Манай ширэн бээлийтнүүд Италийн Милан хотыг есөн тамирчны бүрэлдэхүүнтэй дайлаар мордон иж бүрэн медальтай эх орондоо ирсэн билээ. Үүнээс Монголын багийн  хамгийн “нялх” боксчин, өнөө жилийн Азийн АШТ-ий хүрэл медальт Нямбаярын Төгсцогт жингийнхээ шилдгүүдийг ээлж дараалан буулгаж авсаар финалд шалгаран үлдсэн. Энэ амжилтаараа тэрбээр Монгол улсын хамгийн залуу гавьяат тамирчин болсон юм. Түүнтэй уулзаж дараах ярилцлагыг хийлээ.

-Юуны өмнө ДАШТ-ээс мөнгөн медаль хүртсэнд нийт уншигчдынхаа өмнөөс баяр хүргэе. Анх удаагаа ДАШТ-д оролцож медаль хүртлээ.
-Баярлалаа. Монголын ард түмэндээ “ТЦ” сониноор дамжуулан энэ өдрийн мэндийг хүргэе. Би ДАШТ-ий өмнө танай сониноор дамжуулан медаль хүртэх зорилготойгоо хэлж байсан. Энэ зорилгодоо хүрсэндээ маш их баяртай байгаа.
-ДАШТ-ий бэлтгэл хэрхэн хангагдав? Насанд хүрэгчдийн олон улсын хэд дэх тэмцээн байв?
-Олон улсын тав дахь тэмцээн байлаа. ДАШТ-ий бэлтгэл маш сайн хангагдсан. Бэлтгэл сайн хийсэн болохоор медаль хүртэхийн төлөө л тоглоно гэж бодож байлаа. А.Гантулга багш маань надад сэтгэлийн дэм өгч хурцалж өгсөн. Тиймээс өөрийгөө чадна гэдэгт итгэлтэй байлаа.
-ДАШТ-ий эхний учраа Азийн аварга Энэтхэгийн Суранжой Сингх байсан. Боксчид ямар ч тэмцээний эхний тоглолт эвгүй байдаг гэсэн. Таны хувьд ямар байв?
-Хятадад болсон Азийн АШТ-д түрүүлсэн Энэтхэгтэй таарсан. Эхний тулаан хэдий ч сэтгэл тайван байсан шүү. Яагаад ч юм рингэнд гарахын өмнө сэтгэлд багтаад байсан.
-Үндсэн цагт оноо тэнцэхэд хэр байв?
-Би энэ тоглолтод эхний үед 2:5-аар хожигдож байгаад хоёрдугаар үе дуусахад нэг оноо илүү болсон. Гэвч сүүлийн үед богино хугацаанд гурван оноо алдчихсан. Аль болох оноо авч дуусгах гэж үзсэн ч үндсэн цаг тэнцээгээр дууслаа. Тэгээд туслах оноогоор ялагчийг тодруулах болоход “blue” гэж англиар хэлэхийг сонсоод их баярласан.
-Тэмцээний өмнө өрсөлдөгчөө хэр судалсан бэ?
-Ер нь нэг их судалгаа хийгээгүй. Тоглолт бүрийн өмнө Д.Банди багшийн зөвлөснөөр тоглосон. Дараагийн хоёр даваандаа Словакийн Петер Сенкиг 12:7, Ирландын Деклан Герратийг 17:7-гоор хожсон. Эдгээр боксчидтой аль болох алдаа гаргахыг нь мэдэрч, оноо авч тоглосон.
-Хүрэл медалийн төлөө нутгийн эзэн орны боксчин, ДАШТ-д түрүүлнэ хэмээгдэж байсан В.Пикардитай таарсан. Тоглолтын өмнө юу бодож байв?
-Би ДАШТ-ээс заавал медаль хүртэнэ, цаашлаад түрүүлэх зорилготой байсан учраас хэнтэй ч таарсан хамаагүй хожно гэж бодож тоглосон. В.Пикардитай тоглохдоо зүүн тохойгоо хөшүүлчихсэн. Энэ нь дараагийн тоглолтод бага зэрэг нөлөөлсөн.
-ОХУ-ын М.Алоянтай маш сайхан тулалдаж ялсан. Энэ тоглолт дээр зүүн тохой хэр нөлөөлөв?
-Тохойгоо хөшүүлчихсэн болохоор урд гараараа тогтоогоод хойд гараар оноо авах тактик боловсруулж тоглосон. Оросын боксчин хурдтай, зугтаагаад байдаг эвгүй нөхөр байна лээ. 2:6-аар хожигдож байгаад 8:7-гоор дуусгасан. Хэдийгээр хожигдож байсан ч оноогоо нөхнө гэсэн тооцоотой тоглосон. Тэгсэн өрсөлдөгч маань зугтаагаад зууралдсаар торгуулсан.
-ДАШТ-ий мөнгөн медалийн болзол хангаад аваргын төлөө тоглохын өмнө юу бодогдож байв? Өмнөх оройдоо сайн унтаж чадсан уу?
-Сэтгэл гэгэлзээд өмнөх өдөр нь нилээд оройтож унтсан. Тэгэхдээ нэгэнт финалын тоглолт болоод өнгөрчихсөн хойно яахав. Би залуу хүн, надад цаашаа олон тэмцээн бий. Тэдгээр тэмцээнүүдийнхээ нэгэнд энэ боксчинтой дахин таарч тоглох байлгүй.
-Ер нь ДАШТ-д оролцоход хичнээн кг-ийн жин хасав?
-Дөрвөн кг хассан.
-Энэ олон өдрүүдэд жингээ барих амаргүй байсан биз?
-Өмнө нь би ингэж арав гаруй хоног үргэлжилсэн тэмцээнд  оролцож байгаагүй. Өнөө жилийн Азийн АШТ-д оролцохдоо л хамгийн олон хоног жингээ барьсан.
-Монголын спортын түүхэнд  хамгийн залуу гавьяат тамирчин болсон. Цаашдын зорилт юу вэ?
-Цаашид цолоо улам ахиулна. Би 17 нас, хоёр сартайдаа ДАШТ-ээс медаль авсан. Харин Азийн аваргаас хүрэл авахдаа 17 хүрээгүй байсан.
-ДАШТ-ээс хойш бэлтгэлдээ хэзээнээс гарав? Ямар тэмцээнүүдэд оролцохоор төлөвлөж байна?
-Бэлтгэлдээ ороод хоёр долоо хонож байна. Аравдугаар сарын 16-18-нд нийслэлийн 370 жилийн ойн нэрэмжит залуучуудын олон улсын тэмцээн байгаа. Мөн арванхоёрдугаар сарын 15-19-нд Олон улсын сонирхогчийн боксын холбооны ерөнхийлөгчийн нэрэмжит өндөр шагналтай тэмцээн Азербайжаны Бакуд болно. Энэ хоёр тэмцээнд оролцох байх.