ПЛ-ийн 8-р тойргийн тоглолтууд үргэлжлэн явагдлаа. ПЛ-ийн энэ тойргийн төдийгүй Европын энэ долоо хоногийн хамгийн том тоглолт Стэмфорд Бриж цэнгэлдэхэд Челси – Ливерпуль багуудын хооронд болов.

Челси өмнөх тойрогт Уиганд 3:1-ээр хожигдож, үндсэн хаалгач Петр Чехээ алдсан байсан бол Ливерпуль өмнөх тойрогт Халлыг 6:1-ээр бут ниргээд байлаа. Гэхдээ долоо хоногийн дундуур Аваргуудын лигт Челси хожиж, Ливерпуль хожигдсон байсан.

Багуудын бүрэлдэхүүний хувьд Челси төвдөө 4 төвийн хамгаалагч буюу Эссьен, Лампард, Баллак, Декугээ зэрэг гаргасан нь сонирхол татаж байсан. Мөн Боссингваг Иванович, Чехийг Илариу орложээ. Ливерпулийн хувьд Жеррардыг урагшлуулж, төвдөө Машерано, Лукас нарыг гаргаж, Бенаюнийг сэлгээнд үлдээсэн байсан. Эндээс Челси талбайн төвд илүү тоглох гэсэн, Ливерпуль хамгаалалтаа нэлээд анхаарсан байдалтай харагдаж байсан.

Эхний үед Челси яльгүй илүү байж, өрсөлдөгчөө бодвол арай олон аюултай довтолгоо хийсэн ч гоол хийж чадаагүй, 0:0-ээр дууссан.

2-р үе ч эхнийхтэйгээ ойролцоо үргэлжилж байсан. Харин 60 дахь минутанд Машерано талбайн төвд бөмбөгөө нухаж байгаад алдахад Эссьен Декуд, Деку Дрогбад дамжуулж, Дрогба хөндлөн дамжуулалт хийснийг Анелька алдалгүй цохиж, Челси тэргүүлж эхэлсэн. Анелькагийн хувьд улирал эхлээд 5 дахь гоолоо хийсэн нь энэ. Энэ гоолын буруутан нь яах аргагүй Машерано.

Гоол хийсэн Челси ерөнхийдөө тоглолтыг хянаж, давуу байдлаа хадгалсан тоглолтыг тоглолт өндөрлөтөл үзүүлж чадсан болно. Ливерпуль тоог тэнцүүлэх нь бүү хэл дахиад нэгийг алдсан. Шүүгчийн мэдлийн цагт Дрогба Каррагерийг аргалаад Малудад оновчтой дамжуулалт өгч, Франц хагас хамгаалагч тоглолтын 2 дахь гоолыг хийсэн. Ингээд Челси ПЛ-ийг дахин тэргүүлж эхлэв. Талбай дээрээ Ливерпулээс хавьгүй илүү тоглож хожлоо. Анчелоттигийн тактик амжилттай хэрэгжиж, ПЛ-ийн мэргэн бууч Ф. Торрес болон Ливерпулын ахлагч Стивен Жеррард нарыг юу ч хийлгэсэнгүй.

Энэ тойргийн хамгийн гол тоглолт нь Челси-Ливерпуль байсан бол хамгийн үзүүштэй тоглолт нь Арсенал – Блекбэрн байв. Эмирайтс цэнгэлдэхэд зочилсон Сэм Аллердайсийн баг арагшаа шигдэж хамгаалахыг илүүд үзсэнгүй, зоригтой тоглолоо. Гэвч энэ зориг нь тэднийг 6:2-оор хожигдоход хүргэсэн юм.

Зочид ердөө 4 дэх минутанд л гоолдож дөнгөснөөр залуу хаалгач Вито Маннонегийн 359 минут хаалгаа хоосон манасан амжилтыг тасалдуулсан юм. Гэхдээ  хариуг нь Арсеналын шинэ хамгаалагч Вармилен 16 дахь минутанд барьж, тэнцүүлсэн. Тэрээр Аршавин, Фабрегас нарын эхлүүлсэн довтолгооныг гүйцээн, зүүн хөлөөрөө хүчтэй цохиж гоол хийсэн юм.  Бельги хамгаалагч улирал эхэлснээс хойш хэдэн ч гоол хийчихэв дээ?

Гэхдээ зочид удаагүй дахиад тоогоор илүү гарсан. Дэвид Данн сөрөг довтолгоонд ороод цохилт гүйцэтгэсэн нь Галласын биенд чиглэлээ өөрчлөн Арсеналын хаалганд орсон. Гэвч энэ тэргүүлэл ердөө удсангүй. Арсеналын ахлагч энэ удаа дэд ахлагчдаа оновчтой дамжуулалт өгч, Голланд довтлогч тоог тэнцүүллээ.

Эхний үе 4 гоолтой ийн өндөрлөсөн. Харин 2-р үед ч 4 гоол орлоо. Гэхдээ энэ гоолуудыг бүгдийг нь Арсенал хийсэн. 2-р үе дөнгөж эхлээд Блекбэрнд шүүгч торгуулийн цохилтын эрх өгсөн бол тоглолт арай өөр байж болох байсан байх, гэвч шүүгч Данныг унагаасан тоглолтонд пенальти заагаагүй.

