Их Британичуудын олон жил хүлээсэн цомыг авчрахын тулд Энди Мюррей Испаний Хуан Карлос Феррерог буулган авах шаардлагатай болоод байна. Хоёр тамирчин Уимблдоны өмнөх сорилгод мөн учраа таарч байсан бөгөөд тус тоглолтонд Мюррей өрсөлдөгчөө илт давуу ялж байсан юм. “Ферреро бол тун элдэвтэй тоглогч. Тэр ямар ч гадаргуун дээр маш сайн тоглодог, дэлхийн шилдэгүүдийн нэг. Хоёр долоо хоногийн өмнө би түүнийг ялсан ч энэ нь юуг ч шийдэхгүй. Тиймээс энэ тоглолтонд бүх анхаарлаа хандуулж, байдаг чадлаараа хичээх болно. Түүнд ямар нэгэн боломж олгож, мөрөөдлөө үгүй хийлгэхийг би хүсэхгүй байна” хэмээн Британи эр ярьжээ. Он гарснаас хойш Энди Майами Мастерс, Катар опен, Капитала зэрэг хэд хэдэн тэмцээнд магнайлсан бөгөөд Австралийн нээлттэй тэмцээний 4-р шат, Ролан Гарросын их шөвөг хүртэл тэмцсэн юм. Хэрвээ тэр Уимблдонд түрүүлж чадах юм бол Британичуудын 70 жилийн ”шаналал”-ыг үгүй хийх боломжтой. Учир нь 1936 оноос хойш Их Дуулгын цувралд Британи теннисчин түрүүлээгүй байгаа юм. Тиймээс нутгийн хүүгээ дэмжихээр Будант Альбиончууд ордонг дүүртэл цуглах нь аргагүй. Мөн Эндигийн “Би түрүүлнэ гэдэгтээ итгэлтэй байна. Миний хувьд энэ мөчийг хэтэрхий удаан хүлээлээ. Одоо цаг нь болсон” гэсэн үгс ч тэдний найдварыг улам баталгаалжуулж буй. Харин бүх зүйл өөрийнх нь эсрэг байгаа ч Ферреро сандрахгүй байгаагаа өгүүлсэн байна. Тэрээр цагаан хуудсаар Уимблдонд зодоглож байгаа бөгөөд Фернандо Гонзалез, Жиль Симон зэрэг шилдэгүүдийг мулталж шуугиан тарьсан юм. 2003 оны Ролан Гарросын ялагч ”Мюррейтэй тоглосон тэр тулаанаас өөртөө хэрэгтэй туршлагаа олж авсан. Миний санааг зовоож байгаа хамгийн гол асуудал бол түүний давуулалтууд, бас хурд. Дээрээс нь үзэгчид бүгд намайг ялагдахыг хүлээж байгаа. Тиймээс их хүнд тоголт болно байх” гэжээ.
Энэ хоёрын ялсан нь шөвгийн дөрөвт Хьюитт-Роддик нарын нэгэнтэй тулах юм. Одоогийн байдлаар их шөвгийн Рожер Федерер – Иво Карлович, Томми Хаас – Новак Жокович нарын тулаан ид өрнөж байна.

Шөвгийн 8

Шөвгийн 4

Шигшээ

Ллейтон Хьюит

6

Энди Роддик

3

Энди Мюррей

WC

Хуан Карлос Ферреро

24

Томми Хаас

4

Новак Жокович

22

Иво Карлович

2

Рожер Федерер