Грег Оден ирэх улирлын зорилгоо тодорхойлохдоо Бүх оддын тоглолтонд оролцох гэж хэлээд байгаа. Бүх оддын тоглолтонд оролцохын тулд маш сайн тоглох хэрэгтэй. Олон хүн Оденийг хоосон амалж байна гэж байгаа байх. 2 улирал дараалан бусдын итгэлийг хөсөрдүүлсэн болохоор аргагүй биз.  Портлэндийн фэн Захариан Блотт гэгч  Оденийг ирэх улирлын Бүх оддын тоглолтонд оролцох 5 шалтгааныг нэрлэсэн байна. Ямар шалтгаанууд байгаа бол?

1) Оден маш сайн тоглож эхлэхээр зэхэж байна, түүнд ийм нөөц бололцоо бий

Өнгөрсөн жил НБА-д анх удаагаа хөл тавьсан тэрээр дунджаар 21 минут тоглосон. Гэхдээ нөгөөх гэмтэл нь мөн л тоглуулаагүй шахуу. Дээр нь маш их хувийн алдаа хийж байсан нь туршлагагүйн шинж. Уг нь бол Оден самбараас бөмбөг авалтаараа Данканаас ч илүү. Өөрөөр хэлбэл Оден 3.10 минутанд 1 удаа самбараас авалт хийдэг бол Данкан 3.14 минутанд 1 удаа самбараас авдаг. Мөн 56 хувийн оновчтой довтолдог. Энэ нь 1 шидэлтээрээ 1.53 оноо дунджаар авдаг гэсэн үг. Газоль (57%-тай довтолж, 1 шидэлтээрээ дунджаар 1.47 оноо авдаг), Данкан (50%, 1.30), Крис Бош (49%, 1.38) болон Дуайт Ховард (57%, 1.66) зэрэг лигийн топ тоглогчдын үзүүлэлттэй адилхан гэсэн үг. Одений багтаа гүйцэтгэх үүрэг, ур чадвар нэмэгдэхийн хэрээр дундаж 8 оноо нь нэмэгдэх нь гарцаагүй.

Өнгөрсөн жилтэй харьцуулвал Оден энэ улиралд мэдэгдэхүйц сайжирсан байх. Учир нь тэрээр зун АНУ-ын шигшээ багийн бэлтгэлд хамрагдаж, өөрийгөө тун сайн хөгжүүлсэн гэж байгаа. Мөн бусад тоглогчид шиг амралгүй зуны турш Блэзерсийн туслах дасгалжуулагч Билл Байнотой ажилласан. Үүний үр дүнг Портлэндийн улирлын өмнөх хяналтын 3 тоглолтоос багахан ч гэсэн харж болохоор. Оден дунджаар 52 хувьтай довтолж, 15.3 оноо, 9.7 самбараас авалтыг 24 минутанд хийж. Мөн торгуулийн шидэлтээ тун сайн шидэж байсан. Хэдий хяналтын тоглолтыг улирлынхтай харьцуулж болохгүй ч Оден тун дажгүй харагдаж байна лээ.

2) Оден бол олны танил, нийтэд түгсэн тоглогч.

Одений нэр Америкт аль эртнээс л яригдаж эхэлсэн. Ахлах сургуулийн 2 дахь жилд байхад нь түүнийг НБА-д тоглодоггүй шилдэг төвийн тоглогчоор нэрлэж байсан удаатай. ИСПН-ээр түүний тоглолтыг ахлах сургуулийн эхний жилдээ тоглож байхад нь гаргаж байж. Одений коллеж үндэсний аварга шалгаруулах тэмцээний шигшээ тоглолтонд шалгарч тоглоход тэрээр 25 оноо, 12 самбар, 4 блок хийн шагшигджээ. Эхний 2 нь тоглолтын хамгийн өндөр үзүүлэлт бол 4 блок нь бүр ч лаг. Бусад бүх тоглогч нар нийлээд 4 блок хийгээгүй байв. Аваргын төлөө энэ тоглолтонд Жоаким Ноа, Ал Хорфорд, Кори Брьюр нар Одений эсрэг багт тоглож байж. Эхний 2 нь өнгөрсөн улирлын плей-оффт өөрсдийн багийнхаа гарааны бүрэлдэхүүнд тоглосон тоглогч нар.  Бүх Америкийн 1-р багт нэрлэгдээд, дараа нь драфтын номер 1 болсон. Бүх л суваг, хэвлэл, сайтууд Одений тухай гаргаж байсан тул Америк даяар тэр танил. Бүх оддын тоглолтонд тоглох тоглогчийг санал асуулгаар тодруулдаг. Нене, Биедринс, Байнум, Окафор, Окур зэрэг тоглогчтой л Бүх оддын тоглолтын төвийн тоглогчийн эрхийн төлөө өрсөлдөнө.Тиймээс боломж байна.

