Үндэсний их баяр наадамд шөвгөрсөн бөхчүүдийн заримаас допинг илэрсэн гэх мэдээ ойрмогхон олны дунд тархаад байна. Энэ талаар МҮОХ-ны дэд ерөнхийлөгч Ц.Дамдин, Спортын анагаах ухааны албаны дарга Ч.Насанбат нараас тодруулахад “БНСУ-ын Шинжлэх ухаан, технологийн институт (KIST)-ын допингийн хяналтын лабораторид явуулсан шинжилгээний албан ёсны хариу ирээгүй байна. Иймд энэ тухай олны дунд тархсан яриа огт үндэслэлгүй болохыг албан ёсоор мэдэгдье. Хуулинд зааснаар хариу ирсний дараа ажлын 10 хоногт багтааж албан ёсоор мэдэгдэх ёстой байдаг. Гэтэл хариу нь ч ирээгүй байна” хэмээлээ. Манай бөхчүүдийг Өвөр Монголд Монгол туургатны барилдаан, зарим нь хөдөө орон нутагт нутгийн зон олон нь шинэ цолтноо хүлээж авч буй энэ үед ийм асуудал гараад буй нь тун харамсалтай.