НБА-д 13 тоглолт боллоо. Өнгөрсөн жилийн Дорнод бүсийн аваргын төлөө шалгаран үлдэж байсан Орландо Мэжик – Кливленд Кавальерс багууд Мэжикийн талбайд тоглож, зочид хожлоо. ЛеБрон Жеймс болон Мо Уилльямс нар нийтдээ 43 довтолж, 25-ыг нь оновчтой болгон 64 оноо авсан бөгөөд улирлын тоглолтонд Орландод 3 дараалан хожигдоод байсан цувралаа зогсоов. Шак онцгой тоглолт гаргаагүй ч Дуайтыг тоглолтоос гаргах үүргээ биелүүлсэн. Дуайт эхний 3 минутанд л 2 алдаа гаргаж, улмаар хүссэн тоглолтоо гаргаж чадаагүй юм. Кавальерсийн дасгалжуулагч Майк Браун Шакийг нэг тоглолтонд ойролцоогоор 28-32 минут тоглуулсаар байх төлөвлөгөөтэй байгаа гэнэ. Иймэрхүү ачааллыг Шак дааж чадна гэж үзэж байгаа аж. Энэ 2 баг ирэх оны 2 сарын 11 хүртэл дахин таарч тоглохгүй.

“Орландо” – “Кливленд” – 93:102 (28:35, 23:31, 17:22, 25:14)

О: Картер – 29. Нельсон – 19. Ховард – 11.

К: Л.Жеймс – 36. Уильямс – 28. О Нил – 10.

Дэнни Грейнжер гэмтэлтэй байгаа Трой Мэрфиг орлон хүчний довтлогчийн байрлалд тоглож, 31 оноо, 16 самбараас авалт хийснээр багаа тэргүүлж, Пейсерс Голден Стэйтийг хожлоо. Пейсерс 3 дараалан хожигдсоны дараа 3 дараалан хожиж байна. Пейсерийн хувьд энэ жилийн хамгийн урт цуврал ялалт болж байгаа юм. Грейнжер энэ цуврал ялалтаа Бямба гаригт Бостон Селтиксээр үргэлжлүүлнэ гэж таамаглаж байгаа гэжээ.

“Индиана” – “Голден Стэйт” – 108:94 (32:28, 32:19, 20:23, 24:24)

И: Грэйнжер – 31 + 16 самбар. Уотсон – 16. Хибберт – 16 + 9 самбар.

Г: Маггетт – 21. Рэндольф – 17 + 13 самбар. Эллис – 16 + 9 самбар.

Өчигдөр Буллз Денверт азгүй гэмээр хожигдсон бол  өнөөдрийн хувьд Буллзд бичлэг удаашруулан үзэж нягтлах шаардлага байсангүй, 10 онооны зөрүүтэйгээр хожигдлоо. 3-р үеийн дараах байдлаар 1 оноогоор хожиж байсан тэд 4-р үед 1 ч оноо аваагүй 6 минут болсныг нь Рэпторс ашиглаж чаджээ. 2 баг 2-уул 4 хожил, 4 хожигдолтой болж байна.

Буллз ирэх Бямба гаригт Филадельфиг талбай дээрээ хүлээж авсныхаа дараа 12 сарын 2 хүртэл дандаа зочлон тоглолтууд хийх ажээ.

“Торонто” – “Чикаго” – 99:89 (27:25, 26:35, 24:18, 22:11)

Т: Бош – 28 + 11 самбар. Кальдерон – 18. Барньяни – 16.

Ч: Денг – 18 + 8 самбар. Гибсон – 18. Роуз – 14.

3-р үе дуусахад 3.8 секунд үлдсэн байхад Рондо өөрийн самбар дороос бөмбөгийг аваад залж гүйсээр цаг дуусахтай зэрэгцэн лэй-ап хийжээ. 40 ярд зайг 3.8 секундэд, бөмбөгтэй туулаад, тэгээд эсрэг баг нь мэдээж хамгаалж байгаа гэхээр Рондогийн хурд, ур чадвар ямархуу гэдэг нь харагдана. Нөгөө талаас Ютагийн хамгаалалт маш муу байжээ гэдэг нь ч мэдэгдэнэ. Рондогийн энэхүү довтолгоо амжилттай болсноор Бостон 22 оноогоор тэргүүлжээ. 4-р үед Жазз энэ оноог барих бүү хэл ойртуулж ч чадсангүй. Бостон улирлын 8 дахь хожлоо авсан бол Юта 5 дахь хожигдлоо хүлээж.

“Бостон” – “Юта” – 105:86 (28:23, 26:21, 30:18, 21:24)

Б: Гарнетт – 18. Аллен – 15. Рондо – 14 + 11 дамжуулалт.

