Монголын сагсан бөмбөгийн холбоо 2001 онд багуудын хүчин чадлыг тэнцвэржүүлэх зорилготойгоор тоглогчдоо шинээр хуваарилсан билээ. Түүнээс хойш лигийн АШТ-ий өрсөлдөөн ширүүссэн. Одоо лигийн АШТ-д плей-оффт дөрөвдүгээр байраар арайхийн шалгарсан баг аваргалсан тохиолдол элбэг боллоо.

2005 он
Лигийн АШТ-д ШУТИС-ийн залуус анх удаагаа оролцон улирлын тоглолтод ердөө ганцхан хожигдолтой плей-оффт шалгарч байлаа. Гэтэл тэднийг плей-оффын нэгдүгээр шатанд лигийн хошой аварга “Лидер” хожсон юм. “Лидер” плей-оффт шалгарахын төлөө “Хасын хүлгүүд”-тэй шийдвэрлэх тоглолтыг хийн шалгарч байжээ. Арайхийн плей-оффт шалгарсан тэд ШУТИС-ийн залуусыг 3:2-оор аргалан аваргын төлөө өмнөх оны аварга “Хараагийн харцага”-тай тоглосон. Аваргын төлөөх цувралд тэд 3:1-ээр тэргүүлжээ. Энэ нь МВА-гийн лигийн түүхэнд плей-оффт дөрөвдүгээр байраар гарсан баг түрүүлсэн анхны тохиолдол болов.

2006 он
Лигийн АШТ-ий шигшээ тоглолтод хожигдсон хариугаа “Хараагийн харцага” 2006 онд авч чадлаа. Тэд плей-оффт шалгарахын төлөө өнгөрсөн оны нээлт ШУТИС-ийн “Шаркс”-ыг ардаа орхин плей-оффт үлджээ. Гэвч тэд өнгөрсөн жилийн аварга, тойргийн тоглолтод торолгүй тэргүүлсэн “Лидер”-ийг эхний даваандаа хожсон. Улмаар аваргын төлөөх цуврал хожиж гаршсан “Баганат өргөө”-г 4:2-оор хожин аваргалсан юм. Энэ амжилтаа тэд 2007 онд мөн давтсан юм. Тэд мөн улирлын тоглолтын аварга “Ёлууд”-ыг хожин түрүүлсэн билээ.

2008 он
Өнгөрсөн онд “Хасын хүлгүүд” плей-оффт үлдэхийн төлөө “Хараагийн харцага”-ыг хожсон. Улмаар плей-оффт дөрөвдүгээр байраар шалгаран гарч нэгдүгээр байр эзэлсэн “Ёлууд”-ыг эхний шатанд толгой өвдөлгүй 3:0 ялсан. Харин аваргын төлөө ШУТИС-ийн “Шаркс”-ыг 4:3-аар хожсон. Харин өнөө жилийн дөрөвдүгээр байраар “Хасын хүлгүүд” мөн шалгарсан. Тэд “Ёлууд”-ыг 3:1-ээр хожин шигшээ тоглолтод шалгараад байгаа. Плей-оффт дөрөвдүгээр байраар шалгарсан баг дөрвөн жил дараалан түрүүлсэн. Хэрвээ “Хасын хүлгүүд” өнөө жил түрүүлбэл дээрх тоо тав болох ажээ.