Есдүгээр сарын 30-нд Туркийн Анталья хотноо туялзуур сэлэмний ДАШТ эхэллээ. Олимпийн наадмын хөтөлбөрт анхны олимп “Афин-1896”-гаас эхлэн багтаж, бүх наадамд орсон цөөн спортын нэг туялзуур сэлмээр 1937 оноос дэлхийн аваргуудыг тодруулж буй юм. Монгол хүн анх удаа дэлхийн тавцанд “цавчилцах” болсноороо энэ удаагийн ДАШТ онцлогтой. Германд суралцдаг Батсуурийн Баттөмөр гэдэг залуу “foil” төрөлд өрсөлдөх ба энэ дасгалд 113 туялзуур сэлэмч зэвсгээ агсан бэлэн болоод байна. Урьдчилсан шатанд тамирчид 17 хэсэгт хуваагдахад Б.Баттөмөр хоёрдугаар группт Шведийн Филип Хеденског, Германы Андре Весселс, ӨАБНУ-ын Жак Вилоен, БНСУ-ын Квак Ли-Хюк, Израилийн Маор Хатоэль, Данийн Фредерик фон де Остен нартай хуваарилагдлаа. ДАШТ-ий өмнө манай тамирчин хамтарсан бэлтгэл хийхэд нэг хэсэгт орсон Өмнөд Африк, Өмнөд Солонгосын сэлэмчидтэй тулаан хийгээд амжжээ. Фойл дасгал нь тамирчны хоолой, их бие рүү довтолж оноо авдгаараа онцлогтой юм. “Анталья-2009” ДАШТ аравдугаар сарын 8-нд өндөрлөнө.

Манай тамирчныг ДАШТ-д оролцоход Арлын Японд эх орныхоо нэрийг мандуулж яваа ёкозуна Хакухо М.Даваажаргал, спортод элэгтэй Б.Нармандах нар гүн туслалцаа үзүүлжээ.