Та бидний сайн мэдэх шилдэг хамгаалагч, Сан Антониогийн довтлогч Брюс Боуэн 12 жил тоглосон NBA-ээсээ зодог тайлж өмсгөлөө хананд өлгөхөө зарлалаа.

38 настай тэр анх 1996-97 онд Майами Хит багт анхныхаа тоглолтоо хийсэн тэр жилээс хойш 12 жил өнгөрч, ахмад довтлогч маань нэгэн арван жилийн туршид Майами, Бостон, Филадельфи болон Сан Антонио багуудад тоглож үүнээс сүүлийн 8 жилд нь Сан Антониод тоглож, 6 жилд нь улиралд тоглосон бүх тоглолтондоо гараанд гарч байжээ. Түүний гол амжилт Сан Антониод өнгөрсөн бөгөөд ахмад довтлогч маань энд 3 аваргын бөгж зүүсэн билээ. Энэ хугацаанд мань эр дунджаар 6.1 оноо, 2.8 самбараас бөмбөг авч байжээ.

Ахмад довтлогч маань тэртээх 1995 онд анх Майами Хит багтай гэрээ байгуулаад 10 хүрэхгүй хоногт баг нь явуулж байсан бөгөөд 1997 онд 10 өдрийн гэрээ байгуулж, улмаар 7 сарын 25-нд нь Бостонтой шинэ гэрээ хийж, 3 жил тоглоод 76-тай гэрээ хийсэн байна. 2000 онд гурван баг оролцсон наймаанаас Чикагод очсон ч Буллс 2 хоногийн дараа түүнийг багаасаа хассан билээ.

2000 онд Майамид буцаж ирсэн ч зун нь Сан Антониотой гэрээлснээр түүний тоглосон сүүлчийн баг болсон юм.

2009 онд саяхан Фабрицио Оберто, Курт Томас нарын хамт Милуоки Бакс багт Ричард Жефферсоны наймаагаар ирсэн билээ.

Түүний гол нэрийн хуудас нь хамгаалалт байлаа, хэдийгээр бохир тоглолттой хэмээн шүүмжлүүлдэг ч тэр үнэхээр шилдэг хамгаалагч нарын нэг байв. Анх 2000-2001 онд Майамид байхдаа бүх Америкийн хоёрдугаар багт гурван жил дараалан нэрлэгдэж үүнээс хойш 5 жил тасралтгүй нэгдүгээр багт бичигдсэн юм.

Саяхан yahoo.com сүүлийн арван жилд тодорсон шилдэг арван хамгаалагчдын жагсаалтанд Б.Боуэн 3-т бичигдсэн билээ.

Билл Лэймбир, Рижжи Теус нар Минни-д

Саяхан Миннесотагийн ахлах дасгалжуулагчаар томилогдсон Лейкерсийн экс туслах Курт Рамбис өөрийн туслахуудаа нэрлэжээ. Үүнд 80-аад оны сүүл 90-ээд оны эхээр Детройтийн муу залуу хочоороо алдашсан Билл Лэймбир болон Сакраменто Кингс багийг дасгалжуулж байсан Рижжи Теус нар багтсан байна.

Сонирхолтой нь Курт Рамбис NBA-д тоглогч байхдаа Лос Анжелес Лейкерсийн хамт 2 жил дараалж аваргалахдаа сүүлийн жилд нь буюу 1987-88 оны улиралд Билл Лэймбир тэргүүтэй Детройтын муу залуусыг хожиж аваргалсан ч түүний дараагийн хоёр жилд нь Муу залуус тэргүүлсэн өрсөлдөгчид ажээ. Ийнхүү нэгэн цагт өрсөлдөгчид байсан хоёр өнөөдөр нэг зорилгын төлөө зүтгэх гэнэм.

Билл Лэймбир кареераа тоглогчийн хувьд өндөрлөснийхөө дараа 2002 оноос хойш WNBA буюу эмэгтэй сагсан бөмбөгийн Детройт Шок багийн дасгалжуулагч/ахлах менежерийн ажлаар ажиллаж сүүлийн 6 жилд 3 аваргын цом авчээ.

Мөн Рижжи Теус 106 тоглолтонд Сакраментог удирдаж байсан туршлагатай.

Рижжи Теус өөрөө тоглогч байхдаа 18.5 оноо, 6.3 дамжуулалтыг 13 улиралд дунджилж мөн 19,000 оноо, 6,000 оновчтой дамжуулалт хийсэн лигийн 7 тоглогчийн нэг гэнэ.