14 дэх удаагийн хөлбөмбөгийн үндэсний лигийн АШТ-ий хагас шигшээ тоглолт өчигдөр явагдлаа. Эхний тоглолт лигийн зургаан удаагийн аварга “Эрчим”, “Сэлэнгэ пресс” багуудын хооронд болов. Мөн өнөө жилийн лигт нэг ч хожигдол амсаагүй яваа “Хасын хүлгүүд”, “Боргио кап-2009”-ын аварга “Улаанбаатар” дээд сургуультай туллаа.

Сэлэнгэ пресс-Эрчим 0:1
Гоол: Э.Чинбаатар 7

Өнөө жил гол довтлогчдоо алдсан “Эрчим”-ийнхэн нэгдүгээр тойрогт үлбэгэр тоглож байсан ч аваргын буурь заан дараагийн шатанд шалгарсан. Тэд өнгөрсөн жилийн медальтнууд болох “Хоромхон”, “Хасын хүлгүүд” клубүүдтэй нэг хэсэгт орж өнөө жил үзүүлээгүй гарамгай тоглолтыг гарган хагас шигшээд үлдсэн билээ. Сүүлийн тоглолтуудад тэд ахлагч Б.Гарьдмагнай болон 18 настай хамгаалагч Т.Мөнхбаатар нарын гоолын ачаар шөвгийн дөрөвт үлдсэн. Тэдний эсрэг өнөө жил чамгүй хүчирхэгжсэн “Сэлэнгэ пресс” тоглолоо. “Сэлэнгэ пресс” өнгөрөгч долдугаар сарын 23-нд “Эрчим”-ийг 4:1-ээр бут ниргэхэд Г.Төгсбаяр хуучин багийнхаа эсрэг дубль хийсэн юм. Гэвч шийдвэрлэх тоглолтод “Сэлэнгэ пресс”-чүүд “Эрчим”-ийн эсрэг юу ч хийж чадсангүй. “Эрчим”-ийн хагас хамгаалагч Э.Чинбаатар нэгдүгээр үед тоглолтын цорын ганц гоолыг оруулсан. Тэрбээр мөн өнгөрсөн жилийн финалд дубль хийн багтаа лигийн зургаа дахь цомыг авчрахад чухал үүрэг гүйцэтгэж байв. Энэ удаа тэрбээр тоглолт эхлээд төдийлөн удаагүй байхад Б.Гарьдмагнайгийн дамжуулалтаар гоолдлоо. Ийнхүү “Эрчим” клуб ес дэх удаагаа хөлбөмбөгийн үндэсний лигийн аваргын төлөө шалгаран үлдлээ. Харин “Сэлэнгэ пресс” ээлжит удаагаа хагас шигшээд ялагдал хүлээв. Тэд өнгөрсөн жил болон 2007 онд “Ковбойс” нэрээр лигт оролцохдоо хоёуланд нь медалиас мултарч дөрөвдүгээр байр эзэлж байв. Энэ хар цувралаа тэд энэ удаад тасалж чадсангүй дахиад л хүрлийн төлөө тоглохоор боллоо.

Хасын хүлгүүд-Улаанбаатар ДС 0:2
Гоол: Н.Цэдэнбал 3, Б.Буман-Учрал 86

Лиг эхэлснээс хойш нэг ч хожигдол хүлээгээгүй цорын ганц баг “Хасын хүлгүүд” энэ удаа “Улаанбаатар” дээд сургуулийг барсангүй. Тэд өнөө жилийн “Боргио кап”-ын финалд торгуулийн цохилтоор дийлдэж байсан бол энэ удаад 2:0-ээр хожигдон хүрэл медалийн төлөө тоглохоор болов. Тоглолт эхлээд ердөө гурав дахь минут дээр “Улаанбаатар” дээд сургууль гоолдон тэргүүлж эхэлсэн. “Улаанбаатар” дээд сургуулийн багийн ахлагч П.Алтантулгыг бөмбөг дамжуулах үед хаалгач, хамгаалагчийн алдааг ашиглан Н.Цэдэнбал солгой хөлөөрөө гоол оруулав. Улмаар 86 дахь минутад хашир мастер Б.Буман-Учрал тоглолтын эцсийн цэгийг тавьснаар “Улаанбаатар” дээд сургууль үндэсний лигийн АШТ-ээс анх удаагаа медаль хүртэх нь тодорхой боллоо. Бүрэлдэхүүндээ эрс өөрчлөлт хийсэн тэд өнөө жил тогтмол тэргүүн байр эзэлсээр байна. Тэд залуучуудын УАШТ-ээс хойш оролцсон тэмцээн бүртээ тэргүүлж байгаа юм. Энэ удаад аварга авахад ганцхан даваа үлдлээ. Харин “Хасын хүлгүүд” өнгөрсөн жилийн нэгэн адил “Сэлэнгэ пресс”-тэй хүрэл медалийн төлөө тоглохоор болов.