Фабрегас эхлээд Аршавинд оновчтой дамжуулалт өгөөд тоо 3:2, дараа нь өөрөө гоёмсог цохилтоор тоог 4:2, удалгүй Тео Уолкоттод оновчтой дамжуулалт өгөөд тоо 5:2. Фабрегас үнэхээр супер тоглолтыг үзүүлсэн. 1 гоол хийж, 4 оновчтой дамжуулалт. Түүнийг одоо сэлгээнд суулгахаас яахав. Үлдсэн хугацаанд Бендтнер дахин нэг гоол хийж, залуу Арсенал талбай дээрээ Блекбэрнийг 6:2-оор хожлоо.

Вест Хэм энэ тойрогт талбай дээрээ Фулхэмийг хүлээн аван тоглож, эвийн гэрээ байгууллаа. Талбайн эздийг 90 дэх минутанд гоол хийсэн Станислас хожигдлоос аварсан. Гэхдээ шүүгчийн сүүлийн шүглийн дууны дараа Аптон Паркт цугласан хөгжөөн дэмжигчид багийнхаа амжилтанд сэтгэл дундуур байгаагаа илэрхийлж байлаа. Тэд эхний ПЛ-ийн эхний тойргоос хойш нэг ч хожил аваагүй явна.

Эвертоний 5 дараалсан хожлын цуврал тасалдлаа. Тэд талбайдаа Стоктой оноо хуваав. Долоо хоногийн дундуур Эвертон хаа хол Беларус зочилж хүнд тоглолт хийсэн. Өнөөдрийн тоглолт ч ерөнхийдөө хатуу ширүүн болсон. Эвертон, Сток аль аль нь дундаж амжилттайгаар ПЛ-ийн 10, 11-р байранд бичигдэж байна.

Маргааш Астон Вилла – Манчестер Ситигийн тоглолт болно. Энэ тоглолтонд Э. Адебайор тоглох бөгөөд ПЛ-ийн 9-р тойрог 2 долоо хоногийн дараа болно. Ирэх долоо хоногт ДАШТ-ийн урьдчилсан тоглолтуудтай.

Өнөөдөр болсон тоглолтуудын дүн:

“Челси” – “Ливерпуль” – 2:0 (0:0)

Гоол: Анелька, 60 – 1:0, Малуда, 90 – 2:0.
“Челси”: Илариу, Терри, Карвалью, Э. Коул, Иванович, Эссьен, Лэмпард, Баллак, Деку (Малуда, 76), Анелька, Дрогба.
“Ливерпуль”: Рейна, Каррагер, Шкртел, Инсуа (Аурелио, 83), Джонсон, Лукас (Бабель, 76), Маскерано, Риера (Бенаюн, 67), Кёйт, Джеррард, Торрес.
“Стэмфорд Бридж” (Лондон). 41 732 үзэгч.

“Арсенал” – “Блэкберн” – 6:2 (3:2)

Гоол: Нзонзи, 4 – 0:1, Вермален, 17 – 1:1, Данн, 30 – 1:2, ван Перси, 33 – 2:1, Аршавин, 37 – 3:2, Фабрегас, 57 – 4:2, Уолкотт, 75 – 5:2, Бендтнер, 89 – 6:2.
“Арсенал”: Манноне, Вермален, Галлас, Клиши, Санья, Сонг, Фабрегас (Рэмзи, 76), Диаби, Росицки (Уолкотт, 69), Аршавин (Бендтнер, 76), ван Перси.
“Блэкберн”: Робинсон, Шимбонда, Живэ, Ольссон, Якобсен, Нзонзи, Данн (Маккарти, 62; Хойлетт, 70), Эндрюс, Эмертон (Педерсен, 56), Диуф, Ди Санто.
“Эмирейтс” (Лондон). 59 431үзэгч

“Эвертон” – “Сток Сити” 1:1
Гоол: Хут, 49 (0:1), Осман, 55 (1:1).

“Вест Хэм” – “Фулхэм” 2:2
Гоол: К.Коул, 16 (1:0); Мерфи, 47, пен (1:1), Гера, 57 (1:2), Станислас, 90(2:2).

ПЛ-ийн явц

	баг	тт	хо	тэ	хд	Б-х	Оноо
1	Челси	8	7	0	1	18-6	21
2	Манчестер Юнайтед	8	6	1	1	19-8	19
3	Тоттенхэм Хотспурс	8	5	1	2	19-12	16
4	Арсенал	7	5	0	2	24-10	15
5	Ливерпуль	8	5	0	3	22-12	15
6	Манчестер Сити	6	5	0	1	14-7	15
7	Сандерленд	8	4	1	3	16-13	13
8	Астон Вилла	6	4	0	2	9-5	12
9	Бёрнли	8	4	0	4	7-16	12
10	Эвертон	7	3	1	3	9-11	10
11	Сток Сити	8	2	3	3	6-10	9
12	Уиган Атлетик	8	3	0	5	8-15	9
13	Болтон Уондерерс	7	2	2	3	10-11	8
14	Бирмингем Сити	8	2	1	5	5-8	7
15	Фулхэм	7	2	1	4	6-10	7
16	Блэкберн Роверс	7	2	1	4	8-15	7
17	Вулверхэмптон	8	2	1	5	7-14	7
18	Халл Сити	8	2	1	5	8-20	7
19	Вест Хэм Юнайтед	7	1	2	4	8-11	5
20	Портсмут	8	1	0	7	4-13	3