Ла Лигийн Атлетико Мадрид клуб дасгалжуулагч Абел Ресиногоо ажлаас нь халснаа зарлалаа. Аваргуудын лигт Атлетико Челсид 0:4-өөр хожигдсоны дараа клубын удирдлага Ресиног халахаар шийдсэн байна.

Стэмфорд Брижэд хожигдсоноор А. Мадрид Аваргуудын лигийн D хэсэгт 3 тоглолтын дараа ердөө ганц оноотой үлдэж, шөвгийн 16-д шалгахар боломж нь үлэмж багассан. Аваргуудын лигээс гадна дотоотын лигтээ ч тун муу тоглож, 7 тоглолтын дараа ердөө ганц хожил аваад байгаа юм.

Ресино нь Атлетикод 2-р сард Хавьер Агиррег орлон ирж, өнгөрсөн улирлын сүүлд багаа муугүй удирдаж байв. Ла лигийн сүүлийн 9 тоглолтынхоо 8-д нь хожиж, 4-р байр эзлэн Аваргуудын лиг авч байсан.

Харин энэ улиралд Барселона, Осасунад бут ниргүүлж, талбай дээрээ Расинг, Алмериа болон Апоэльтэй тэнцсэн зэрэг базаахгүй тоглолтуудыг үзүүлж, хөгжөөн дэмжигчдээ гонсойлгож байлаа.

Ла Лигийн 9 удаагийн аваргууд одоогоор лигтээ 15-д бичигдэж, хаалгандаа хамгийн их буюу 17 гоол алджээ.

Атлетикогийн шинэ дасгалжуулагчид экс Рома Лучиано Спаллетти, Хетафег удирдаж байсан Михаэль Лаудруп нарын нэр яригдаж байна. Гэхдээ Спаллетти үүнийг үгүйсгэсэн.

Мөн одоогийн Малльоркагийн дасгалжуулагч Г. Манзано хуучин багтаа дахин ирэхээс татгалзахгүй гэнэ.

Одоо Атлетико Мадрид Реал Малльоркатай тоглоно.

update:

Ресиног халаад удалгүй түүнийг орлох хүнийг А. Мадрид зарлалаа. Валенси болон Бенфикаг удирдаж байсан К. Санчес Флорес нийслэлийн багийн дасгалжуулагч болж байгаа юм байна.