Ческ Фабрегас, Тони Кроос, Карлос Вела, Адриано гээд олон шилдэг тоглогчдийг төрүүлэн  гаргасан 17 хүртэлх насны дэлхийн аварга шалгаруулах тэмцээн Нигери улсад зохион байгуулагдаж байна. Энэ сарын 24-нд нээлтээ хийсэн 13 дахь удаагийн залуу оддын дэлхийн аваргад нийт 24 улсын баг 6 хэсэгт хуваагдан өрсөлдөж байгаа юм. F хэсэгт эртний өрсөлдөгч Итали, Өмнөд Солонгосын багууд багтсан. Өчигдөр энэ хоёр багуудын тоглолт Кадуна хотод 11 мянган үзэгчдийн өмнө явагдаж 2: 1-ээр Италичууд ялалт байгуулжээ. Гоолын салхийг 30 дахь минутад Солонгосчууд хагалсан ч Кампересе, Леммело нар хоёр гоол оруулж багтаа ялалтыг авчирсан юм. Энэ хэсгийг Италичууд 6 оноотой тэргүүлж  Солонгос, Уругвайн багууд 6 оноотой удаалж байна.  E хэсэгт Арабын нэгдсэн Эмират улс Испаний хөвгүүдтэй ширүүхэн тулааныг хийлээ. Ерөнхий шүүгч Уолфганг Штарк тоглолтыг эхлүүлээд ердөө 20 минутын дотор Ялагдашгүй Армадачууд хоёр ч гоол оруулаад амжсан. Үүний дараа 68 дахь минутад Себил нэг гоол оруулж тооны харьцааг ойртуулсан ч 88 дахь минутад испаничууд дахин нэг гоол оруулснаар 3 оноо хэнд очих нь тодорхой болсон юм. Энэ хэсгийг Испаний хөвгүүд 6 оноотой хошуучилж байгаа бөгөөд Арабын нэгдсэн Эмират, Америкийн залуус 3 оноотой араас нь нэхэж байна. Хэсгийн сүүлийн тоглолт болох Америк- Арабын багуудын тоглолт анхаарлыг маш их татаж байна.

A хэсгийн мэдээллээс хүргэе. Бусад хэсгүүдээ бодвол хамаагүй эрт тоглолтуудаа дуусгасан энэ хэсгийн  плэй -оффт өрсөлдөх багуудын нэрс тодорсон. Хэсгийн сүүлийн тоглолт Аргентин – Нигерийн хооронд болж хэн нь нэгээр шалгарахын шийдсэн юм. 2 тойргийн дараах байдлаар 100 хувийн амжилттай явсан Жосе Луйс Брауны хөвгүүд дөнгөж 2 дахь минутаас л тоглолтыг тэргүүлж эхэлсэн. Орфаногийн оруулсан энэ гоолын баярыг тэмдэглэж дуусаагүй байтал Нигерийн гүргэр хөвгүүд тэнцээний бөмбөгийг Игнасио Аркегийн хаалганд оруулж чаджээ. Энэ жил 16 настай нутгийнхаа Делфинс багт тоглодог Омо Ожабугийн гоол тоглолтын салхийг нөгөө тийш нь эргүүлсэн юм. Үүнээс хойш хоёрдугаар үеийн дунд үе хүртэл аль аль нь гоол оруулж чадаагүй. Ингээд 72 дахь минутад мэргэжилтнүүдийн анхаарлыг нилээдгүй татаад байгаа Сани Эманүель хүүгийн гоол багтаа ялалт бас хэсгийн тэргүүн байрыг авчирсан юм. Энэ хэсгийн Герман, Гондурасын багууд улаан шугамны доор жагссан тул дахин боломж олдохгүй. Гэхдээ сайн үзүүлэлттэй 3-р байрын багуудыг дахин хэсэгт хуваарилдаг тул Германд бас нэг боломж байгаа. Одоогийн байдлаар шөвгийн 16-д шалгарах эрхээ Турк, Швэйцарь, Мексик, Аргентин, Нигерийн залуус аваад байна. Өнөөдөр үлдсэн азтануудын нэрс тодрох юм. Тэмцээний мэргэн буучдын жагсаалтыг Германы залуу авьяастан Леннарт Тай  3 гоолтой ганцаараа тэргүүлж байгаа юм.  17 хүртэлх насны дэлхийн аварга шалгаруулах тэмцээн 11 сарын 15-нд өндөрлөж ялагчдаа тодруулна.

А хэсэг

Баг	T/T	X	T	Хж	+	-	+/-	оноо
Нигер	3	2	1	0	6	4	+2	7
Аргентин	3	2	0	1	4	3	+1	6
Герман	3	1	1	1	7	6	+1	4
Гондурас	3	0	0	3	1	5	–4	0

***

Б хэсэг

Баг	T/T	X	T	Хж	+	-	+/-	оноо
Швейцарь	3	3	0	0	7	3	+4	9
Мексик	3	2	0	1	3	2	+1	6
Бразил	3	1	0	2	3	4	–1	3
Япон	3	0	0	3	5	9	–4	0

***

C хэсэг

Баг	T/T	X	T	Хж	+	-	+/-	оноо
Иран	2	1	1	0	2	0	+2	4
Колумби	2	1	1	0	2	1	+1	4
Недерланд	2	1	0	1	3	3	0	3
Гамби	2	0	0	2	1	4	–3	0

***

D хэсэг

Баг	T/T	X	T	Хж	+	-	+/-	оноо
Турк	2	2	0	0	5	1	+4	6
Шинэ Зеланд	2	0	2	0	2	2	0	2
Буркина Фасо	2	0	1	1	1	2	–1	1
Коста Рика	2	0	1	1	2	5	–3	1

***

E хэсэг

Баг	T/T	X	T	Хж	+	-	+/-	оноо
Испани	2	2	0	0	5	2	+3	6
АНЭ	2	1	0	1	3	3	0	3
АНУ	2	1	0	1	2	2	0	3
Малави	2	0	0	2	0	3	–3	0

***

F хэсэг

Баг	T/T	X	T	Хж	+	-	+/-	оноо
Итали	2	2	0	0	3	1	+2	6
Ө.Солонгос	2	1	0	1	4	3	+1	3
Уругвай	2	1	0	1	3	3	0	3
Алжир	2	0	0	2	0	3	–3	0