Буурал тивийн Итали орноо сонирхогчдын боксын дэлхийн аварга шалгаруулах 15 дахь удаагийн тэмцээн төгсөх шатандаа орж байна. Өнөөдөр хагас шигшээгийн тоглолтууд болж Монголчууд маань одоогийн байдлаар хоёр мөнгө, нэг хүрэл медальтай болоод байна. Маргааш финалын тоглолтууд явагдсанаар энэхүү Милан 2009 дэлхийн аварга шалгаруулах тэмцээн дуусах юм.

140 гаруй орны 588 боксчид оролцсон тус тэмцээнд 44 медалийн төлөө ур чадвар, ухаанаа уралдуулснаас өнөөдөр 22 боксчин финалд үлдээд байна.

Энэ удаагийн дэлхийн аваргад 22 орны боксчид медальд хүрсэн нь өмнөх дэлхийн аваргынхаас гурваар илүү байж рекорд тогтоожээ. Орос улс эдэн дотроос 8 медаль авсан тоогоор илүү гарчээ. Куба, Узбекистаны баг 4 медальтай удаалж буй бол Монголын баг 3 медальтайгаар Украйны хамт 4-р байрт бичигдэж байна.

Өнөөдөр МУГТ,  олимпийн мөнгөн медальт Пүрэвдоржийн Сэрдамба Хятадын алдарт тамирчин олимпийн аварга, дэлхийн хошой аварга Зоу Шиминг орлож ирсэн 23 настай Ли Жиажаог 11:7 оор буулгаж авсан. Эсрэг талд нь Оросын Давид Айрапетян Солонгосын Хан Жон Шинийг 9:1 харьцаагаар буюу илт илүүрхэж ялсан байна.

Ингэснээр алтын төлөө манай гавьяат маань Оросын боксчинтой маргааш тулалдахаар болжээ. Тоглолт Миланы цагаар өдрийн 14 цагт эхлэх бөгөөд энэ нь Монголын цагаар оройн 20 цаг гэсэн үг юм. Манай хүн хөх булангаас гарч тоглох юм байна. Оросын энэ залуу хоёр жилийн өмнөх Чикагийн дэлхийн аваргын эхний даваанд П.Сэрдамбатай таарч 34:7 оор уншиж байсан, гэвч тэр үеэ бодвол манай хүн илүү туршлагажсан, илүү сайжирсан бас сэтгэлзүйн хувьд ч гайхалтай сайн болсон. Мань Орос эхний даваанд Колумби, Турк, Эквадор, Испани, Солонгосын боксчдыг ялж финалд шалгарсан, одоо 25 настай, энэ сарын 26-нд 26 хүрэх юм байна.

Мөн 51 кг-ийн жинд битүү морь болон тодорч хэний ч таамаглаагүй амжилтыг манай тамирчин Нямбаярын Төгсцогт үзүүллээ. Тэр эхний даваанд Энэтхэгийг ялж улмаар Словак, Ирланд, эзэн орны олимп, дэлхийн хүрэл медальт Италийн Пикарди нарыг хожиж шуугиулсаар хагас шигшээд шалгарсан. Мөнгөн медалийн төлөө Оросын боксчин 21 настай, дэлхийн цомын аварга Миша Алояныг ялж аваргын төлөө тоглох эрх авав. Тоглолт итгэмээргүй болж сүүлийн 15 секунд хүртэл манай тамирчин ялагдаж байлаа. Шүүгч хэтэрхий зугтаж, дүрмийн бус тоглолт үзүүлж зууралдаж байсан Миша Алояныг 2 оноогоор торгосноор манай тамирчин онооны давуутай болж ялалтыг авсан билээ.

Одоо финалд Пуэрто Рикогийн боксчин МкУилльямс Арроёотой тоглоно. Энэ тамирчин тийм ч хоосон эр биш. Хоёр жилийн өмнө болсон дэлхийн аварга шалгаруулах тэмцээнд медалиас атгаад алдаж тавдугаар байр эзэлсэн. Мөн Бээжингийн олимпод тавдугаар байр эзэлж байжээ. Энэ тэмцээнд эхний тойрогт хийлж дараа нь Солонгос, Унгар хоёрыг хүнд цохилтоор ялж олимпоор ялагдаж байсан Кубаг 6:2 оор ялсан. Мөнгөн медалийн төлөө Германы Ронни Бебликийг ялсан 24 настай залуу юм байна.

Тэдний тулаан П.Сэрдамбын дараа явагдах бөгөөд манай тамирчин улаан булангаас тоглох юм байна.

Манай ахмад тамирчин Уранчимэгийн Мөнх-Эрдэнэ Иглесиас Сотолонго Даниелд 6:4 өөр хожигдож хүрэл медаль дээр буужээ. Боксын отгон гавьяатын маань олон жилийн хөдөлмөрийн үр шим ийнхүү гарч байна. Дараа дараагийн тэмцээнд нь амжилт хүсье. Тэр мөнгийн дайтай, алтын дайтай хүрэл медаль хүртлээ.

За ингээд Монголын хоёр боксчиддоо амжилт хүсье. 35 жилийн түүхтэй дэлхийн аварга шалгаруулах тэмцээнд Монголчууд анх удаагаа 3 медаль авч үзсэн бол анх удаагаа 2 тамирчин финалд үлдэхийг харлаа. Маргааш бид анхныхаа дэлхийн аваргыг харна гэдэгт итгэлтэй байна.

Монголын алтан соёмбот далбаа Миланы тэнгэрт намирах нь тодорхой болсон. Одоо төрийн дууллаа сонсох хувь тохиох болтугай.