Залуу “Арслангууд” гайхалтай ялалтыг байгуулан 21 хүртэлх настны Европын аваргын шигшээ тоглолтонд шалгаран үлдлээ. Тэд талбайн эзэн Шведүүдийг 16.000 дэмжигчдийнх нь өмнө пеналтиар буулган авсан ба түүхэндээ гурав дахь удаагаа энэ тэмцээнд аваргалах боломжтой болж байна. Тоглолтын эхний гоол үзэгчдийг суудлаа ч бүрэн эзэлж амжаагүй байхад буюу 1 дэх минутад орсон ба Портсмутын хамгаалагч Крени булангаас ирсэн бөмбөгийг оновчтой цохиж тооны харьцааг нээжээ. Англичууд энэ эрчээ алдалгүй довтолсоор эхний үе өндөрлөхөөс өмнө дахин хоёр гоол оруулж ”Гурван титэм”-ийнхнийг гарах гарцгүй болгосон юм. Ситигийн хамгаалагч Оноуха 27 дахь минутад, Бьярсмир 38 дахь минутад өөрийн хаалганд тус тус гоолдсон аж. Гэтэл үнэхээр гайхамшиг гэгч нь биелээ олж хоёрдугаар хагасын дундуур Шведүүд гурван гоол дараалан оруулж тооны харьцааг тэнцүүлж чаджээ. 2005 оны Аваргуудын лигийн шигшээг санагдуулам энэ үйл явдлын баатраар мэргэн буучдын жагсаалтыг тэргүүлж буй Маркус Берг тодорсон бөгөөд тэрээр 68′, 81 дэх минутад хаалганы өмнүүр ирсэн дамжуулалтуудыг чулуу болгосон юм. Мөн түүний багийн анд Тойвонены гайхалтай чөлөөт цохилтыг ч дурьдахгүй өнгөрөх аргагүй. Үндсэн цаг ийнхүү 3 : 3-н харьцаатай өндөрлөж нэмэлт цаг эхэлсэн ба хоёр баг гоол оруулахаар ихээхэн хичээсэн ч үр дүнд хүрэлгүй байсаар торгуулийн цохилтоор ялагчын хувь заяа тодрох болсон юм. Байдал  хаашаа ч эргэж мэдэх энэ эгзэгтэй мөчид тоглолтын баатар Маркус Берг эхний цохилтыг алдаж багаа хүнд байдалд оруулжээ. Аз болж Английн эхний цохилтыг гүйцэтгэсэн Жеймс Милнер мөн ”шувуу буудаж” тооны харьцааг хэвээр үлдээсэн юм. Үүнээс хойш хоёр багийнхан ээлжлэн цохилтоо амжилттай болгосоор 6 дахь тоглогчын ээлж болоход Шведийн Гулермо Моллинс шон онож Англичуудад шигшээ тоглолтонд шалгарах тасалбарийг нь гардуулжээ. Түүний өмнө Арсеналын Гиббс өөрийн цохилтоо амжилттай гүйцэтгээд байсан юм.

Англи 3 : 3 Швед (1′ Мартин Крени, 27′ Оноуха, 38′ Бьярсмир автогоол), (68′ 81′ Берг, 75′ Тойвонен)

торгуулийн цохилт 5 : 4

Хоффенхэймийн залуу од Бек Германчуудыг шигшээд шалгарууллаа. Түүний 48 дахь минутад гүйцэтгэсэн алсын цохилтыг Консильи хаах боломжтой байсан ч, багаа аварч чадсангүй. Хелсинборг хотод болсон уг тулаанд Италичууд өрсөлдөгчөө хавьгүй илүүрхэж байсан ч гоол оруулах гэсэн бүх оролдлого нь Мануель Нойер дээр хүрээд зогсож байсан юм. Ялангуяа Балотелли, Акуафрешка нарын хэд хэдэн аюултай довтолгоог Шалькегийн хаалгач гайхалтай зогсоосон. Германчууд өмнө нь энэ тэмцээнд аваргалж байгаагүй бөгөөд 1982 онд Англид ялагдаж мөнгө медаль зүүж байсан аж. Шигшээ тоглолт ирэх 29-нд Мальмо хотын Шведбанк цэнгэлдэхэд явагдана.

Итали 0 : 1 Герман (48′ Бек)