“Финикс” – “Оклахома-Сити” – 113:117 (31:36, 33:30, 25:23, 24:28)

Ф: Стадамайр – 35 + 14 самбар. Стив Нэш – 24 + 12 дамжуулалт. Фрай – 24.

О: Дюрант – 38. Уэстбрук – 19 + 8 самбар. Грин – 17 + 9 самбар.

Тоглолтын өмнө Сансын дасгалжуулагч Э. Жентри өрсөлдөгч багийнхаа довтлогч Кевин Дюрантийн тухай: “Би түүнийг энэ тоглоомын бүх үеийн хамгийн агуу тоглогч нарын нэг болно гэж боддог. Түүнд чадахгүй зүйл нэг ч байхгүй” гэжээ. Үнэхээр ч Жентригийн хэлсэн үг үнэн гэдгийг Дюрант Сансын эсрэг тоглолтонд харууллаа. Тэрээр 38 оноо авсны дотор 14.4 секунд дутуу байхад тоглолтыг шийдсэн довтолгоогоо оновчтой болгожээ. Оклахома Санст 9 дараалан хожигдоод байсан цувралаа ийн зогсоов.

Санс ийн талбай дээрээ 19 дараалан хожсоны эцэст 2 дараалан хожигдлоо.  Оклахома 14-14 болов. Тэд өнгөрсөн улиралд 2 сарын 28-нд буюу 59 дэх тоглолтондоо л 14 дэх хожлоо авч байжээ.

21 настай Дюрант одоогоор 27 оноог дунджаар авч байгаа. Хэрэв улирал дуусахад энэ үзүүлэлтээ хадгалж чадвал 21-ээс залуу ч нэг улиралд дунджаар 25 оноо дундчилсан лигийн түүхэн дэх 5 дахь тоглогч болно. Өмнө нь ЛеБрон Жеймс, Трэйси МакГрэйди, Кармело Энтони, Рик Бэрри нар энэ үзүүлэлтэнд хүрч байв.

“Орландо” – “Хьюстон” – 102:87 (34:22, 21:30, 23:13, 24:22)

О: Картер – 18. Льюис – 15. Нельсон – 15.

Х: Ландри – 20. Брукс – 17. Скола – 14.

Мэжик талбай дээрээ Рокитсийг юм болгосонгүй. Дуайт доминант байж 20 самбараас авалт, 4 блок хийжээ. “Би самбараас сайн авч, блок шотууд хийвэл манай баг хожно” гэж Дуайт хэлжээ. Рокитсийн намхан самбарын тоглогчид Ховардад эсэргүүцэл үзүүлэхэд хэцүү нь ойлгомжтой.

Жамеер Нельсон 11 сарын 16-наас хойш анх удаа гараанд гарч, 15 оноо авсан бол Рокитсийн Трэйси МакГрэйди мөн л 7 минут гаруй тоглож, 2 оноо авчээ. Харин түүний үеэл Картер 18 оноо авсан байна.

Улирал эхэлснээс хойш ердөө 2 дахь удаагаа Жамеер, Пиетрус, Винс, Рашард, Дуайт гэсэн Мэжикийн үндсэн 5 тоглогч нь хамтдаа гараанд гарсан нь энэ.  УБ-ын цагаар Бямба гаригт Мэжик – Бостоны тоглолт болно.

“Детройт” – “Торонто” – 64:94 (21:25, 16:29, 14:20, 13:20)

Д: У.Байнум – 12. Уилкокс – 11. Жеребко – 10 + 9 самбар.

Т: Барньяни – 21. Жэк – 14. Бош – 12 + 9 самбар.

Детройт лигийн муу хамгаалалттай багуудын нэгний эсрэг ердөө 28 хувьтай довтолж, 64 оноо авснаар 1954-55 оны улирлаас хойш буюу довтолгооны 24 секундийн дүрэм хэрэгжсэнээс хойш  хамгийн бага оноогоо авчээ. Торонто эсрэг багтаа алдсан оноогоороо лигийн 30 багаас 29-д ордог.

Пистонс 6 дахиа дараалан хожигдов.

