Берлиний Олимпийн цэнгэлдэхэд болж буй хөнгөн атлетикийн ДАШТ-ий зургаа дахь өдөр Болтынх байлаа.

Эрэгтэйчүүдийн 200 метрийн уралдаанд олны таамаглаж байснаар Усэйн  Болт түрүүллээ. Түрүүлэхдээ рекорд тогтоож. Эвдсэн рекорд нь өнгөрсөн жил өөрийнх нь гүйсэн 19.30 секунд.

Тэр 200 метрийн зайг 19.19 секундэд туулжээ. 1919 онд түүний өвөө төрж байсан гэнэ. Болтын энэ алтан медаль энэ долоо хоногт Ямайкуудын авч буй тав дахь алт бөгөөд тэд багийн дүнгээр тэргүүлж эхэлжээ.

Мөн Болт 100м, 200м-д түрүүлснээр нийт 320 мянган ногооныг хүртэж байна.

1996 оны Атлантын алтан олимпоор Майкл Жонсон 19.32 секунд гүйж рекорд тогтооход дэлхийн тогтооход хамгийн бэрх рекорд хэмээн үзэгдэж байсан. Тэгвэл 12 жилийн дараа эвдсэн. Өнгөрсөн зун Усэйн Болт олимпоор түрүүлэхдээ 19.30-аас илүү гүйж болох байсан ч салхины хүч нөлөөлж сайн гүйж чадаагүй гэдэг.

Панамын тамирчин Алонзо Эдвард 19.81 секунд гүйж мөнгөн медаль хүртсэн бол өөрийн нутгийн анд Шон Кроуфордыг 0.04 секундээр гүйцсэн АНУ-ын Уоллес Спирмон 19.85 амжилтаар хүрэл медалиар энгэрээ чимлээ. Ямайкын тамирчин Стив Мөллингс 19.98 секунд гүйж нийт таван тамирчин 20 секунд дотор замаа дуусгажээ. Энэ нь мөн рекорд болж байгаа гэнэ.

Мөн Болтын 100 метр болон 200 метрийн ялалтын зөрүү нь 0.62 секунд байна. Энэ цаг үед Болтыг гүйцэх гүйгч, Болтыг гүйцэх хүн ерөөсөө байхгүй юм байна.

200 метрийн дэлхийн рекордууд

400 метрийн халхалттай гүйлт

Болтын гайхамшгийн өмнө бүсгүйчүүдийн 400 метрийн халхалттай гүйлт болж нутаг нэгтнүүд нь Болтын замыг сайхан зассан юм. Улирлын турш одтой байгаа Ямайкын Мелин Уолкер энэ удаа ч гялалзаж 52.42 секунд гүйн тэмцээний рекордыг эвдэж алтан медаль хүртсэн бол амралтнаасаа эргэн ирсэн АНУ-ын Лашинда Демус 52.96 гүйж мөнгөн медаль хүртжээ. 52.42 секунд нь түүхэн дэх хоёр дахь хурдан гүйлт гэнэ. Тринидад ба Тобагогийн 53.20 амжилтаар улсынхаа рекордыг тогтоон хүрэл медаль хүртжээ.

Өндрийн харайлт

Хорватын Бланка Власич олимпоор ялагдаж мөнгөн медаль авсныхаа хариуг авч алтан медаль авлаа. Оросын Анна Чичерова 2.02 метр дээгүүр харайж удаан хугацаанд тэргүүлэгч байлаа. Сүүлд Власичийг 2.04 дээгүүр харайж Чичеровагийн алтын мөрөөдлийг үгүй хийжээ. Германы Ариан Фридрех сүүлд 2.06метрийг захиалан харайсан ч давж чадсангүй. Ийнхүү Власич алтан медаль авлаа. Чичерова мөнгөн медаль авч, Гермөн бүсгүй хүрэл медаль хүртжээ. Алт, мөнгөн медалийн эзэд Осакад мөн алт, мөнгөн медаль хүртэж байсан юм.

110 метрийн халхалттай гүйлт

Энэ зайн лидерүүд гэмтдэг хараал гэмээр зүйлс байна уу даа гэсэн бодол хүмүүст төрж байна. 2005 оны дэлхийн аварга Францын Лажи Докур, 2007 оны дэлхийн аварга Лью Сиан нар гэмтсэн бол энэ удаа босоо байгаа Дэйрон Роблес хагас шигшээд гэмтэж шигшээ уралдаанд орж чадахгүй болжээ.

Гэхдээ шигшээ уралдаан сонирхолтой боллоо. Барбадосын Райан Брэйтвэйт, АНУ-ын Терренс Траммел, Дэвид Пэйн нарын хооронд тун ширүүн тэмцэл өрнөсөн. Барианд тэднийг ороход компьютер л тэдний хэн нь түрүүлснийг зарлаж чадахаар байв. Брэйтвэйтийг стадионы зарлагч 13.14 секунд гүйж түрүүлсэн хэмээн зарлаж, Траммел, Пэйн нар адилхан 13.15 секунд гүйн Траммел мөнгө, Пэйн хүрэл медаль хүртжээ.
Арван төрөлт

Энэ өдөр мөн арван төрөлтийн сүүлчийн төрөл болох1500 метрийн гүйлт болж АНУ-ын Трей Харди түрүүллээ. Тэр 8790 оноотойгоор түрүүлсэн юм. Сүүлчийн өдөр Кубын Леонель Суарез сайн гүйснээр ОХУ-ын Александр Погореловыг гүйцэн 8640 оноотой болж мөнгөн медалийн болзол хангажээ. Харин Александр 8528 оноотойгоор хүрэл медаль хүртсэн байна.

Чансаа	Улс	Алт	Мөнгө	Хүрэл	Нийт
1	Ямайк	5	2	2	9
2	АНУ	4	4	5	13
3	ОХУ	2	2	5	9
4	Кени	2	2	2	6
4	Герман	2	2	2	6
6	Их Британи	2	0	1	3
7	Польш	1	4	1	6
8	Куба	1	2	1	4
8	Этиоп	1	2	1	4