Дөрвөн жил тутамд зохион байгуулагддаг Зүүн Азийн спортын наадам энэ оны 12 сард Хонг Конгод зохион байгуулагдах билээ. Зүүн Азийн орнуудын соёлын харилцаа болон бүс нутгийн эв санааг хөгжүүлэх зорилготой энэхүү наадам  эхлэхэд яг 100 хоног үлджээ.

Зохион байгуулагч Хонг Конгийн засаг захиргаа 100 хоног үлдсэнийг тохиолдуулан бамбарын ёслол, телевизийн шоу арга хэмжээг зохион байгууллаа. Энэхүү арга хэмжээнд БНХАУ, БНСУ, Макао, Монгол, Тайвань улсын төлөөлөгчид оролцсон байна. Энэхүү арга хэмжээг Хятад улс байгуулагдсаны 60 жилийн ойд зориулан зохион байгуулжээ.

Мөн 12 сарын 7-ны өдрийг Хонг Конгод “Монголын өдөр” болгохоор шийдсэн гэнэ.

Зүүн Азийн бүсийн БНСУ, Хонг Конг, БНХАУ, Тайвань, БНАСАУ, Япон, Макао, Монгол, Гуам гэсэн есөн улсын 3000 гаруй тамирчид 22 спортын төрлөөр, 232 багц медалийн төлөө “Be the Legend” буюу “Домог нь бол” уриан дор өрсөлдөцгөөх юм.