“Нью-Жерси” – “Миннесота” – 99:103 (23:27, 25:25, 26:24, 25:27)

Н: Харрис – 23 + 8 дамжуулалт. Ю Цзян Лан – 22 + 8 самбар. Кортни Ли – 20.

М: Жефферсон – 27. Флин – 22. Брюйер – 17.

Лигийн 2 муу багийн тоглолт Нетсийн талбайд болж, арай сайн нь хожлоо. Нетс нөгөө бүсийнхээ багийг хожоогүй байгаа лигийн ганц баг хэвээр үлдэв.

Нетсийн довтлогч И Жинлянь гэмтлээс эргэн ирж, 22 оноо аван сайн тогложээ. Улирлын эхний тоглолтонд эдгээр багууд тоглож, мөн л Миннесота хожиж байлаа.

“Майами” – “Юта” – 80:70 (19:16, 13:14, 31:19, 17:21)

М: Уэйд – 29. Хаслэм – 12 + 11 самбар. Ричардсон – 11.

Ю: Дер.Уильямс – 18. Бузер – 14. Окур – 9.

Жилийн өмнө эдгээр багуудын тоглолт довтолгоонд тулгуурлаж байсан бол энэ удаа багууд хамгаалалтандаа их анхаарчээ. Тиймээс харьцангуй бага буюу нийлээд ердөө 150 оноо авчээ.

Юта 12 сарын 9-нд Лейкерсийн эсрэг 77 оноо авсан нь энэ улирлынх нь хамгийн бага оноо байсан бол энэ удаа ердөө 70-ийг авчээ. Улирал эхэлснээс хойш Жазз 90-ээс бага оноо авсан 5 тоглолтондоо 5-ууланд нь хожигдсон бол 1999 оны 2 сараас хойш 80-аас бага оноо авсан 55 тоглолтынхоо 54-т нь хожигджээ.

“Денвер” – “Атланта” – 124:104 (34:24, 29:27, 29:31, 32:22)

Д: Жи. Ар. Смит – 41. Энтони – 24. Лоусон – 16.

А: Кроуфорд – 24. Хорфорд – 18 + 11 самбар. Д. Смит – 17 + 9 самбар.

Биллапсийн эзгүйд 2 тоглохдоо 2 хожигдоод байсан Денвер энэ удаа харин хожлоо. Нөөц тоглогч Жи.Ар.Смит энэ улирал эхэлснээс хойш “галзуураагүй” байсан ч өнөөдөо Хоуксийн эсрэг тэсэрч, 41 оноо авсны дотор 3 онооны 10 оновчтой шидэлт хийжээ. Гэхдээ торгуулийн 6 шидэлтийнхээ 5-ыг нь алдсан нь гайхмаар.

Эдгээр багууд энэ улиралд 1:1 боллоо. Өөр бүсийн багууд учраас дахиж тоглохгүй. 5 дахь улиралдаа дараалан 1:1 хожилцоод байгаа гэнэ.

“Милуоки” – “Вашингтон” – 97:109 (27:37, 25:20, 23:24, 22:28)

М: Редд – 32. Белл – 14. Богут – 12 + 9 самбар.

В: Жеймисон – 25 + 10 самбар. Батлер – 23 + 10 самбар. Аринас – 18 + 9 дамжуулалт.

Аренас сайн тоглож байсан ч 4-р үед гэмтэл аван талбайг орхисон. Аз болоход Ирл Бойкинс бэлэн байж, 4-р үед 12 оноо авснаар Визардсын хожилд чухал үүрэг гүйцэтгэлээ. Тэд өнөөдөр Баксийг талбайд нь хожив. Бакс сүүлийн 16 тоглолтынхоо 12-т нь хожигдож байна.

Баксийн шинэ тоглогч Брэндон Женнингс НБА дэх хамгийн муу тоглолтоо үзүүлж, 16 минутанд 7 оноо, 3 ТО хийжээ. Харин Майкл Редд улирлын хамгийн өндөр 32 оноог авав.

