Юуны өмнө нийт уншигчдад буурал Европын сүрлэг цэнгэлдэхүүдэд хурц гэрэл асан, сэтгэл гижигдэм ая нь дуурсахуй дор өөрийн эрхгүй аюулхай омогшил бахдалаар дүүрдэг хосгүй тансаг Аваргуудын Лигийн мэндийг хүргэе. Энэ улирлаас эхлэн тэмцээний журамд бяцхан өөрчлөлт ороод байгаа билээ. 32 баг 8 хэсэгт хуваагдан тоглоод цаашаагаа хасагдах шатанд орон тоглодог нь хэвээрээ. Харин өнөөгийн ерөнхийлөгч Мишель Платинигийн сонгуулийн сурталчилгаандаа ашигласан гол хөтөлбөр нь биеллээ олж эхлээд байна.

Энэ нь тэмцээн нэрэндээ таарсан аль болох олон улсын аварга багуудыг оролцуулах төлөвлөгөө байсан юм. Энэ ёсоор энэ жилээс хэсгийн тоглолтоос орох 32 багийн 22 нь шууд орж байгаа. 21 баг дээр аваргаа хамгаалагч Барселон нэмэгдэж буй. Өдийг хүртэл энэ тоо ердөө 16 байсан юм. Эдгээр 21 багийг сонгохдоо өмнөх шигээ УЕФА-ын 5 жилийн коэффицентийг харгалзан үзсэн. Энэхүү жагсаалтын эхний 3 байрт байгаа улсуудаас тус бүр 3 баг шууд орох эрхээ авсан бол удаах 3 байрт нь жагсаж байгаа 3 улсаас тус бүр 2 баг, долоогоос 12-р байранд байгаа улсуудаас тус бүр 1 баг орох болсон. Эдгээр багууд дээр Барселоныг нэмэхээр 22 баг болж байгаа. Үлдсэн 10 багийг хэрхэн сонгох вэ?

Энэ жилээс эхлээд шууд орох багийг 16-аас 22 болгож нэгэнт өөрчлөлт хийсэн тул үлдсэн 10 багийг ч сонгохдоо цоо шинэ системээр сонгох шаардлага гарч ирсэн. Үүний тулд 4 шат дамжлага бий болсон. Үлдсэн 10 баг урьдчилсан 3 шатын дараа плэй оффын нэг шатыг дамнаж байж алдар суугаар хосгүй энэ тэмцээнд орох болж байгаа. Гэхдээ 50% нь 4 шат дамнана. Бусад нь 2 шат дамжина. Эхлээд харахад ойлгоход нэлээн төвөгтэй юм шиг хэрнээ сайн анхаарч ажваас ихээхэн тодорхой заасан нь мэдэгдэнэ. Ингээд дэлгэрэнгүйгээр тайлбарласугай.

Аваргуудын зам ба Байр эзлэлтийн зам гэсэн 2 тусдаа урьдчилсан шатаар багууд эрхээ авч байгаа. 10 багийн 5 нь Аваргуудын замаар явсаар хэсгийн тоглолтод орох эрхээ авах бол 5 нь нөгөө замаар явах юм. Аваргуудын замаас эхлэн ярья.

Энэ шат нь нэрнээсээ л бүгдийг хэлж байгаа. Улс бүрийн аваргууд эхнээсээ эхлээд хоорондоо тоглосоор яваад 5 нь жинхэнэ тэмцээндээ орох юм. Энэ зам нь 4 шаттай.

1-р шат. УЕФА-ын 5 жилийн коэффицентоор 48-аас 53-р байранд байгаа 6 улсын аварга багууд хос хосоороо гэрийн ба хариу тоглолтоор тоглоод ялсан 3 нь 2-р шат руу ахина.

2-р шат. УЕФА-ын коэф-оор 16-аас 47-р байранд орсон 31 улсын аварга баг дээр дээрх 3 баг нэмэгдээд 34 баг үхэх сэхэхээ үзнэ. Мөн 2 тоглолтоос 17 ялагч нь дараагийн шат руу орох ёстой.

3-р шат. Эдгээр 17 баг дээр УЕФА коэф-ын 13-15 байранд байгаа 3 улсын аваргууд нэмэгдээд 20 баг энэ шатанд өрсөлдөнө. Ялсан 10 баг нь 4-р шат буюу плэй оффын шатанд орох эрхээ авч байгаа.

