Улирал эхлэхээс өмнө л багаа голж, дасгалжуулагчаа шүүмжилж байсан Голден Стэйтийн ахлагч Стивен Жексон зарагдаж санаа нь амарлаа. Жексоны хамтаар Эйси Лав Шарлотт Бобкэтст очин, Шарлоттоос Ража Белл, Владимир Радманович нар Голден Стэйтэд иржээ.

Жексон өнгөрсөн жил гэрээгээ 3 жилийн 28 сая долларын цалингаар сунгасан ч энэ 9 сараас эхлээд багтаа болон дасгалжуулагч Дон Нельсонд сэтгэл хангалуун бус байгаагаа илэрхийлэх болсон. Голден Стэйтийн зүгээс түүний шүүмжлэлийн хариу болгож, улирлын эхний 2 тоглолтонд тоглох эрхийг нь ч хасаж байв.

Жексоныг солилцоогоор Кливленд, эсвэл Техасын 3 багийн нэг, мөн Нью-Йорк зэрэг багт очиж магадгүй гэж байсан ч Шарлоттод иржээ. Бобкэтс баг түүхэндээ нэг ч удаа плей-оффт орж байгаагүй.

Шарлотт лигийн хамгийн бага оноо авдаг баг бөгөөд Жексон энд онооны лидер нь болох биз. Харин Ража Белл Голден Стэйтийн гараанд гарч тоглох боломжтой. Гэхдээ Дон Нельсоны хувьд Ража Беллийг гэхээсээ илүү Владимир Радмановичийг илүү их ашиглаж магадгүй гэсэн таамаг байна.