Америкийн Үндэсний Сагсан Бөмбөгийн улирлын тоглолт уламжлалт ёсоор дөрөв дэх өдрийн тоглолтыг ТНТ теле суваг шууд дамжуулан үзүүллээ. Энэ удаад Кливленд Кавальерс баг Майами Хитийн талбай дээр зочилж, Лос Анжелес Лейкерс баг Финикс Сансыг талбайдаа хүлээн авч чухал ялалтууд байгууллаа. Шак хуучин багийнхаа эсрэг, хуучин хотдоо эргэж ирээд ялалттай буцав.

Кливленд 111 – 104 Майами

Хаан Жеймсийн цэргүүд улирлыг тааруухан эхэлсэн алдаагаа бага багаар засч эхлэв. Тэд өчигдөр Орландог нутаг дээр нь хожил авсан бол өнөөдөр зүүн бүсийг тэргүүлэгчдийн нэг Майами Хитийг талбай дээр нь хожиж дөнгөв. Ингэснээр “Хаан” Жеймсийн цэргүүд зургаа дахь ялалтаа авч, гурван хожигдолтой зүүн бүсийн дөрөвт жагсаж байна. Хэдийгээр гурав дараалсан ялалтын цуврал зогсож энэ улирлын хоёр дахь хожигдлоо амссан Майами Хит баг зургаан хожилтойгоор зүүн бүсдээ Бостоны ард явж байна. Атланта Хаукс мөн адил зургаан ялалт хоёр ялагдалтай байр хуваан зогсож байна.

Энэ удаа Кливленд ялахад Мо. Уильямс тун чухал үүрэг гүйцэтгэж 25 оноо авч, холын зайнаас таван удаа амжилттай довтолсон юм. Тэр өмнөх тоглолтонд ч мөн үүргээ сайн гүйцэтгэж 25 оноо авсан билээ. Мөн Ж.Ж Хиксон 18 оноо авч өөрийн карьерийн хамгийн өндөр оноог авчээ. Хаан Жеймс 34 оноо, 7 оновчтой дамжуулалт өгч торгуулиас 18 шидэж 16 оноо түүсэн байна.

2008 оны драфтын нэгдүгээр бүсийн арван есөөр Кливлендэд драфтлагдаж байсан хүчний довтлогч Ж.Ж. Хиксон карьерийнхаа турш гурав дахь удаагаа гарааны довтлогчоор тоглосон бөгөөд 88 онд төрсөн энэ залууд Кливленд хотынхон ихээхэн итгэл хүлээлгэж явдаг юм.

Талбайн эздээс 2008 оны драфтын дэд тэргүүн Майкл Бисли энэ улирлын хамгийн их оноо авалт буюу 24 оноо авсан ч энэ нь ялалт авахад хангалтгүй байлаа.  Багийн лидер Дуэйн Уэйд 36 оноо бичүүлсэн юм.

Тоглолт дуусахаас гурван минутын өмнө Дуэйн Уэйд гурваас оруулж, блок шот хийж, дахин хоёр оноо авч 103 – 99 өөр тооны харьцааг ойртуулсан ч ЛеБрон Жеймс хариултыг өгч гурваас оруулснаар тоглолт Кливлендийн талд эргэсэн. Дуэйн Уэйд, Марио Чалмерс, Күйнтин Ричардсон нар удаа дараа гурваас алдсан юм.

Тоглолтын явцад Жирмэйн О’Нил блок шот хийсний дараа Дуэйн Уэйд 6 – 11 фүүт өндөртөй Бразилийн иргэн Эндерсон Варежаогийн эсрэг хүчний данк хийсэн бөгөөд үүний дараахан хоёр тоглогч хэл амаар маргалдаж улмаар хоёул текникийн алдаа авцгаасан билээ.

Дашрамд дурдахад тоглолтыг алдарт Майкл Жордан, өдгөөгийн Майами Хит багийн ерөнхийлөгч Пэт Рэйлитэй зэрэгцэн сууж Майамиг дэмжиж байсан бөгөөд Чикаго Буллзын өөр нэгэн домогт тоглогч Скотти Пиппен ч харагдаж байлаа. Майамигийн гол лидер Дуэйн Уэйд саяхнаас Жордан брэндийг сурталчилах болсон билээ.

Лос Анжелес Лейкерс 121 – 102 Финикс Санс

Хамгаалалт илүү юу? Довтолгоо илүү юу? гэдгийн хариултыг тод томруун өгөх шиг боллоо энэ тоглолт. Сүүлийн хоёр жилд гаргаагүй тун сайн гараагаа Финикс Санс баг үзүүлж 8 ялалт ганцхан ялагдалтай баруун бүсийг тэргүүлж байв. Тэгвэл Лейкерс 6 ялалт нэг ялагдалтай байв.

Довтолгоо голлосон тоглолттой Финиксийн гол оноо түүгчид болох Жейсон Ричардсон, Амаре Стаудемайер нар нийлээд 13 оноо, 24 шидсэнээс 4 нь байндаа оносон, тун муу тоглолт үзүүлэв.

Өмнөх жилүүдээсээ улам л сайжирсан Коби Брайнт 32 минутанд 29 оноо авч, үүнээс 16-г нь будагтай талбайгаас түүжээ. Лейкерсийн залуу од Эндрью Байнум 26 оноо, 16 самбар авч багаа хожилд хүргэхэд том тус хүргэв. Тэрбээр гэмтлийн улмаас сүүлийн хоёр тоглолтыг өнжсөн юм.

Финиксийн довтлогч Жэйред Дадли 14 оноо авч багаа тэргүүлсэн ч 80-81 оны улиралд клубын дээд амжилт болох 9-1 гэсэн гараагаа эвдэж чадсангүй.