Плэй оффын шат. 3-р шатнаас эрхээ авсан 10 баг хос хосоороо гэрийн ба айлын тоглолт хийгээд ялсан 5 баг нь саад бартаа ихтэй урт удаан аяллын дараа ингэж арайхийн нэг юм эрхээ авах юм.

Одоо нөгөө замыг нь тайлбарлая. Энэ зам ч гэсэн нэрнээсээ л юун тухай яриад байгаагаа илтгэж байгаа. Гэхдээ нөгөө замаасаа ялгаатай нь 1 ба 2-р шат гэж үгүй. Шууд 3-р шатнаас эхлэх юм. Эхлэх хугацаа нь Аваргуудын замын 3-р шатны эхлэх хугацаатай давхцаж байгаа. 3-р шатанд өрсөлдөх 10 багийг УЕФА коэф-ын 6-р байранд жагсаж байгаа улсын лигийн өмнөх улирлынх нь 3-р байранд орсон баг толгойлж байгаа. Яг таг хэлбэл энэ баг нь болж таарч байгаа. улс коэф-ын жагсаалтад 6-р байранд орж байгаа. улсын 2008/09 улирлын лигт 3-р байранд орсон билээ. дээр нэмэгдээд УЕФА коэф-ын 7-15 байранд байгаа лигүүдийн дэд аваргууд орж ирнэ. Ингээд нийт 10 баг болж байгаа. 5 ялагч нь плэй оффын шатанд орох эрхтэй.

Байр эзлэлтийн замын плэй оффын шатанд дээрх 5 баг дээр нэмэгдээд дахин 5 баг орж ирж байгаа. Энэ 5 баг хаанаас ирэх вэ? Маш амархан. УЕФА-ын жагсаалтын эхний 3 байрт байгаа улсуудын лигийн 4-р байранд орсон багууд болон жагсаалтын 4 ба 5-р байранд байгаа улсуудын лигийн 3-р байр эзэлсэн 2 баг нь энэ 5 багийг бүрдүүлж байгаа. Ингээд нийт 10 баг гэрийн ба айлын тоглолт хийгээд ялагч 5 нь хэсгийн тоглолтод орох эрхээ авах юм. Энэ шат нь хэдий нөгөөхөө бодвол богино зам туулах мэт харагдаж байгаа ч Арсенал, Штуттгарт, Лион гэх мэт хатуу самрууд ихтэй зоо тул эрхээ авна гэдэг нэн хүнд.

Багууд аль ч замаар явсан бай 3-р шатны бүх 15 ялагдагч Европын лиг(хуучнаар УЕФА цом)-ийн урьдчилсан шатны плэй оффт орох бол 4-р шат буюу плэй оффын бүх 10 ялагдагч Европын лигийн хэсгийн тоглолтоос шууд орох эрхийг олж авч байгаа. Ингээд харахаар Бэкэнбауер нэгэнтээ УЕФА капыг Ялагдагсдын цом гэж байсан нь нүдээ олж хэлсэн мэт. Гэхдээ энд бид УЕФА кап биш Аваргуудын лиг ярих болохоор энэ хамаагүй. Аваргуудын лигийн хуваарьт энэ жил бас нэлээн өөрчлөлт гарч байгаа.

Өдийг хүртэл хасагдах шатны эхний тоглолтууд 2 долоо хоногт багтан явагддаг байлаа. Энэ улирлаас эхлэн шөвгийн 16 багийн тоглолт 4 долоо хоног дамнан явагдах болсон. Ингэснээр Монгол дахь үзэгчид лав дахин 2-4 шөнийн нойр алдах болжээ. Хуваарийн бас нэгэн өөрчлөлт нь энэ улирлаас эхлэн финалын тоглолт хагас сайн өдөр явагдах болсон байна.

За ингээд удахгүй сэтгэл хөдөлгөсөн сайхан тэмцээн маань эхэлнэ. Өмнөх жилүүдийнх шиг Английн лиг давамгайлах болов уу, Барселон анхны аваргаа хамгаалагч багаар тодорч чадах уу, шилдэг тоглогчдыг эгнээнээ нэгтгэсэн Реал уналтаасаа гарч чадах уу, нэлээдгүй наймаа хийсэн Байерн хэр тоглох бол,  эсвэл Сери А дахин хөл дээрээ зогсох уу, төвдөө маш хүчтэй болсон Юве яах бол гэсэн олон олон асуултын хариу биднийг хүлээж байна даа.