3) Oден бол төвийн тоглогч. Оддын тоглолтонд оролцох боломжтой бусад олон том тоглогчдын үндсэн байрлал нь хүчний довтлогч.

Тим Данкан Спэрсийн төвийн тоглогчоор сүүлийн жилүүдэд тасралтгүй тоглож байгаа. Гэхдээ Бүх оддын тоглолтонд довтлогчоор оролцдог. Амаре Стаудмайр өнгөрсөн жил анх удаа гараанд гарахдаа довтлогчоор гарсан. Энэ улиралд Амаре багтаа төвийн тоглогчийн үүрэг гүйцэтгэх үү, довтлогчийн үүрэг гүйцэтгэх үү гэдэг нь тодорхой бусын дээр зарагдах магадлал ч байгаа, гэмтэх магадлал ч байгаа. Ер нь Амаре бол төвийн тоглогч биш. Лигт орсноосоо хойш нэг ч удаа улиралд дунджаар 10+ самбараас авалт хийж байгаагүй. Оден ирэх улиралд тэсэрвэл Стаудмайраас илүү санал авах боломжтой. Миннесотагийн Эл Жефферсон мөн л хүчний довтлогчоор тоглож, Кевин Лав төвийн тоглогч хийнэ.

Гэхдээ Данкан, Амаре, Жефферсон нарыг төвийн тоглогчийн категорт оруулаад өрсөлдүүлэхийг үгүйсгэхгүй ч Оденд тэднээс дутахгүй санал авах боломж байгаа.

4) Яо Мин болон Шакил O’Нил нарыг эзгүйчлэх боломжтой.

Яо Мин болон Шак нар Оденд энэ улиралд саад болохгүй. Шак Өрнөд бүсээс явж, Кавальерст очсон бол Яо Мин ирэх улиралд тоглохгүй ч байж магадгүй. Сайнаар бодоход улирлын дундаас л тоглож эхэлнэ. Яахав Хятадуудын 2 сая санал Яод ирээд, тэр гарааны төвийн тоглогчоор шалгарч магадгүй.  Гэхдээ том гэмтэлтэй хүн Бүх оддын тоглолтонд тоглож, ядрахыг хүсэхгүй биз. Харин ч Оддын тоглолтын үеэр сайн амарч авахыг бодох байх.

Яо, Шак нийлээд 22 удаа Оддын тоглолтонд оролцож байсан, эдгээр том залуусын үлдээсэн байрыг нөхөж болох хамгийн боломжтой тоглогчдын тоонд Оден багтаж байна.

5) Aндре Миллер төвийн тоглогчдыг яаж сайн тоглуулахаа, яаж ашиглахаа мэдэж байгаа..

Төвийн тоглогч, том довтлогчдын тоглолтонд холбон тоглогчийн үүрэг, нөлөө их байдаг. Андре Миллер бол лигийн туршлагатай, сайн холбогчдын нэг. Одений тоглолтонд эерэг нөлөө үзүүлнэ. Улирлын өмнөх хяналтын тоглолтуудад лав Миллер-Оден нар тун сайн хоршиж байсан.

Портлэнд залуу сайн баг боловч яг нийтэд нь авч үзвэл бас учир дутагдалтай. Брэндон Рой энэ багийн довтолгооны эхний сонголт.  Ройгийн тоглолт гарахгүй бол хэцүү болдог. Үүнийг бид өнгөрсөн улирлын плей-оффт харсан. Баттьер, Артист зэрэг мастерууд Ройг маш сайн хамгаалаад л Рокитс тэднийг хожчихсон.

Харин энэ улиралд байдал арай өөр. Тэд илүү олон талтай довтолгоонтой болж байгаа. Улирлын турш Оден гэмтэхгүй байвал багтаа довтолгоонд ч, хамгаалалтанд ч их хэрэг болно.

Дунджаар 15 оноо, 11 самбараас авалт, 2 блок хийхэд Одений зорилго биелнэ. Өөрөөр хэлбэл Оддын тоглолтонд уригдана.