Манай жүдогийн шигшээ багийнхан хилийн чанадад томоохон тэмцээнүүдэд амжилттай оролцосоор байгаа. Саяхан БНСУ-ын Сүвон хотноо болсон жүдо бөхийн Дэлхийн цомын тэмцээнд 21 орны 103 эрэгтэй, 84 эмэгтэй бөх хүч үзсэн. Манай жүдочид тус тэмцээнээс хоёр алт, гурван мөнгө, нэг хүрэл нийт зургаан медаль хүртсэн амжилтаар багийн дүнгээр гуравдугаарт жагссан.

Дэлхийн цомд оролцосн манай баг тамирчид хамтарсан бэлтгэлд оролцоод дараагийн тэмцээнд хүч үзэхээр арлын орныг зорьсон. Дараагийн томоохон тэмцээн Японы нийслэл Токио хотод 154 мянган ам.долларын шагналын сантай “Их дуулга” тэмцээн өнөөдөр эхэллээ. Энэхүү тэмцээнд 44 орны 400 гаруй жүдоч хүч үзнэ. Тэмцээнд түрүүлсэн жүдоч 5000 ам.доллар халааслах бол, мөнгөн медаль 3000, хүрэл медаль 1500 ам.доллар дагах шагналтай.

Их дуулгад эрэгтэйчүүдийн 60кг-д Ч.Болдбаатар, 66кг-д С.Мияарагчаа, Х.Цагаанбаатар, 73кг-д С.Ням-Очир, 81кг-д О.Ууганбаатар, 90кг-д Г.Бат-Эрдэнэ, -100кг-д Б.Тэмүүлэн, +100кг-д Д.Ганхуяг нар зодоглоно.  Эмэгтэйчүүдийн 48кг-д М.Уранцэцэг, 52кг-д М.Бундмаа, 70кг-д П.Лхамдэгд нар хүч үзэх юм байна. Тэмцээн энэ сарын 13-нд өндөрлөнө. Ингээд тамирчдын эхний тойргийн оноолтыг үзэгч та бүхэндээ сонирхуулъя.
Эрэгтэйчүүдээс
60кг Ч.Болдбаатар – Жан Жин Мин /БНСУ/
66кг Х.Цагаанбаатар – Кордава Шаква / Гүрж/
С.Мияарагчаа – Камер Ниал / Нидерланд/
73кг С.Ням-Очир – Нишияама Юүки /Япон/
81кг О.Ууганбаатар – эхний тойрогт гоц мөргөсөн. Дараагийн тойрогт Накай Такакиро /Япон/
90кг Г.Бат-Эрдэнэ – Щирнхофер Макс /Австри/
-100кг Б.Тэмүүлэн – Их Британи Спалдин Мкинтон /Их Британи/
+100кг Д.Ганхуяг – Жоханссон Кристоффер /Швед/
Эмэгтэйчүүдээс
48кг М.Уранцэцэг- эхний тойрогт гоц мөргөсөн.
52кг М.Бундмаа – Хошимото Юүки /Япон/
70кг П.Лхамдэгд – гоц мөргөсөн.