Голландын Роттердам хотод болж буй жудо бөхийн дэлхийн аварга шалгаруулах тэмцээний 2 дахь өдөр манай 3 тамирчин барилдсанаас 2 нь тэмцээнээ өндөрлөжээ.

Эрэгтэйчүүдийн 73 кг-ийн жинд ОУХМ С. Ням-Очир эхний тойрогт Мозамбикийн Эдсон Мадейраг цэвэр ялаад 2-р тойрогт ОХУ-ын Мансур Исаевт вазари үнэлгээгээр хожигдон тэмцээнээ дуусгалаа.

Эмэгтэйчүүдийн 52 кг-ийн жинд Мөнхбаатарын Бундмаа эхний тойрогт хийлээд, 2-р тойрогт ОХУ-ын бөх Наталиа Кузюутинаг, 3-р тойрогт Финляндын Иана Сундбергийг тус тус ялаад А хэсгийн аваргын төлөө Кубын бөх Янет Бермойд хожигдсон байна. М. Бундмаа шилдэг 8-д шалгарсан тул дагах барилдаан хийх бөгөөд Испаний Ана Карраскосаг ялвал хүрэл медалийн төлөө өрсөлдөх эрхтэй болох юм.

Эмэгтэйчүүдийн 57 кг-ийн жинд ОУХМ Түмэн-Одын  Баттөгс эхний тойрогт Израйлын Лираз Бен Мелечийг цэвэр, 2-р тойрогт Румыны Корина Каприориуг вазаригаар ялаад 3-р тойрогт Японы бөх Каори Мацумотод цэвэр ялагдсанаар тэмцээнээ өндөрлөжээ. Т. Баттөгс шилдэг 8-д үлдэж чадаагүй тул дагах барилдаан хийхгүй.

Дэлхийн аваргын 2 дахь өдрийн хувьд бид ОУХМ М. Бундмааг л шигшээ барилдаанд харах нь.