийн ганцаарчилсан төрөлд Роддикоос бусад бүх шилдэгүүд энд цугласан бөгөөд дөнгөж эхний шатнаас л элдэв дуулиан цуварч эхэллээ. Чансаагаараа есөд эрэмбэлэгдсэн Францын Жо Вильфред Цонга 1-р шатанд нутаг нэгт Ришар Гаскед дийлдэж тэмцээнээ өндөрлүүлсэн бол Испаний Давид Феррер, АНУ-н Жеимс Блэйк нарыг ч мөн ийм хувь тавилан дайрчээ. Хоёрдугаар шатанд Их Британий найдвар Энди Мюррэй Аргентиний Хуан Монакод 6-1 3-6 5-7-аар дийлдэж залгуулаад Давыденко Австрийн дундаж теннисчин Юрген Мелзерт хоёр сетэд бутниргүүлсэн байна. Энди ялагдсаныхаа дараа ”Ялалт авахад тун ойрхон байлаа, өөрийгөө тийм муу байсан гэж бодохгүй байна. Хааяа ялагдах нь жирийн л үзэгдэл шүү дээ. Одоо дараагийнхаа тэмцээнд сайн бэлдээд амжилттай оролцох нь миний гол зорилго” гэжээ. Рафаель Надаль эхний шатыг автоматаар өнжиж хоёрдугаар шатанд Италийн Андрес Сеппитэй оноолт  таарчээ. Хэрвээ Испани эр өрсөлдөгчөө буулган авбал Шведийн Сёдерлингтэй тулах нь тодорхой болсон.
Харин Федерерийн хувьд Хорватын ”хал цэрэг” Иво Карловичийг хоёр сетэд 6-4 6-4-өөр буулган авч гуравдугаар шатанд Степаник (Чех)-Ф.Лопез (Испани) хоёрын ялсаныг амлан авна. Өнгөрсөн жилийн тэмцээний аварга Сербийн Новак Жокович Испаний Алберт Монтанесийг ялаад (7-6 6-0) ээлжит шатанд мөн л Испаний тамирчинтай тулах боллоо. Гэхдээ энэ удаагийн өрсөлдөгч нь тийм ч зөөлөн боорцог биш. Шороон талбайд амжилттай үздэг Томми Робредо юм.
Эмэгтэйчүүдийн ганцаарчилсан төрөл одоогоор эхлээгүй байна. Гэхдээ он гарснаас хойш чимээгүйхэн байгаа Ана Иванович, Серена, Елена зэрэг шилдэгүүд бүгд Ромд ирсэн тул өрсөлдөөн хүчтэй өрнөх нь дамжиггүй. Өнгөрсөн жил Сербийн Елена Янкович Ром мастерст аваргалж байсан.

Сүүлийн таван жилийн аврагууд

Эрэгтэй ганцаарчилсан төрөл

он	аварга	2-р байр	финалын оноо
2009
2008	Новак Жокович	Станислас Вавранка	4–6, 6–3, 6–3
2007	Рафаел Надаль	Фернандо Гонзалез	6–2, 6–2
2006	Рафаел Надаль	Roger Federer	6–7(0), 7–6(5), 6–4, 2–6, 7–6(5)
2005	Рафаел Надаль	Гулермо Кориа	6–4, 3–6, 6–3, 4–6, 7–6(6)
2004	Карлос Мояа	Давид Налбандьян	6–3, 6–3, 6–1

Эмэгтэй ганцаарчилсан төрөл

он	аварга	2-р байр	финалын оноо
2009
2008	Елена Янкович	Ализе Корнет	6–2, 6–2
2007	Елена Янкович	С.Кузнецова	7–5, 6–1
2006	Мартина Хингис	Динара Сафина	6–2, 7–5
2005	Амела Моресма	Патти Шнайдер	2–6, 6–3, 6–4
2004	Амела Моресма	Женнифер Каприати	3–6, 6–3, 7–6(6)