Монголын жүдо бөхийн холбооны ерөнхийлөгч Х.Баттулгын урилгаар манай оронд айлчлал хийж буй Олон улсын жүдо бөхийн холбооны ерөнхийлөгч Мариус Визер өчигдөр “Olympic House”-т зочиллоо. Түүнийг МҮОХ-ны ерөнхийлөгч Д.Загдсүрэн, ерөнхий нарийн бичгийн дарга Ж.Отгонцагаан нар хүлээн авч уулзан “Олимпийн алдар” одонгоор шагнажээ.

Жүдо бөх нь дэлхийд хамгийн түгээмэл хөгжсөн спортын тоонд зүй ёсоор ордог бөгөөд “Бээжин-2008” олимпийн наадмын хамгийн олон орны төлөөлөлтэй таван спортын нэгд багтсан нь үүний баталгаа юм. Жүдогийн өнөөгийн энэ хөгжилд Европын жүдо бөхийн холбооны ерөнхийлөгчөөр ажиллаж байгаад 2007 оны есдүгээр сараас IJF-ийн тэргүүний албанд сонгогдсон түүний хүчин зүтгэл тодорхой хэмжээгээр бий.

Визер нь 1958 онд Румыний Тинка хэмээх жижиг хотод төрсөн бөгөөд Чаушескугийн дэглэмийн үед гэр бүлийн хамт Австри руу дүрвэж, улмаар тус улсын иргэн болжээ. Тэрбээр өдгөө зүүн Европын зарим орнуудад салбартай казино, олон улсын худалдааны бизнес эрхэлдэг аж.

Жүдогийн босс Монголд айлчлах хугацаандаа Төв Азийн жүдо бөхийн бэлтгэлийн төвийн бүтээн байгуулалтын судалгааг хийж, ирэх жил Спорт цогцолбор ашиглалтад орсны дараа жүдо бөхийн багийн ДАШТ-ийг Улаанбаатарт зохион явуулах талаар санал бодлоо солилцохоор төлөвлөжээ.