2009 он Рафаель Надалийн хувьд тийм ч амжилттай жил байсангүй. Оны эхэнд тэрээр Австралийн нээлттэй тэмцээнд түрүүлсэн хэдий ч Ролан Гарросын үеэр хүнд бэртэл авч Уимблдоныг  өнжихөд хүрсэн билээ.

Үүнээс хойш тур тэмцээнүүдэд төдийлөн сайн тоглохгүй байсаар Америкий нээлттэй тэмцээнд эргэн ирсэн ч хагас шигшээд Аргентиний Хуан Мартин дель Потрод ялагдал хүлээсэн юм.

Испаний AS сонинд өгсөн ярилцлагадаа Рафа өөрийнхөө энэ азгүйтлийг ATP-гийн шахуу хуваарьтай холбон тайлбарлаж байна. Түүний хэлж байгаагаар ATP-гийн жилийн хуваарь нь тамирчдад амрах цаг огт олгодоггүй гэнэ. Тэрээр ”Мэргэжлийн теннисний холбооны хуваарь тамирчдыг үнэхээр гарах гарцгүй болдог. Нэг тэмцээн дуусаад л дахиад л тэмцээн. Бид нар чинь хүн болохоос машин биш шүү дээ. Ийм шахуу хуваарьтай байхад яг өөрийнхөө хүссэн амжилтыг үзүүлж чадна гэхэд хүндрэлтэй л байдаг юм. Тийм болохоор энэ тал дээр ямар нэгэн шийдвэрт хүрээсэй би найдаж байна’‘ гэжээ.

Надаль сүүлд шигшээ багтаа тоглож Дависийн цомын эзнээр тодроод амжсан юм.