Сонирхолтой нь энэ тоглолтонд Визардс довтолгооны самбараас нэг ч удаа аваагүй лигийн түүхэн дэх 2 дахь баг болох шахсан ч цаг дуусахаас 2:13-ийн өмнө Брэндон Хэйвуд нэг юм довтолгооны самбараас авч, багаа аварчээ. Энэ үзүүлэлтийг албан ёсны статистик болгон 1973 оноос эхлэн хөтөлжээ. 2002 оны 1 сарын 23-нд Жаззийн эсрэг тоглохдоо Спэрс нэг ч удаа довтолгооны самбараас бөмбөг аваагүй аж.

“Нью-Орлеан” – “Голден Стейт” – 108:102 (27:26, 31:30, 27:24, 23:22)

Н: Пол – 20. Уэст – 14 + 8 самбар. Стоякович – 13.

Г: Эллис – 35. Маггети – 22 + 10 самбар. Кёрри – 17 + 10 самбар.

Хорнетс талбай дээрээ шархадсан Голден Стэйтийг хожлоо. Хорнетс 13-14 болж байгаа бол Голден Стэйт 7 дараалан хожигдов. Голден Стэйтээс энэ тоглолтонд ердөө 7 тоглогч тоглосон бөгөөд Уотсон, Кёрри, Эллис гэсэн 3 хамгаалагч гараанд гаргажээ.

Монта Эллис 35 оноо авсан бол төвийн тоглогчоор тоглосон Энтони Рэндольф 12 оноо, 8 самбараас авалт, 8 блок шот хийв. Удаан хугацаанд гэмтэлтэй байсан А. Биедринс Хорнетсийн дараагийн тоглолтонд оролцоход бэлэн болсон гэнэ.

“Сан-Антонио” – “Портленд” – 94:98 (24:28, 23:20, 22:27, 25:23)

С: Данкан – 24 + 11 самбар. Жефферсон – 18. Мейсон – 16. Паркер – 16.

П: Бэйлесс – 31. ОлдриЖ – 22 + 8 самбар. Ховард – 12 + 12 самбар.

Гарааны 2 тоглогч нь эзгүй багт Спэрс талбай дээрээ хожигдлоо. Хуучны найдвартай баг Спэрс нэг л биш болжээ.

Жоэль Прзибилла болон Брэндон Рой өмнөх тоглолтонд авсан гэмтлийнхээ улмаас энэ тоглолтонд оролцоогүй ч Портлэнд хожиж дөнгөлөө. Залуу тоглогч Бэйлесс Ройг орлон тоглож, анх удаа гараанд гарахдаа 31 оноо авч, Портлэнд 3 дахиа дараалан хожив. 12 сарын 5-нд Оденийг гэмтсэнээс хойш Портлэнд 7-4 болжээ.

Ройгийн гэмтэл ноцтой биш бол Прзибиллагийн гэмтэл хүнд байж магадгүй гэнэ.

“Сакраменто” – “Кливленд” – 104:117 ОТ (29:32, 24:25, 32:32, 19:15, 0:13)

С: Эванс – 28. Ж.Томпсон – 18. Хоуз – 17 + 12 самбар.

К: Жеймс – 34 + 16 самбар + 10 дамжуулалт. Мо Уильямс – 27. Илгаускас – 25.

Шинэ “хаан” Эванс жинхэнэ “хаан” ЛеБроны тоглолоо. Үндсэн цагт ялагч тодроогүй энэ тоглолтын нэмэлт цагт хуучин бууны хугархай Зидрунас Илгаускас 3 онооны 3 шидэлтээ оновчтой болгож, сюрприз барьснаар Кавальерс Кингзийг талбайд нь хожив.

ЛеБрон 34 оноо, 16 самбараас авалт, 10 оновчтой дамжуулалтаар улирал эхэлснээс хойш 2 дахь трипл-даблаа хийж багаа тэргүүлжээ. Кингз нэмэлт цагт нэг ч оноо аваагүй аж.

Эванс хэдийгээр 28 оноо авсан ч 4-р үед болон нэмэлт цагт ЛеБроны хамгаалалтын эсрэг 8 довтолж, ердөө ганцыг нь оновчтой болгожээ.