Солилцоо наймааны цонх хаагдахтай зэрэг шахуу хийгдсэн зарим солилцоог багууд баталгаажуулан мэдэгдэж байна. Астон Вилла баг Манчестер Ситигээс Ирланд хамгаалагч Ричард Данныг 6 сая фунтээр худалдаж авчээ.

Данн Ситид 9 улирлыг өнгөрөөсөн нэгэн бөгөөд Сити энэ зун Коло Туре, сая Лескотт зэрэг хамгаалагчдыг авсан нь уг солилцоог хийхэд хүргэсэн биз.

Данныг авахын өмнөхөн Вилла өөр нэг хамгаалагч, Уэлсийн шигшээ багийн Жеймс Коллинзийг 5 сая фунтээр аваад байв. Виллагийн хамгаалалтыг өнгөрсөн улиралд хийж байсан Мартин Лаурсен зодог тайлж, Зат Найт Болтоныг зорьсон болохоор Мартин О`Нейллд шинэ сонголт хийх шаардлага гарсан.

Вилла энэ зун ийн 40 сая фунтээр шинэ тоглогч худалдаж авлаа. Өмнө нь Стюарт Доунингийг 12 саяар, Стивен Уорнокийг 8 саяар, Фабиан Делфийг 6 саяар, Хабиб Бейг 3 саяар тус тус аваад байв.

Мөн Премьер лигийн Халл Сити шинэ довтлогчтой болжээ. Майкл Оуэн, Фрайзер Кемпбэлл болон Алваро Негредо нарыг авах гээд чадаагүй тэд өнгөрсөн улирлуудад Селтикт тоглож байсан Ян Веннегор оф Хесселинкийг үнэгүй өөрийн болгожээ.  30 настай Голланд тоглогч Халлд 29 дугаарын өмсгөл өмсөж тоглох нь.

Халлын эзэн Фил Даффен “Нэртэй сайн довтлогч авсан нь их чухал. Бидэнд чанартай бүрэлдэхүүн байгаа ч өнгөрсөн улиралд цөөн гоол хийсэн. Одоо бид маш авьяаслаг багтай болж байна” гэж Скай Спортст ярилцлага өгөхдөө хэлжээ.

Халл энэ зун Сандерландаас Пол МакШэйн, Ридингээс С. Хант, Сельта Вигогоос Камел Гилас, Сток Ситигээс Сейи Олофинжана зэрэг тоглогчдоор эгнээгээ тэлээд байгаа юм.