Сүүлийн жилүүдэд манай оронд хөлбөмбөгийн спортыг сонирхож, хичээллэх залуус маш олноор нэмэгдэж байгаа билээ. Бүх дэлхийг даяарчилж чадсан манай гаригийн номер 1 спортыг залуус зөвхөн үзэж сонирхоод суух биш, эх орондоо хөгжүүлж, дэлхийн түвшинд авааачихаар  сэтгэл гаргаж байгаа нь сайшаалтай. Гэвч өнөөх л хүнд суртал, авилгал хээл хахууль зэрэг бидний бараг дасал болсон элдэв асуудлуудаас бол Монголын хөлбөмбөгийн спортын цаашдын хөгжил, дэвших зам хаагдаж байгаа нь харамсалтай.  Наад зах нь л гэхэд тоотой хэд байдаг хөлбөмбөгийн талбайнууд дээр нь эрх мэдэл, мөнгө төгрөгөөр далайлгасан нэгнүүд нь байшин барилга, граж бариад дуусгаж байна. Мөн дэлхийн спaндартад нийцсэн ганцхан ногоон талбай байдаг ч тэнд нь хүүхэд залуус чөлөөт цагаараа тоглох, хичээллэх ямар ч боломж байдаггүй. Энэ мэтчилэн дурьдаад байвал Монголын хөлбөмбөгийн спортод тулгарч буй асуудлууд өч төчнөөн байна. Гэвч эдгээрийг үл хайхран эх орондоо хөлбөмбөгийн спортыг хөгжүүлж, сонирхогчдын хүрээг улам нэмэгдүүлэх,  цаашдаа дэлхийд биш юм аа, гэхэд ядаж Азидаа данстай хөлбөмбөгчидтэй болох юмсан гэсэн хүсэлтэй залуус нэгдэн ”Хөлбөмбөг” хэмээх нэгэн шинэ сониныг саяхнаас гаргаж эхэлжээ. Зөвхөн хөлбөмбөгөөр дагнасан мэдээлэлтэй энэхүү сониныг Сэлэнгэ пресс компаниас ивээн тэтгэн гаргаж байгаа бөгөөд гадаадын лиг, тамирчдын орчуулгын материал гэхээсээ илүү Монголынхоо хөлбөмбөгийн мэдээллээс түлхүү хүргэж, цаашид бид юу хийх вэ, яаж ажиллавал эх оронд маань энэ спорт өндөр түвшинд хөгжих вэ гэсэн асуудлыг уншигчдад дэвшүүлж байгаа юм. Мөн дэлхийн хөлбөмбөгийн ертөнцөд болж буй онцлох үйл явлуудын мэдээлэлд дүн шинжилгээ хийж, монголын сэтгүүлчдийн дүгнэлт, тайлбарыг  оруулахыг зорин ажиллажээ.
Сонины эхний дугаар саяхан 7 сард хэвлэгдсэн бөгөөд Монголын хөлбөмбөгийн үндэсний шигшээн ерөнхий дасгалжуулагч И.Отгонбаярын ярилцлага, өнгөрсөн 4 сард болсон Азийн хөлбөмбөгийн холбооноос зохион байгуулсан Challenge кап тэмцээний тухай болон Аваргуудын лиг, Бундеслигийн өнгөрсөн улиралын тухай дүн шинжилгээ зэрэг сонирхолтой материалууд энэ дугаарт багтсан байна.