Тайваний Тайпей хотод 2009 оны жудо барилдааны Ази тивийн АШТ болж өндөрлөлөө.

Тэмцээний эрэгтэйчүүдийн 60 кг-ийн жинд манай улсын тамирчин Ганбатын Болдбаатар өнөөдөр барилдаж, Ази тивийн аварга боллоо.

Тэрээр эхний тойрогтоо Катарын бөх Абас Редаг ялж, 2-р тойрогтоо хийлж, хэсгийн аваргын төлөө эзэн орны бөх Супапон Патомкулнитиг ялсан байна. Улмаар хагас шигшээд БНСУ-ын бөх Гван Хьеон Чойг ялжээ. Чой хэсэгтээ Японы К. Акимотог ялаад байсан юм. Ингээд аваргын төлөө Болдоо маань БНАСАУ-ын бөх Кьюн Жин Кимийг ялснаар анх удаа Ази тивийн аварга боллоо.

66 кг-ийн жинд манай тамирчин С. Миярагчаа эхний тойрогтоо хийлж, 2-р тойрогтоо Казакстаны бөх Сергей Лимийг ялаад хэсгийн аваргын төлөө БНАСАУ-ын бөх Пак Чол Минийг ялжээ. Харамсалтай нь мөнгөн медалийн төлөө Японы бөх Тацуаки Игусад ялагдсан байна. Харин хүрэл медалийн төлөө барилдаанд Энэтхэгийн Санжу Синг Иром гэгч бөхийг мөн ялснаар Ази тивийн АШТ-ний хүрэл медалийн эзэн болжээ.

73 кг-ийн жинд ОУХМ С. Ням-Очир эхний тойрогтоо хийлж, 2-р тойрогтоо Узбекстаны Найруз Журакобиловыг ялаад хэсгийн аваргын төлөө БНАСАУ-ын бөх Чол Су Кимд ялагджээ. Дагах барилдаанд Саудын Арабийн Яассир Аяадыг ялж, хүрэл медалийн төлөө Туркменистаны Гуяанч Нурмухаммедовыг ялснаар Монголын багийн бас нэгэн хүрэл медалийн эзэн болжээ. Түүний жинд БНСУ-ын бөх түрүүлжээ.

Үнэмлэхүй жинд энэ оны улсын аварга, ОУХМ Д. Ганхуяг эхний тойрогтоо Тайваний бөх Хан Жиен Ценгийг, 2-р тойрогтоо Энэтхэгийн бөх Анил Кумарыг ялснаар хэсгийн аварга болсон байна. Харин мөнгөн медалийн төлөө Японы бөх Хироки Тачияамад ялагдаж, хүрэл медалийн төлөө Кувейтийн Абдулла Алотайбиг ялж, жудо бөхийн тивийн аварга шалгаруулах тэмцээнээс анхны медалиа хүртлээ.

Манай эрэгтэй баг тамирчид 1 алт, 4 хүрэл медаль хүртэж, багийн дүнгээр 3-т орсон байна. БНСУ-ын эрчүүд 4 алт, 2 мөнгө, 1 хүрэл, Япончууд 2 алт, 3 мөнгө тус тус хүртжээ.

Эмэгтэйчүүдийн 48 кг-ийн жинд М. Уранцэцэг Тайланд, Киргизстаны бөхчүүдийг ялаад мөнгөн медалийн төлөө энэ жинд аварга болсон БНСУ-ын бөхөд ялагдсан. Хүрэл медалийн төлөө Энэтхэгийн бөхийг ялсан байна.

52 кг-ийн жинд ОУХМ М. Бундмаа эхний тойрогтоо хийлж, 2-р тойрогтоо буюу хэсгийн аваргын төлөө БНАСАУ-ын бөхийг ялсан байна. Мөнгөн медалийн төлөө Узбекстаны бөхийн ялаад аваргын төлөө БНХАУ-ын бөхөд ялагдаж, мөнгөн медаль зүүлээ.

57 кг-ийн жинд Т. Баттөгс эхний тойрогт Узбекийн бөхийг ялаад хэсгийн аваргын төлөө БНАСАУ-ын тамирчинд ялагдаж. Дагах барилдаанд Хонконгийн бөхийг ялаад хүрэл медалийн төлөө Тайваны бөхийг ялсан байна. Энэ жинд манай бөхийг ялсан БНАСАУ-ын бөх Юн Хуй Рим түрүүлжээ.

Үнэмлэхүй жинд Я. Дулмаа эхний тойрогтоо хийлж, 2-р тойрогтоо буюу хэсгийн аваргын төлөө Вьетнамын бөхийг ялжээ. Мөнгөн медалийн төлөө энэ жинд түрүүлсэн БНХАУ-ын бөхөд ялагдаж, хүрэл медалийн төлөө Тайваны бөхийг ялсан байна. Я. Дулмаа ийн энэ удаагийн тивийн аваргаас 1 мөнгө, 1 хүрэл медаль авлаа.

Манай бүсгүйчүүд нийт 2 мөнгө, 5 хүрэл медаль хүртжээ.

Энэ оны Азийн Аварга шалгаруулах тэмцээнээс манай улсын баг тамирчид нийт 1 алт (Г. Болдбаатар), 2 мөнгө (М. Бундмаа, Я. Дулмаа), 9 хүрэл (С. Миярагчаа, С. Ням-Очир, Б. Тэмүүлэн, Д. Ганхуяг, М. Уранцэцэг, Т. Баттөгс, Ц. Мөнхзаяа, П. Лхамдэгд, Я. Дулмаа) медаль хүртэж, багийн дүнгээр 5-д орсон байна. Уг нь манай тамирчид нийт 12 медаль авсан амжилтаараа Япон, БНСУ-тай зэрэгцсэн ч медалийн чанараараа 5-руу ухарчээ. БНСУ-ын баг 6 алт, 3 мөнгө, 3 хүрэл, Японы баг 3 алт, 5 мөнгө, 4 хүрэл медаль тус тус хүртсэн байна.