Ширээний теннисний тооцоо

Мэргэн буудагчдын цугларалт

Азийн Олимпийн Зөвлөлийн Шейх Ахмадын төрсөн дүү Шейх Салман нь Азийн Буудлагын Холбоог тэргүүлдэг билээ. Ах дүүс Азийн хүүхдийн наадмын үеэр ажил хэрэгчээр уулзан, ирэх жилийн Хүүхдийн олимпийн өмнө мэргэн буудагчдаа шургуу бэлтгэх зорилгоор нэгэн сайхан төслийн батлав. Уг хөтөлбөрийн дагуу АОЗ-ийн гишүүн ҮОХ бүрээс хийн урт бууны хоёр тамирчин (16-19), нэг дасгалжуулагчийг Бангкок хотноо 14 хоногийн нэгдсэн цугларалтад урьж, бүх зардлыг АОЗ даахаар боллоо. Уг урилгыг МҮОХ-оос Буудлагын холбооны генсек Б.Нямсүрэнд шуурхай гардуулав.

Монголын багийн баяр

Шарын голоос ирсэн, 800 метрийн зайд 6-р байрт шалгарсан, 11-р ангийн Үермаагийн Азбилэгийн төрсөн өдөр 7-р сарын 4-нд буюу АНУ-ын тусгаар тогтнолын баяртай давхцсан бөгөөд манай охины төрсөн өдрийг тамирчдын тосгоны бүх хүмүүс алга ташин тэмдэглэв. БТСГ-ын дарга Ч.Наранбаатар тэргүүтэй албаныхан гарын бэлгээ өгч, Сингапурын талын туслах Линда том бялуу өргөн барив.

Монголын багийн сандрал

Хөвсгөл аймгийн Их Уул сумаас ирсэн хөнгөний тамирчин Б.Од-Эрдэнийн баруун талын уруулын зөөлөн эд идээлэн хавдаж, түргэн тусламж дуудахдаа хүрэв. Сингапурын эмнэлгийн өндөр чадвар, АОЗ-ийн эмнэдгийн комиссын дарга Жегатассений хүчин зүтгэлээр шуурхай эмчилгээ хийж, пластик зүсэлтээр аюулыг зайлуулж чадав. Төрсөн өдрийн дараа эмнэлгээс гарсан хүүгээ мөн л Монголын багийнхан эргэж, бие илааршсанд сэтгэл амарлаа.

Халуун шеф

Сингапурын “Хайлааст”-д байдаг Evergreen дунд сургууль нийт 1700 сурагчтай, 60 гаруй багштай тэргүүлэх зэрэглэлийн сургууль ажээ. Манай улсын Гёте сургуультай шефийн харилцаа тогтоож, МҮОХ, ЭСЯамны дэмжлэгээр Монголыг идэвхитэй сурталчлан, энэ харилцаагаа цаашдаа улам гүнзгийрүүлэх төлөвлөгөөтэй байна.  Ялангуяа хойтон болох Хүүхдийн Олимпийн Наадмын үеэр бүх сонирхолтой хэлбэрээр Монголын соёл, түүх, уламжлалыг дэлхийн нийтэд сурталчлахаар ханцуй шамлан ажиллахаар зүтгэж байна.

Цэнхэр замаа дуусгав

Усан спортын хоёр тамирчин эх газрын монголчууд чадах чинээгээрээ оролцлоо. Эмэгтэй тамирчин маань харамсалтай нь “false-start” хийснээ мэдэлгүй цэнхэр замаа дуусгасан боловч шүүгчийн зөвлөлөөс түүний цагийг нойллож орхив. Харин усчин хүү маань Доха Азийн Наадамд өрсөлдөж байсан туршлагатай нэгэн бөгөөд ардаа ганц Хонг Конгийн тамирчин “усаараа булав”.

Сингапураас тусгай сурвалжлагч Ж.Отгонцагаан