“Хьюстон” – “Лейкерс” – 94:108 (28:30, 20:20, 14:24, 32:34)

Х: Артест – 25. Минг – 19 + 14 самбар. Скола – 10 + 12 самбар. Ландри – 10.

Л: Брайант – 33. Одом – 16 + 13 самбар. Газоль – 13. Ариза – 13.

Цувралын харьцаа – 1:2.

Хьюстон талбай дээрээ болсон 2-р шатны анхны тоглолтонд хожигдлоо. Коби өнөөдөр Рокитсийн эсрэг 33 оноо авч багаа тэргүүлэв. Коби плей-оффт 3928 оноотой болж, Ларри Бёрдыг гүйцэн, лигийн түүхэнд 6-д бичигдэх болж байна. Мөн тэрээр плей-оффт 30-аас дээш оноог 54 дэх удаагаа авч байгаа нь энэ. Кобигоос гадна Одом 16 оноо, 13 самбараас авалт, Дерек Фишерийг оролсон Жордан Фармар 12 оноо, 7 оновчтой дамжуулалт хийжээ. Дерек Фишер 2 дахь тоглолтонд Сколаг хүчтэй түлхэж, 1 тоглолтоор торгуулаад байв.

Рокитсоос Артист 25 оноо авсан ч сүүлийн минутанд По Газоль дээр гаргасан санаатай алдааныхаа улмаас талбайгаас хөөгдсөн байна. Тэрээр 2 дахь тоглолтонд ч мөн тоглолтыг дуусгаж чадалгүй хөөгдөөд байлаа.  Яо Мин дабл-дабл хийсэн ч түүний зүүн хөл зовиуртай байна. Маргааш Яогийн гэмтлийг нарийвчлан харах бөгөөд хариу эерэг гарвал 4 дэх тоглолтонд тоглоно. “Би тоглохыг үнэхээр их хүсч байна. Маргаашийн тестийн хариу зүгээр гарвал би тоглоно” гэж Яо хэлжээ. Мөн тэрээр “Үе бүрт бидэнд асуудал байсан. Жишээ нь эхний 2 үед бид маш олон удаа бөмбөгөө алдсан. Бид ер нь сайн тоглож чадаагүй” гэв.

Уг нь Рокитс талбай дээрээ 9 тоглолт дараалан хожоод байж.

Лейкерсийн энэхүү хожил Фил Жексонд плей-оффын 199 дэх хожлыг нь бэлэглэжээ.

“Орландо” – “Бостон” – 117:96 (22:18, 31:23, 25:28, 39:27)

О: Льюис – 28. Туркоглу – 24. Ховард – 17 + 14 самбар.

Б: Пирс – 27. Рондо – 15. Хаус – 15.

Цувралын харьцаа – 2:1.

Орландо Мэжик лидерүүдийнхээ жигд сайн тоглолтын ачаар ялалт байгуулж, бүсийнхээ хагас шигшээгийн цувралд 2:1-ээр тэргүүлж эхлэв. Ялангуяа Рашард Льюис, Хедо Туркоглу нар өнөөдөр нийт 52 оноо авсан бөгөөд 4-р үед хамтдаа 23 оноо авчээ. Орландо 59.1 хувийн оновчтой довтолж байсан нь багийнх нь дээд амжилт юм байна. Мэжикийн үндсэн холбогч Жамеер Нельсон энэ улиралд тоглохооргүй гэмтэлтэй байгаа, түүнийг орлуулахаар авсан Рафер Алстон өмнөх тоглолтонд Эдди Хаусын толгой руу цохисныхоо улмаас 1 тоглолтоор торгуулсан тул Энтони Жонсон гарааны холбогчоор тоглосон байна.

Мэжик хожсон ч баярлах болоогүй гэж дасгалжуулагч Стэн Ван Ганди хэлжээ. “Энэ хожлын дараа баярлаж хөөрөх хэрэг байхгүй. Ялангуяа Бостон шиг өрсөлдөгчтэй байгаа үед. 2:1-ээр тэргүүлж байгааг эхний хагасыг 1 онооны давуутай дуусгасантай л адил хүлээж авах хэрэгтэй” гэсэн байна. Мэжик бүсийн шигшээ тоглолтонд 1996 оноос шалгараагүй байгаа бөгөөд 1996 онд Пенни Хардуэй, Шак нараар толгойлуулсан Мэжик бүсийн аваргын төлөө Чикаготой тоглож байлаа.

Бостон Селтикс айлын талбайд 3 дараалан хожигдож байна. Ер нь тэд плей-оффт сүүлийн 25 тоглолтынхоо 19-д нь хожигджээ.

Цувралын дараагийн тоглолт Орландогийн талбайд Даваа гаригт болно.

Чак Дэйли (1930-2009)

1992 оны Барселонийн олимпийн наадмын аварга “Мөрөөдлийн баг”, 1989, 1990 оны НБА-ын аварга Детройт Пистонс багийн дасгалжуулагч Чак Дэйли ертөнцийн мөнх бусыг үзүүлсэн байна.

Тэрээр 1996 онд ҮСБХ-ний эхний 50 жилийн шилдэг 10 дасгалжуулагчийн нэгт нэрлэгдэж байсан бөгөөд олимпийн аварга, лигийн аварга болсон анхны дасгалжуулагч юм.

Дэйли 1978 онд дасгалжуулагчийн гараага Филадельфид Билли Каннинхэмийн туслах болон эхэлжээ. Дараа нь Кливлендийн ерөнхий дасгалжуулагч болсон ч 1981-82 оны улирлыг 9-32 амжилттай эхлүүлсэн тул халагдсан байна. Харин 1983 онд Детройтын дасгалжуулагч болж, өмнө нь хэзээ ч 2 улирал дараалан хожил нь хожигдлоосоо давж байгаагүй багийг 9 улирал дараалан ийм амжилт үзүүлэхэд хүргэжээ. Улмаар 1989, 1990 онуудад лигийн аварга болсон юм. Тухайн үед түүний багийг Детройтын “муу хөвгүүд” гэж нэрлэдэг байлаа. Детройтыг орхисныхоо дараа Нью-Жерси, Орландо Мэжикийг удирдаж байгаад дасгалжуулагчийн ажлаа орхисон байна.