Испаний алдарт Реал Мадрид клуб Манчестер Юнайтедаас 80 сая фунтээр худалдан авсан португалийн супер од Криштиану Роналдугаа албан ёсоор танилцууллаа. Сантьяго Бернабеу цэнгэлдэхэд явагдсан энэхүү үйл ажиллагaаг үзэхээр нийт 80000 үзэгч цугласан бөгөөд хэдэн өдрийн өмнө Какагийн танилцуулах ёслолыг сонирхохоор энэ цэнгэлдэхэд 50000 Мадридиста цугларч байсан юм.

Хөлбөмбөгийн ертөнцийн хамгийн үнэтэй тоглогчоор тодорсон Роналду ийнхүү хамгийн олон үзэгчийг танилцуулах ёслол дээрээ цуглуулсан амжилтын эзэн болжээ. Тэртээ 1984 онд Италийн Наполи клубын 75000 дэмжигчид Диего Марадонаг угтан авахаар цугларч байсан юм.

Шинэ клубтээ Роналду 9 дугаарыг эзэмших бөгөөд өмнө нь ”Шүдэрхэг” Бразил Роналдо Эзэн хааны багт хүчин зүтгэж байхдаа мөн энэ номерийг зүүдэг байсан билээ. Реал Мадрид телевизэд өгсөн ярилцлагадаа 24 настай Португал эр ”Би энд Англид үзүүлснээсээ илүү амжилтанд хүрнэ гэж найдаж байна. Хэдийгээр Испаний лигийн багууд хүчирхэг тоглогчид нь өндөр ур чадвартай ч, энэ нь надад огтхон ч хүндрэлтэй санагдахгүй байна. Харин ч шинэ адал явдалтай учирч, өөрийгөө шинээр нээнэ гэдэг миний хувьд таатай санагдаж байгаа. Реал Мадридад би хүссэн бүхнээ авах болно гэдэгтээ итгэлтэй байна. Тун удахгүй би өөрийгөө хэн гэдгээ харуулах болно” гэжээ.

Солилцоо наймааны улирал эхэлснээс хойш Эзэн хааны баг дөрвөн тоглогчийг өөрийн эгнээнд нэгтгээд байгаа билээ. Тэд Миланаас Какаг 65 сая еврогоор , Валенсигаас Раул Албиолыг 15 сая еврогоор, Олимпик Лионоос  Карим Бенземаг 35 сая еврогоор тус тус худалдан аваад байгаа юм. Испани болон Английн хэвлэлүүдийн мэдээлж байгаагаар тэдний ”Галактикo 2” төлөвлөгөөний ээлжит бай нь Ливерпулийн Чави Алонсо, Валенсигийн Давид Вилья нар байх аж.