Олон улсын олимпийн хорооны 121-р хуралдаан, Олимпийн XIII чуулган өнөөдөр Данийн Копенгагенд эхэлж байна. Хуралдааныг чимж буй гол үйл явдал нь 2016 оны зуны олимпийн XXXI наадмын хотыг тодруулах мөч билээ. ОУОХ-ны гишүүд нэр дэвшсэн дөрвөн хотын төлөө нууц санал өгснөөр асуудал шуударна. Аравдугаар сарын 2-ны 18.30 цагт (Улаанбаатарын 00:30) ОУОХ-ны ерөнхийлөгч Жак Рогге Копенгагений “Bella Center”-ийн их танхимаас ялагч хотын нэрийг дэлхий нийтэд зарлах аж.
Одоогоор АНУ-ын Чикаго, Японы Токио, Бразилийн  Рио-де-Жанейро, Испанийн Мадрид хот сүүлчийн шатанд өрсөлдөж буй бөгөөд тэдгээрийг лоббидохоор тухайн орны төр засгийн тэргүүнүүд, спортын алдартнууд нь Данийн нийслэлд очоод байна. Чухамдаа тэнд оддын чуулган болов уу гэлтэй. Монгол Улсаас ОУОХ-ны хүндэт гишүүн Ш.Магван, МҮОХ-ны ерөнхийлөгч, доктор Д.Загдсүрэн, ерөнхий нарийн бичгийн дарга Ж.Отгонцагаан нар уг чуулганд оролцож байгаа юм.
Аравдугаар сарын 3-5-нд Олимпийн XIII чуулган хуралдаад 6-нд ОУОХ-ны 121-р хуралдаан үргэлжилж, гольф, регби-7, эмэгтэй боксыг олимпийн хөтөлбөрт багтаах талаар албан ёсны шийдвэрийг гаргана.