Өнөөдөр Нейсмитийн нэрэмжит сагсан бөмбөгийн “Алдарын танхим” шинэ гишүүдээ хүлээж авах улаан хивсний ёслол зохион байгууллаа.

Шинэ гишүүд дотор сагсан бөмбөгийн хаан хэмээн алдаршсан “нисдэг” Майкл Жордан, дамжуулалтын хаан Жон Стоктон, нэг багт хамгийн олон ялалт авсан Жерри Слоан, “Адмирал” Дэвид Робинсон мөн эмэгтэй оюутны сагсан бөмбөгийн дасгалжуулагч С. Вивиан Стрингер нар багтжээ.

Домог болсон Майкл Жордан бол ойлгомжтой. Чухам тэр л энэ алдрын танхимд орохгүй бол бүх зүйл утгаа алдана. Тэр оюутны лигийн аварга, Америкийн үндэсний лигийн аварга, олимпийн аварга цол хүртсэн түүхэн долоон тоглогчийн нэг, 14 удаа бүх ододын тоглолтонд оролцож, 10 удаа NBA-ийн Бүх Америкийн нэгдүгээр багт бичигдэж, 9 удаа хамгаалалтын нэгдүгээр багт орж, 6 удаа NBA-ийн аварга болж тухай бүрдээ үнэ цэнэтэй тоглогчоор шалгарч, 5 удаа улирлын үнэ цэнэтэй тоглогчоор тодорч, 3 удаа бүх ододын тэмцээний үнэ цэнэтэй тоглогч болж, 2 удаа олимпийн алтан медалиар энгэрээ мялааж байсан дахин давтагдашгүй аугаа тоглогч билээ.

Жон Стоктон бол бүх цаг үед хийсэн дамжуулалт, булаасан бөмбөгөөр NBA-г тэргүүлдэг тоглогч юм. 15806 дамжуулалт, 3265 бөмбөг таслалт 19 жил NBA – д данстай байхдаа үзүүлжээ. Мөн 92, 96 онуудад олимпийн аварга болж, 10 удаа бүх ододын тоглолтонд оролцож, 2 удаа финалд шалгарч байсан боловч Майкл Жордан тэргүүтэй Чикаго Буллсд хожигдож байв.

Жон Стоктон NBA – д 19 жил тоглогч байх ахуйдаа ердөө 22 тоглолт өнжсөн гайхалтай хүн юм.

Дэвид Робинсон 1995 онд улирлын үнэ цэнэтэй тоглогчоор шалгарч байсан, 1999, 2003 онд NBA-ийн аварга болж, 92, 96 онуудад олимпийн аварга болсон тоглогч. 10 удаа бүх ододын тоглолтонд оролцож, 1992 онд лигийн шилдэг хамгаалагчийн шагналыг хүртэж байсан юм. Тэр NBА-ээс гадна олон улсын тэмцээнд ч эх орноо төлөөлж маш сайн оролцдог байсан, 1986 оны Испанид болсон дэлхийн аварга шалгаруулах тэмцээнд түрүүлж, 88 оны Сөүлийн олимпод хүрэл медаль хүртэж 92, 96 онуудад түрүүлж байжээ.

88 оноос өдгөө хүртэл 21 жил Юта Жаззтай зууралдаж байгаа хүн бол дасгалжуулагч Жерри Слоан. Тэр зүгээр ч нэг дасгалжуулагч байсангүй, тоглогчийн хувьд ч маш сайн тоглогч байсан юм. 11 жил NBA д тоглогч байхдаа 2 бүх ододын тоглолтонд оролцож, 4 удаа хамгаалалтын нэгдүгээр багт нэрлэгдсэн билээ. Слоан хоёр дахь улиралдаа дундажаар 9.1 самбараас авдаг байсан бөгөөд зодог тайлах үедээ 7.4 самбар дунджилж байсан нь хамгаалагчийн хувьд маш өндөр үзүүлэлт билээ. Тэр Чикаго Буллс багийн дөрөвдахь хамгийн их оноо авсан тоглогч, мөн NBA-ийн бүх цаг үед хийсэн дундаж бөмбөг таслалтаар 10т явдаг билээ.

Тэр дасгалжуулагчийн гараагаа 1979 онд эхэлж Чикаго Буллс багийг дасгалжуулж 94 ялалт, 121 ялагдалаар гурван улирал ажиллаад халагдаж Юта Жаззын туслах дасгалжуулагчаар 1984 оноос эхэлж ажиллажээ. Ингээд 1988 онд албан ёсоор Юта Жаззын ахлах дасгалжуулагчаар ажиллах болж тэр үеээс хойш 21 жил Юта Жаззын ахлах дасгалжуулагч хийжээ. Тэр 6 дивизионы аварга, мөн хоёр удаа финалд гарч ирж байсан ч аваргалж чадаагүй юм. NBA д зөвхөн Пэт Рэйли, Фил Жаксон, Жерри Слоан нар л удирдсан багаа 10 ба түүнээс дээш жил 50 ялалт авчруулж байсан түүхтэй юм. 2004 онд Юта Жазз баг ПО-д орж чадаагүй амжилт нь түүнийг дасгалжуулагч болсноос хойших 16 жилд анх удаагаа ПО-д орж чадаагүй амжилт болсон билээ. Тэр нийт 1136 ялалт авч 747 тоглолт ялагдаж байв.

С.Вивиан Стрингер НСАА- д 813 ялалт авсан дасгалжуулагч, тэр 800 аас дээш ялалт авсан гуравдахь дасгалжуулагч юм. Тэр мөн 32 жил НСАА-д дасгалжуулагчийн ажилд зүтгэхдээ 3 өөр багийг шилдэг дөрөвт багтааж байжээ.