Хөлбөмбөгийн үндэсний лигийн аварга шалгаруулах тэмцээний ээлжит тоглолтууд өнгөрөгч мягмар гаригт явагдлаа. Энэ өдрийн эхний тоглолт лигийн зургаан удаагийн аварга “Эрчим” клуб “Хараацай”-гийн хооронд болов. Дөрвөн тоглолтын дараагаар ердөө дөрөвхөн оноотойгоор зургаад бичигдэж явсан “Эрчим”-ийнхэн энэ удаад өрсөлдөгчөө 5:2-оор илүүрхэв. Тоглолтын эхний үеийн 33 дахь минутад “Эрчим”-ийн баруун жигүүрийн хагас хамгаалагч Б.Өнөнбаяр  тоглолтын салхийг хагалсан бол ердөө гурван минутын дараа “Хараацай”-гийн Б.Ууганбаяр 11 м-ийн торгуулийн цохилтоор тэнцээний бөмбөгийг хийсэн. Эхний гоолын эзэн Б.Өнөнбаяр 41 дэх минутад багтаа дахин давамгайлал авчирсан ч өнөөх Б.Ууганбаяр хоёр минутын дараа хариуг нь барьсан юм.  Үүний дараа нэгдүгээр үеийн цаг дуусах мөчтэй зэрэгцэн “Эрчим”-ийн зүүн жигүүр Э.Чинбаатар тоог 3:2 болгосноор эхний хагас өндөрлөв. Хоёрдугаар үед оноо дутуу явсан “Хараацай” довтолгоонд идэвхитэй тоглож байсан ч хамгаалагч Б.Дашдорж нь хоёр дахь шар хуудсаа авснаар талбайг чөлөөлсөн. Мөн “Хараацай”-гийн хоёрдугаар хаалгач У.Баасандорж улаан хуудсаар торгуулснаар талбай дээр есүүлээ үлдэв. Үүнийг “Эрчим”-ийнхэн овжин ашиглаж 73, 77 дахь минутад тооны зөрүүг холдууллаа. Дээрх гоолуудыг Б.Өнөнбаяр оруулснаар өнөө жилийн хоёр дахь “покер”-ийн эзэн болов. Тус тоглолтын дараагаар “Хоромхон” клуб хожигдох эрхгүй “Мазаалай”-тай тоглосон.  “Хоромхон”-ы гол тоглогч Г.Даваа-Очир уг тоглолтод оролцоогүй хэдий ч баг нь Б.Ган-Очир, А.Батболд нарын гоолын ачаар хожил авснаар “Сэлэнгэ пресс”-тэй ижил арван оноотой лигийн АШТ-ийг тэргүүлж эхэллээ. “Сэлэнгэ пресс”-ийн хувьд “Хоромхон”-оос  нэг тоглолт дутуу байгаа ба өнөөдөр “Улаанбаатар” дээд сургуулийн эсрэг тоглох юм. Харин “Мазаалай”-д тэмцээнийг цаашид үргэлжлүүлэх онолын боломж бий. Одоо тэд “Хараацай”, “Эрчим” клубүүдйг зайлшгүй хожиж байж, дараагийн шатанд үлдэх боломж хайх юм. Тэдний энэ боломж нь “Улаанбаатар” дээд сургууль, “Хангарьд” хоёрыг гурав дараалан хожигдсон тохиолдолд биеллээ олох боломжтой.

VIII.4
Эрчим-Хараацай    5:2
Гоол: Б.Өнөнбаяр 33, 41, 73, 77 Э.Чинбаатар 45-Б.Ууганбаяр 36, 43

Хоромхон-Мазаалай    2:0
Гоол: Б.Ган-Очир 12, А.Батболд 39

Тэмцээний Явц

Баг                            То    Хо    Тэ    Хд    Б/Х       Оноо
1.Сэлэнгэ пресс        4        3      1       0      13-5         10
2.Хоромхон               5        3      1       1      14-8         10
3.Хасын хүлгүүд       4        2      2       0      11-6         8
4.Эрчим                      5       2      1       2      10-12       7
5.Хангарьд                4       2      0       2      11-10       6
6.Улаанбаатар ДС    4       2      0       2      8-9           6
7.Хараацай                5       1      0       4      10-17       3
8.Мазаалай                5       0      1       4      4-14         1

Тоглолтын хуваарь
VIII.6      18:00     Сэлэнгэ пресс-Улаанбаатар ДС
VIII.7      18:00    Хасын  хүлгүүд-Хангарьд
VIII.8      18:00    Хараацай-Мазаалай
VIII.9      18:00    Хоромхон-Сэлэнгэ пресс
VIII.10    18:00    Улаанбаатар ДС-Хасын хүлгүүд
VIII.11    18:00    Эрчим-Хангарьд
VIII.13    15:00    Мазаалай-Эрчим
17:15    Сэлэнгэ пресс-Хараацай
VIII.15    15:.00    Хасын хүлгүүд-Хоромхон
17:15    Хангарьд-Улаанбаатар ДС
Нэгдүгээр тойргийн дараагаар сүүл мушгисан хоёр баг хасагдана. Харин үлдсэн зургаан баг эзэлсэн байрын дагуу хоёр хэсэгт хуваагдан өрсөлдөх юм. Хэсэг тус бүрээс эхний хоёр байр эзэлсэн багууд медалийн төлөө өрсөлдөнө. Үлдсэн хоёр баг тавдугаар байрын төлөө тоглох аж.

VIII.18   15:00    A2-A3
17:15    B2-B3
VIII.20   15:00    A3-A1
17:15    B3-B1
VIII.22   15:00    A1-A2
17:15    B1-B2
VIII.26    15:00    A1-B2
17:15    A2-B1
VIII.28    17:00    V-VI байрын төлөөх тоглолт
VIII.29    11:00    хүрэл медалийн тоглолт
13:00    Аваргын төлөөх тоглолт

А.Түмэнбаяр