Ю: Брюэр – 13.Уильямс – 13. Кириленко – 12.

Детройт Пистонс Бен Гордон, Чарли Вилланева гэсэн залуусыг энэ зун багтаа элсүүлж, чамгүй өндөр үнээр гэрээ хийсэн. Эдгээр тоглогчид үр ашгаа өгч байна. Өнөөдөр Шарлоттын эсрэг тэд нийт 52 оноо авч багаа тэргүүлснээр Пистонс улирлын 4 дэх хожлоо авлаа. Пистонсийн Рип Хэмилтон, Тэйшон Принц нар гэмтлийн улмаас тоглохгүй хэвээрээ байна. Шарлотт улирал эхэлснээс хойш айлын талбайд 4 тоглож, 4 хожигдлоо.

“Детройт” – “Шарлотт” – 98:75 (20:22, 32:19, 29:12, 17:22)

Д: Виллануэва – 30. Гордон – 22 + 8 дамжуулалт. Стаки – 16. Байнум – 16.

Ш: Мохаммед – 13. Уоллес – 12. Мюррей – 11.

Нетсийн түүхэн дэх хамгийн муу эхлэл хэдэн хожиглол хүртлээ үргэлжлэх бол? Одоогоор тэд 8 дараалан хожигдоод байна.

Тоглолт дуусахад 3.9 секунд дутуу байхад Рафер Алстон бөмбөгийг тоглолтонд оруулсан ч багийнхаа тоглогчтой ойлголцсонгүй, бөмбөгөө эсрэг багт алдсанаар хожигдсон юм. Нест тун хүнд байдалд байгаа. Ихэнх тоглогчид нь гэмтэлтэйн дээр шинээр тодроод байсан залуу тоглогч Крис Дуглас Робертсоос Н1N1-ийн вирус илэрсэн гэсэн.

“Нью-Жерси” – “Филадельфи – 79:82 (21:22, 19:21, 18:17, 21:22)

Н: Лопес – 23 + 14 самбар. Хасселл – 13. Алстон – 11. Симмонс – 11.

Ф: Янг – 20. Спрейтс – 19 + 9 самбар. Уильямс – 10.

Хоукс Никст талбайд нь 5 дахь дараалсан хожигдлыг нь өглөө. Хоуксийн тоглогчид өнөөдөр тун жигд, сайн тогложээ. Эл Хорфорд нь өөрийн дээд амжилт болох 25 оноо авсан байна.  Никс 2002-2003 оны улирлын мөн 1-8 амжилтаар эхэлж байжээ. Хамгаалагч Нэйт Робинсон нь гэмтэлтэй байгаа бөгөөд өнөөдөр тоглоно гэж байсан ч тоглосонгүй. Шинэ тоглогч Дуглас анх удаа гараанд гарч, 23 оноо авсан байна.

“Нью-Йорк” – “Атланта – 101:114 (25:23, 29:24, 23:37, 24:30)

Н: Харрингтон – 23 + 12 самбар. Дуглас – 23. Чандлер – 14. Хьюз – 14.

А: Хорфорд – 25 + 9 самбар. Смит – 22 + 12 самбар. Бибби – 19 + 9 дамжуулалт. Жонсон – 19.

Өчигдөр эгзэгтэй байдлаас хожсон Денвер өнөөдөр Милоукид, тодруулбал шинэ тоглогч Женнингст хожигдлоо. Женнингс 4-р үед 14, нийт 32 оноо авсан бөгөөд “Би суралцахыг хүсэж байна, алхам алхмаар үүнийг хийж байна” гэж хэлжээ. Женнингсийг лигийн шилдэг хамгаалалттай холбогчдын нэг Биллапс хамгаалж байв. Бакс бол лигийн муу багуудын нэг боловч энэ улирлыг тун сайн эхлүүллээ. 4-2. Майкл Редд гэмтлийн улмаас тоглохгүй байгааг бодолцвол Брэндон Женнингс энэ багийг амжилттай тоглоход маш том үүрэг гүйцэтгэж байна гэж хэлж болохоор.

“Милуоки” – “Денвер” – 108:102 (27:27, 26:20, 28:25, 27:30)

М: Женнингс – 32. Богут – 23. Иьлясова – 17 + 8 самбар.

Д: Энтони – 32 + 10 самбар. Биллупс – 19. Жи.Ар.Смит – 18.

Грег Оден өнөөдрийн тоглолтонд лигийн супер төвийн тоглогч шиг л харагдаж байв. Оден 18 оноо, 11 самбараас авалтыг ердөө 26-хан минутанд хийж, Портлэнд Миннесотаг илт давуу хожлоо. Портлэнд 4 дараалан хожиж, 6-3 болж байгаагийн дээр 1999 оноос хойшхи хамгийн сайн эхлэлээ хийв.

