Есдүгээр сарын 30-наас аравдугаар сарын 8-нд Туркийн Анталья хотноо туялзуур сэлэмний ДАШТ болж, манай улсаас анх удаа тамирчнаа өрсөлдүүллээ.  Германы Хамбургт суралцахын зэрэгцээ энэ спортоор хичээллэдэг Батсуурийн Баттөмөр туялзуур сэлэмний “foil” дасгалд оролцсон юм. Монгол Улсад шинэ тутам хөгжиж буй спортоор шинэ хуудас нээж, анхдагч болсон түүнээс ДАШТ-д хэрхэн оролцсон талаар нь сонирхсон юм.

-Туялзуур сэлэмний ДАШТ-д оролцсон анх­ны монгол тамирчин нь та боллоо. Энэ талаар сэтгэгдлийг тань сонсъё?

-Монголд хөгжих эх суу­риа дөнгөж тавьсан спор­тын энэ төрлөөр анхлан хичээллэж, улмаар ДАШТ-д оролцсондоо сэтгэл өн­дөр байгаа. Энэ удаа өөрийн түвшинг тогтоож, туршлага хуримтлуулах зорилт тавьсан.

-Хэдэн тулаан хийв? Өрсөлдөгчдийнхөө талаар?

-Foil-ын эрэгтэйчүүдийн төрөлд 129 тамирчин 17 хэсэгт хуваагдахад би хоёрдугаар группт Швед, Герман, ӨАБНУ, БНСУ, Израиль, Данийн сэлэм­чид­тэй орсон. Хараахан хо­жил авч амжаагүй ч ӨАБНУ-ын тамирчны эсрэг тулаанд анхны оноогоо авлаа. Жак Вилоен гэдэг тэр тамирчин дэлхийд чансаагаараа 48 дугаарт ордог юм билээ.

-Хувцас, хэрэглэ­лийн ялгаа хэр байв?

-Тэмцээний өмнө FIE-гийн “for Future of Fencing” сангийн тэргүүн Виталий Логвин зуучилж, “Prieur” фирмийн ерөнхийлөгч Фе­дерико Фавиотой  уулзуулж өгсөн. Тэр хүн надад 1300 еврогийн үнэтэй иж бүрэн хувцас, хэрэглэл бэлэглэ­лээ. Хэрвээ “Prieur”-ийн ерөнхийлөгч хувцас өгөөгүй бол ДАШТ-д оролцож ча­дах­гүй байсан. 1600 нью­тоны даралтыг даах чанар­тай өмсгөлтэй байж орол­цох эрхээ баталгаажуулдаг юм байна.

-Та энэ спортоор хи­чээллээд удаж байна уу?

-Би Хамбургийн ИС-д мехатроникийн инженерийн мэргэжлээр суралцдаг. Туялзуур сэлмийн бэлтгэ­лийг хараад гоё санагдаж, секцэнд бүртгүүлж байлаа. Германы иргэн болсон иран багшийн удирдлагад хоёр жил хичээллэж байна. Бэлтгэл хийх гэж прокат­наас хувцас авах юм уу, хүнээс өмсгөлийг нь гуйдаг байсан. Одоо өөрийн хув­цастай болсон, бэлтгэлээ сайн хийнэ ээ.

-Герман руу сур­гуульд явахаасаа өмнө спортын өөр төрлөөр хичээллэж байсан уу?

-Би 1985 онд Улаан­баатарт төрж, I сургуулийг төгссөн. Дунд сургуульд сагсан бөмбөгөөр хичээл­лэж, өсвөр үеийн УАШТ, хүүхдийн спортын наадамд түрүүлж байсан.

-Германд туялзуур сэлэмний тэмцээнд ордог уу?

-Хотын хэмжээнд бол­дог жижиг тэмцээнүүдэд үзэлцэнэ ээ. Нэг удаа III байрт шалгарч байсан. Хам­бургтээ чансааны оноо­той. Цаашид улам олон тэмцээнд оролцож, муж, улсын рейтингтэй болох зорилго тавьж байна.

-Ойрын хугацаанд эх орноо төлөөлөн орол­цох өөр тэмцээн байна уу?

-Арваннэгдүгээр сарын 10-18-нд Катарт Азийн АШТ болно. Үүнд оролцох төлөв­лөгөөтэй. Азид БНХАУ, Япон, БНСУ-ын сэлэмчид тэргүүлдэг  юм билээ. Сүүлийн үед Арабын орнууд гадны шилдэг дас­галжуулагчдыг авч ажил­луу­лан эрчтэй хөгжүүлж байгаа гэсэн.

-Ярилцсанд баярла­лаа. Амжилт хүсье.

-Энэ дашрамд ДАШТ-д оролцоход тусалж дэмж­сэн “НАБД” компанийн захирал Б.Нармандах ах, мэргэжлийн сүмогийн ёко­зүна Хакүхо М.Даваа­жаргал нарт талархал илэрхийлье.

Туялзуур сэлэмний ДАШТ-ий медальтнууд

Foil

Эр. Ганцаарчилсан: 1.Андреа Балдини (Итали) 2.Жу Жунь (БНХАУ) 3.Питер Йоппич (Герман), Артем Седов (ОХУ)

Баг: 1.Итали 2.Герман 3.ОХУ

Эм. Ганцаарчилсан: 1.Айда Шанаева (ОХУ) 2.Жён Хи-Сүк (БНСУ) 3.Ариан­на Эрриго (Итали), Элиса ди Франчиска (хоёул Итали)

Баг: 1.Итали 2.ОХУ 3.Герман

Epee

Эр. Ганцаарчилсан: 1.Антон Авдеев (ОХУ) 2.Маттео Тальяриол (Итали) 3.Хосе Луис Абахо (Испани), Жером Жаннет (Франц)

Баг: 1.Франц 2.Унгар 3.Польш

Эм. Ганцаарчилсан: 1.Любовь Шутова (ОХУ) 2.Шеррайн Шальм (Канад) 3.Сонья Тол (Голланд), Анфиса Почкалова (Украин)

Баг:

Sabre

Эр. Ганцаарчилсан: 1.Николас Лимбах (Герман) 2.Рарес Думитреску (Ру­мын) 3.Тамаш Деши (Унгар), Луижи Тарантино (Итали)

Баг:

Эм. Ганцаарчилсан: 1.Мариэл Загунис (АНУ) 2.Ольга Харлан (Украин) 3.Карол Верне (Франц), Орсоля Нагы (Унгар)

Баг: 1.Украин 2.Франц 3.БНХАУ

Туялзуур сэлэмний анхны монгол тулаанч, 10.0 out of 10 based on 1 rating