Yahoo-ын Келли Дуейр 21-р зуунд аварга болж чадаагүй шилдэг 10 багийг нэрлэжээ. Энэ 10 гаруй жилийн хугацаанд аваргын төлөө хүчтэй өрсөлдөж байсан олон баг аварга болж чадаагүй бөгөөд энэ жагсаалтанд нэг багийг зөвхөн нэг л удаа оруулсан байна.

5. Dallas Mavericks, 2006-07

Тэд улирлын эхний 4 тоглолтондоо дараалан хожигдсон ч төгсгөлийг 67-11 хийж, нийт 67 ялсан нь багийнх нь түүхэн дэх хамгийн өндөр амжилт төдийгүй лигийн түүхэнд дээгүүр орох амжилт байлаа. Дирк Новицки тэр улиралд “Хамгийн үнэ цэнтэй тоглогч”-оор тодорч байсан бөгөөд Даллас өмнөх улиралд нь аваргын төлөө шалгаран үлдэж, Майамид харамсалтайгаар хожигдоод байсан. Олон хүн Далласыг өмнөх улирлын бүтэлгүйтлээ засаж чадах байх гэж бодож байсан ч ердөө плей-оффын эхний шатанд л сөхөрсөн билээ.

Голден Стэйтийн хожлын гол түлхүүр нь мэдээж Дон Нельсон байсан биз. Нельсон өмнө нь Далласыг олон жил удирдсан, Новицкигийн эсрэг яаж тоглохыг мэдэж байсан болов уу.

Тэрхүү улиралд олон хүн Далласыг хамгийн шилдэг багаар нэрлэж байхдаа Сан Антионогийн улирлын тоглолтын онооны харьцааг анхаараагүй байх. Спэрс тэр улиралд нэг тоглолтонд өрсөлдөгчөөсөө дунджаар 8.4 оноо илүү авч байсан нь Далласаас бүтэн нэг оноогоор илүү байв. Тэрхүү улиралд Спэрс хялбархан түрүүлсэн.

4. Portland Trail Blazers, 1999-00

Тэр үеийн Портлэнд үнэхээр шилдэг бүрэлдэхүүнтэй баг байсан бөгөөд хүч чадал, нөөц бололцоогоо бүрэн мэдэрсэн тэд аварга болох л зорилготой байсан нь мэдээж. Улирлыг 45-11 амжилтаар эхлүүлээд төгсгөлийн 26 тоглолтынхоо 12-т нь хожигдсон. Плей-оффын эхний 2 шатыг хялбархан даваад бүсийн аваргын төлөө Шак, Кобитой Лейкерстэй тоглож, цуврал 7 тоглолтонд дийлдэж байлаа. Ялангуяа 7 дахь тоглолтын 4-р үед 10 гаруй оноогоор хожиж байгаад бариулсан азгүй баг. Энэ үеэс эхлээд Портлэндийн амжилт дандаа уруудсан бол Лейкерсийнх өгсөж, лигт 3 дараалан түрүүлж байлаа. Портлэндэд Скотти Пиппен, Рашид Уоллес, Дэмон Стаудмайр, Арвидас Сабонис, Стив Смит зэрэг шилдэг тоглогчид тухайн үед тоглодог байжээ.

3. San Antonio Spurs, 2003-04

Спэрс өмнөх улиралд нь аварга болоод байсан, мөн Тони Паркер, Ману Жинобили нар хавьгүй илүү туршлагажсан тул 2004 оны аваргалах боломжтой гол багаар нэрлэгдэж байсан. 2001, 2002 онуудад плей-оффт Лейкерст хожигдсон ч 2003 онд тэд Лейкерсийг хожиж, улмаар аварга болсон. 2004 оны плей-оффт энэ 2 баг мөн л таарч цуврал 2:2 тэнцүү байхад 5 дахь тоглолт Спэрсийн талбайд болсон. Тэрхүү тоглолтын сүүлчийн гэмээр 2 оноог Данкан авч, 0.4 секунд үлдээд байхад Спэрс 2 оноо илүү байлаа. Гэвч тэрхүү боломжгүй мэт хугацаанд Дерек Фишер амжиж шидсэн нь оновчтой болсон нь Лейкерсийн хожих замыг зассан.

Гэхдээ Спэрс тэр жил Лейкерст хожигдсон ч бараг тэр бүрэлдэхүүнээрээ дараагийн 2005, 2007 онуудад аваргалж, ямархуу шилдэг баг гэдгээ нотолж байлаа.

2. Sacramento Kings, 2001-02

Келли Дуейр Кингзийг 2-т нэрлэж. Миний бодлоор бол энэ баг 1-т байх ёстой. Үнэхээр сайн баг байсан. Тэд маш амархан сагсан бөмбөг тоглодог байлаа. Нэшийн Санс шиг зөвхөн хурдан довтолгоо, пик-н-роллоор оноо авдаггүй байсан. Оноо авч болох бүх л аргыг сайн ашигладаг, лигийн хамгийн сайн довтолгоотой, хамгаалалтаараа 6-д бичигддэг, гайхалтай хамтач тоглолттой баг байв. Кингзийн 7 тоглогч тэрхүү улиралд 10-оос дээш оноог дунджаар авдаг, үүн дотор Крис Уэббэр, Пежа Стоякович нар 20+ оноо авдаг байлаа. Өрнөд бүсээ тэргүүлэн плей-оффт 1-ээр гараад Юта, Далласыг юм болголгүй хожсон. Харин бүсийн аваргын төлөө мөнөөх л Лейкерстэй учраа тааран цуврал 7 тоглолт хийн хожигдож байлаа. Дэгсдүүлж хэлвэл Кингз эдгээр 7 тоглолтонд бүгдэд нь хожих хэмжээний тоглолт үзүүлсэн гэхэд болно. Хамгийн азгүй тоглолт нь 4 дэх тоглолт. Кобигийн довтолгоо оновчгүй болоход Влад Дивац самбараас ойсон бөмбөгийг хатгаж, тэр нь Робирт Орри дээр ирээд Орри хэрхэн 3 онооны амжилттай шидэлт хийж буй дүр зургийг одоо ч санаж байна. Цувралын харьцаа 2:2 болсон.

Мөн 6 дахь тоглолтонд шүүгчийн эргэлзээтэй шийдвэр Лейкерст тус болж байсан бол 7 дахь тоглолтонд цаг сунгасны эцэст Лейкерс хожиж байлаа.

Кингзийг дараагийн улирлуудад ч өндөр амжилт гаргана, аварга болох нь гарцаагүй гэж үзэж байсан ч дахин бүсийн аваргын төлөө ч гарч ирж чадаагүй билээ.

1. Cleveland Cavaliers, 2008-09

Өнгөрсөн жилийн Кавальерс. Улиралд 66 хожсон, онооны зөрүү нь 96 оны Буллзынх шиг + 8.9, тэгээд ЛеБрон Жеймстэй баг. Гэвч тэд плей-оффт Орландог аргалж чадаагүй, Мэжик тэднээс яах аргагүй илүү баг байсан.

Гэхдээ Кавальерст, ердөө 24 настай ЛеБронд аварга болох боломж дараа дараагийн улирлуудад олон гарах нь мэдээж.

Бусад нэр дэвшигчид: Orlando Magic 2008-09; Indiana Pacers, 2003-04; Indiana Pacers 1999-00; Philadelphia 76ers, 2000-01