Ballon d`Or буюу Алтан бөмбөг нь Европын хөлбөмбөгчдийн хамгийн нэр хүндтэй, эрхэм шагнал байсаар ирсэн. Энэ жилийн уг шагналын эзэн удахгүй тодорно. Харин “goal.com” сайт 1995 оноос хойшхи “Алтан бөмбөг” аваагүй ч авах боломжтой байсан, магадгүй авах ёстой байсан тоглогчдын жагсаалтыг гаргажээ.

10) Давор Шукер

Хорватын түүхэн дэх хамгийн алдартай хөлбөмбөгчин Давор Шукер 1996 оны ЕАШТ, 1998 оны ДАШТ-үүдэд амжилттай тоглосон шигшээ багтаа гол үүргийг гүйцэтгэж, хамгийн олон гоолуудыг оруулж байв. Шукер Хорватын төлөө нийт 69 тоглож 45 гоол хийж байжээ. Клубын хувьд тэрээр Динамо Загреб, Севилья, Реал Мадридад тоглож явсан бөгөөд тухайн цаг үеийнхээ шилдэг хитмэнүүдийн нэг байлаа. Шукер 1998 оны Алтан бөмбөгийн шалгаруулалтанд Роналдогийн дараа 2-р байранд бичигдсэн болно.
9) Питер Шмейхель

Уг жагсаалтанд орсон 3 хаалгачийн нэг. Ривалдо 1999 оны Алтан бөмбөгийг авсан ч олон хүн Шмейхелийн амжилтыг хүндэлж байсан. Дани хаалгач тэр жилийнхээ шилдэг 3-т ч орж чадаагүй ч Аваргуудын лигт Манчестер Юнайтедийн хаалгыг хэрхэн манаж, ямар амжилтанд хүрснийг нь бүгд мэдэж байв. Барселонад болсон шигшээ тоглолтонд МЮ 1:0-ээр хожигдож байгаад шүүгчийн мэдлийн цагт 2 гоол хийн гайхалтай хожиж байсан түүхтэй. 1999 он бол Шмейхелийн кареерийн оргил нь байсан. 90-ээд оны дэлхийн шилдэг хаалгач байсан гэхэд буруудахгүй шахам. Харамсалтай нь Алтан бөмбөггүй хоцорсон.
8 ) Раул

Тэр хамгийн шилдэг хамгаалах чиглэлийн хагас хамгаалагч (Клод Макелел),  хамгийн шилдэг вингер (Луиш Фигу), хамгийн шилдэг бүтээн байгуулагч хагас хамгаалагч (Зинедин Зидан), хамгийн шилдэг довтлогч (Роналдо) нартай хамт тоглож байв. Эдгээр тоглогчид багт нь ирэхэд ч, багаас нь явахад ч Раул багийн лидер хэвээрээ л байсан.

Аваргуудын лигийн 2 ч шигшээ тоглолтонд гоол хийж байсны дээр уг тэмцээний бүх үеийн мэргэн бууч, Реалын бүх үеийн мэргэн бууч, Испаний бүх үеийн мэргэн бууч, Ла Лигийн бүх үеийн мэргэн буучын амжилт руу тэмүүлж байгаа.

УЕФА-ын клубын оны шилдэг довтлогчоор 2000, 2001, 2002 онуудад дараалан шалгарч байсан. Гэхдээ эдгээр он жилүүдийнхээ ганцад нь л “Мөнгөн бөмбөг” хүртсэн нь чамлахаар. Ялангуяа 2001 онд Майкл Оуэн биш, Раул хүртсэн бол шударга явдал байлаа.

7) Оливер Кан

2006 оны нутагтаа болсон Дэлхийн аварга шалгаруулах тэмцээнд шигшээ багийнхаа 1 номерийн байр суурийг Йенс Ленманд алдаж байсан нь Каны 10-15 жилийн кареерийг бүдэгрүүлэхэд хангалтгүй. Баварийн баавгай шигшээдээ 86 тоглолт хийсний дотор 2002 оны ДАШТ-ын гайхамшигт тоглолтууд нь багтана. Тэгэхэд Кан бараг л ганцаараа Германыг шигшээд үлдээсэн. Кан ФИФА-ын ДАШТ-ын шилдэг тоглогчийн шагнал, Лев Яшиний нэрэмжит шагналуудыг хүртэж байв. Зуун солигдох он жилүүдийн шилдэг хаалгач нь Кан байсан. 2001, 2002 онуудад Алтан бөмбөгийн шалгаруулалтын 3-р байр эзэлсэн түүхтэй.
6) Аллесандро Неста

Энэ 10 жилийн (2000-2010) хугацаанд тоглож байгаа хамгаалагчдаас төрөлх авьяасаараа Неста ялгардаг гэнэ. Нестаг бүрэн фит болсон  үед нь давж гарах довтлогч бараг л байхгүйн дээр түүнээс сайн хамгаалагч гэж дэлхийд үгүй.

Милан багтайгаа хамт 2003, 2007 онуудын Аваргуудын лигт Ювентус, Ливерпулийг хожиход Неста гарамгай тоглож байсан. Харин 2006 оны ДАШТ-ын хасагдах шатанд гэмтлийн улмаас тоглож чадаагүй. ДАШТ-ын дараа шигшээ багаасаа зодог тайлсан.

Энэ улиралд харин урьдын формондоо орсон гэлтэй сайн тоглож байгаа. Каннаваро -Неста нараас илүү шигшээ багийн төвийн хамгаалалтын хослолыг бид одоогоор хараагүй л байна.

Тюрамийн адилаар Неста хэзээ ч Алтан бөмбөгийн шалгаруулалтын эхний 3-т орж байсангүй.

үргэлжлэл бий.