Францын нээлттэй тэмцээний эмэгтэйчүүдийн ганцаарчилсан төрлийн шигшээ тоглолтонд  тоглох  тоглогчид тодорлоо.

Хагас шигшээд ОХУ-ын Динара Сафина Словакийн Доминика Чибулковаг 6-3 6-3 харьцаагаар хожиж, кареерынхаа анхны Их дуулгын цомыг авахад ганц тоглолтонд л хожих хэрэгтэй болж байна.

Тэмцээний тэргүүн чансаатай Сафина “Би өөрийн сэтгэл хөдлөлөө барихыг хичээсэн. Өөрийн сайн тоглолтоо гаргаж чадахгүй байсан ч намайг хожих нь тийм ч амархан биш…Би энэ тэмцээнд түрүүлэхийг үнэхээр их хүсч байна. Өнгөрсөн жил эндээс их туршлага хуримтлуулсан, энэ жил өөрийгөө илүү сайжирсан гэдэгт итгэж байгаа” хэмээн Сафина хэлжээ. Тэрээр өнгөрсөн жил Парисийн шигшээ тоглолтонд Сербийн Ана Ивановичтой тоглон хожигдож байв.

Сафинатай Бямба гаригт түүний нутаг нэгт Светлана Кузнецова өрсөлдөхөөр боллоо. Тэрээр хагас шигшээд Австралийн Саманта Стосурийг нэлээн тэмцэлдэж байж 6-4, 6-7 (5), 6-3 харьцаагаар хожив. Кузнецова, Сафина нар хоорондоо 13 тоглосны 8-д нь Сафина хожиж байжээ.

Сафинагийн ах нь дэлхийн номер 1 байсан, 2 ч Их дуулгын эзэн Марат Сафин юм.

Эрэгтэйчүүдийн хагас шигшээд Робин Содерлинг – Фернандо Гонзалестай, Рожер Федерер – Хуан Мартин Дель Потротой тус тус тоглоно.

Шинэ мянган гарснаас хойш Их дуулгын шигшээд дан Орос бүсгүйчүүд шалгарсан тохиолдол 3 дахь удаагаа болж байна.

Харин энд Их дуулгад түрүүлж байсан ОХУ-ын теннисчдийг сонирхуулъя.

1996 – Roland Garros.  Евгений Кафельников-Михаэль Штих (Герман) 7:6 (7:4), 7:5, 7:6 (7:4)
1999 – Australian Open.  Кафельников-Томас Энквист (Швед) 4:6, 6:0, 6:3, 7:6 (7:1)
2000 – US Open.  Марат Сафин-Пит Сампрас (АНУ) 6:4, 6:3, 6:3
2004 – Roland Garros.  Анастасия Мыскина-Елена Дементьева 6:1, 6:2
2004 – Wimbledon.  Мария Шарапова-Серена Уильямс (АНУ) 6:1, 6:4
2004 – US Open.  Светлана Кузнецова-Дементьева 6:3, 7:5
2005 – Australian Open.  Сафин-Ллейтон Хьюитт (Австрали) 1:6, 6:3, 6:4, 6:4
2006 – US Open.  Шарапова-Жюстин Энен-Арденн (Бельги) 6:4, 6:4
2008 – Australian Open.  Шарапова-Ана Иванович (Серби) 7:5, 6:3