МСБХ-ны “Сэнгүр лиг”-ийн аварга шалгаруулах тэмцээний медалийн төлөө тоглолтууд явагдаж байгаа бөгөөд хүрэл медаль хүртэх баг тодроод байна.

Өнгөрсөн долоо хоногийн Баасан гаригт “Бриж констракшн” компаний “Баянзүрх Буллз” баг “Таван толгой транс” компаний “Ёлууд” багуудын цувралын 4 дэх тоглолтонд Буллз хожсоноор, цувралд 3:1-ээр давамгайлан лигийн тэмцээний хүрэл медалийн болзол хангалаа. Уг тоглолтонд ОУХМ Ц. Шаравжамц 30 оноо, 6 блок шот хийсэн бол М. Цогтбаатар24 оноо авч багийнхаа хожилд чухал үүрэг гүйцэтгэжээ. “Ёлууд” багаас Т. Санчир, М. Цолмонхүү нар сайн тоглосон боловч бусад тоглогчид нь, ялангуяа Б. Мөнхболд багтаа сайн тусалж чадсангүй.  ”Баянзүрх Буллз” ийнхүү лигт 2 дахь улиралдаа тоглоод медальд хүрч байна. Гэхдээ тэдэнд аваргын төлөө тоглох ч боломж байлаа.  Харин “Ёлууд” 2007 онд мөнгөн медаль, 2008 онд хүрэл медаль хүртэж байсан бол энэ удаа 4-р байранд шалгарлаа. Амжилт нь жил, жилээр буурсан байна.

Аваргын төлөө тоглож байгаа 2 баг одоогоор 5 тоглоод байна. Үүний 3-т нь “Хас” банкны “Хасын Хүлэгүүд” баг, 2-т нь МУИС, “Эм-Би-Эм” компаний “МВМ” баг хожоод байгаа юм. 4 дэх тоглолтонд МУИС-ын баг хожход Г. Баттөр, Ц. Азбаяр нар тун сайн тоглосон.

Харин 5 дахь тоглолт өчигдөр болсон. Энэ тоглолтонд хожсон баг сэтгэл зүйн хувьд ихээхэн давуу талтай болох байлаа. Тоглолт эхнээсээ тэнцүүхэн өрсөлдөөнтэй болж байсан. Харин 3-р үед Хүлэгүүд 17 оноо авсан бол МУИС ердөө 11-хэн оноо авсан байна. 4-р үед Хүлэгүүд мөн олон оноо авснаар 81:70-аар хожлоо. МУИС 4-р үед тоог ойртуулж байсан ч тухай бүрд нь Хүлэгүүд зөрүүлээд оноо аваад байсан. Ялангуяа О. Сайнбаяр, Ц. Мэргэн нар эсрэг багийнхаа сул тал болох самбар дор сайн хамгаалах тоглогчид байхгүйг чадварлаг ашиглан, амархан оноо авч байлаа. Ялангуяа О. Сайнбаяр 22 довтолж, 15-ыг нь амжилттай болгосон гэхээр түүнийг МУИС-аас хамгаалахаар тоглогч байхгүй байсныг илтгэнэ. Тэрээр нийт 37 оноо авчээ. Харин МУИС-ын гол тоглогч Г. Ихбаяр энэ тоглолтонд 3-хан оноо авсан байна.

Аваргын төлөөх цувралд хэн түрүүлж 4 хожсон нь ялагч болох бөгөөд 6 дахь тоглолт ирэх Баасан гаригт СТО-д болно.

Хүрэл медалийн төлөө тоглолт. №4.

Ёлууд 92: 97 Баянзүрх Буллз (24:30  24:23  15:22   29:22)

Ёлууд: Т. Санчир 26 оноо, М. Цолмонхүү  21 оноо

Баянзүрх Буллз: Ц. Шаравжамц 30 оноо+6 блок, М. Цогтбаатар 24 оноо

Аваргын төлөө тоглолт. №4.

МУИС МВМ 80:77 Хасын Хүлэгүүд (21:20  18:24   21:18   20:15)

MВМ: Ц. Азбаяр 25 оноо + 4 бөмбөг таслалт, Г. Баттөр 21 оноо, Г. Ихбаяр 18 оноо

Хасын Хүлэгүүд: Ц. Мэргэн 18 оноо+17 самбар, М. Отгонмөнх 18 оноо+9 самбар, О. Сайнбаяр 16 оноо+8 самбар

Аваргын төлөө тоглолт. №5.

МУИС МВМ 70:81 Хасын Хүлэгүүд (16:17  23:20   11:17   20:27)

MВМ: Ц. Азбаяр 20 оноо + 7 самбар, Н. Золжаргал 17 оноо+9 самбар

Хасын Хүлэгүүд: О. Сайнбаяр 37 оноо+8 самбар,  Ц. Мэргэн 16 оноо+6 самбар,