Миннесотагийн хувьд улирлын эхний тоглолтонд хожсоноосоо хойш 8 дараалан хожигдлоо.

“Миннесота” – “Портленд” – 84:107 (23:18, 19:32, 19:35, 23:22)

М: Флинн – 15. Жефферсон – 14. Павлович -13.

П: Оден – 18 + 11 самбар. Уэбстер – 16. Фернандес – 15.

Рокитс талбай дээрээ Мемфисийг 7 дахиа дараалан хожлоо. Луис Скола 22 оноо, 15 самбараас авалт хийсэн бол Карл Лэндри нөөцнөөс тоглож 20 оноо авчээ.

Рокитс эхний хагасыг 5 онооны илүүтэй өндөрлөсөн ч дасгалжуулагч Рик Адельман багийнхныгаа өшөө сайн тоглох хэрэгтэйг сануулж, үүнийг нь ч багийнхан нь гялалзтал хэрэгжүүлжээ.

“Хьюстон” – “Мемфис” – 104:79 (20:17, 23:21, 31:19, 30:22)

Х: Скола – 22 + 15 самбар. Лэндри – 20. Ариза – 17.

М: Мэйо – 19. Рэндольф – 18 + 10 самбар. Гей – 18.

Тони Паркер, Тим Данкангүй ч Спэрс Далласыг хожлоо. Тэдний эзгүйд Спэрс 2 дараалан хожоод байна. Спэрс талбай дээрээ 4 тоглож, ийн 4 дэхээ хожиж байна. Ричард Жефферсон 29 оноо авсан бөгөөд Спэрст ирснээсээ хойш хамгийн сайн тоглолтоо үзүүлсэн нь энэ.

Өнгөрсөн улирлын плей-оффын эхний шатанд Даллас Спэрсийг хожиж, Спэрс 2000 оноос хойш хамгийн эрт плей-оффоос мултарч байв.

“Сан-Антонио” – “Даллас” – 92:83 (21:21, 30:17, 28:26, 13:19)

С: Жефферсон – 29. Жинобили – 13. Боганс – 13.

Д: Новицки – 29 + 12 самбар. Терри – 19. Мэрион – 11 + 9 самбар.

Кевин Дюрант 38 секунд үлдээд байх үед шидэлтээ амжилттай болгосон нь хожлын оноо байлаа. Тюндер ийн 2 зочлон тоглолтонд дараалан хожигдоод байсан цувралаа зогсоож, 4 хожил, 4 хожигдолтой болов.

Клипперс 2 дараалан хожигдлоо. Хамгаалагч Эрик Гордон нь өнгөрсөн Бямба гаригт гэмтэл авч 10 хүртэл хоногоор “аут” болсон.

“Клипперс” – “Оклахома” – 79:83 (22:22, 26:21, 21:23, 10:17)

К: Каман – 20 + 11 самбар. Дэвис – 17. Торнтон – 15 + 9 самбар.

С: Дюрант – 30 + 10 самбар. Грин – 13. Олли – 11.

Финикс Санс Хорнетсийг хожсоноор Өрнөд бүсийн хамгийн шилдэг амжилт болох 8-1 боллоо. Мөн лигийг Селтиксийн хамтаар тэргүүлж байна.

“Энэ бол бидний хувьд сайн хожил. Эхний хагаст бид үнэхээр сайн байсан. Довтолгоогоо тун сайн хийж байлаа ” гэж Сансын дасгалжуулагч Жентри хэлжээ. Мөн тэрээр “Санс плей-оффт хэдээр орохыг хэлэхэд хэт эрт байна, 20-25 тоглолтын дараа энэ тухай ярихад болно”. Маргааш Лейкерстэй тоглоод хожвол энэ бол нэг л хожил, хожигдвол энэ бас нэг л хожигдол байх болно” гэсэн байна.

Санс 1980-81 оны улиралд 11-1 эхлэл хийж байжээ. Санс талбай дээрээ 12 дараалан хожиж байна. Өнгөрсөн оны 3 сарын 12-нд Кливлендэд хожигдсоноосоо хойш Санс талбай дээрээ ялагдаагүй.

Харин Крис Полийн баг Дерон Уилльямсийн багийн адилаар энэ улиралд тааруухан тоглож байна. Тоглолтын дараа Пол: “Тэд тэр чигээрээ өөр баг болжээ. Тэд миний анхны жилийн, 2 дахь жилийн Финикс Санс шиг л тоглож байна” гэж.

“Финикс” – “Нью-Орлеан” – 124:104 (40:29, 35:27, 26:21, 23:27)

Ф: Стаудмайер – 21. Хилл – 18. Драгич – 14.

Н: Пол – 25. Окафор – 13. Поси – 11.