“Сакраменто” – “Денвер” – 102:100 (19:26, 24:28, 30:22, 29:24)

С: Эванс – 27. Хэйес – 17. Касспи – 16+8 самбар.

Д: Биллапс – 27. К. Мартин – 20+10 самбар. Жей Ар Смит – 20.

Биллапс тэргүүтэй Наггетс өчигдөр ЛеБроны багийг хожсон бол өнөөдөр Эвансийн багт хожигдов. Эванс гэж хэн бэ? Тэр энэ улирлын шилдэг шинэ тоглогчийн хамгийн гол нэр дэвшигч байх болов уу. Брэндон Женнингс нөгөө айхтар 55 оноотой тоглолтын дараа ер нь л чимээгүй байна. Харин Тайрак Эванс одоогоор Кингзийн лидер болоод байна. Кевин Мартин гэмтлээ эдгээн эргэн ирэхээр Эвансийн тоглолт хэрхэн өөрчлөгдөх юм байгаан?

11 секунд дутуу байхад Биллапс хүнд байдлаас 3 онооны шидэлтээ оновчтой болгож, тоог тэнцүүлсэн ч Эванс Кенионы эсрэг амжилттай шидсэнээр Кингз хожлоо. Үлдсэн 9.7 секундэд Жи.Ар.Смитийн шидэлт оновчтой болоогүй.

Эванс энэ улиралд 2 дахь удаагаа багтаа хожлын оноо авч байгаа нь энэ.

Кармело дараагийн Миннесотатай хийх тоглолтонд оролцох магадлалтай гэнэ.

“Орландо” – “Атланта” – 113:81 (29:21, 37:16, 25:22, 22:22)

О: Барнес – 18. Редик – 17. Р. Андерсон – 16.

А: Хорфорд – 14. Жош Смит – 11. Марв. Уильямс – 11.

Вашингтоны талбайд хожигдсон Мэжикийнхэн онгоцонд явахдаа юу ч идээгүй гэнэ. Тэгээд өнөөдөр талбай дээрээ Хоуксийг авчраад тэднээр “зоог барив”. Ингэснээр тэд 4 дараалсан хожигдлоо нэг юм зогсоов. Хэрэв Хоукс хожсон бол дивизионыхоо тэргүүнд бичигдэх байлаа.  Өмнөх тоглолтонд Винс Картер мөрөө гэмтээж энэ тоглолтыг өнжсөн бөгөөд түүнийг Реддик орлон гараанд гарч 17 оноо авчээ.

Мэжик одоо 4 хүнд аялан тоглолтыг Лейкерс, Денвер, Портлэнд, Кингзтэй хийнэ.

“Детройт” – “Филадельфи” – 94:104 (10:26, 20:30, 29:20, 35:28)

Д: Б. Гордон – 20. Виллануэва – 19. Хэмилтон – 12.

Ф: Брэнд – 25. Далемберт – 16+9 самбар. Игуодала – 16.

Филли Пистонсийг талбайд нь хожсоноор тэдний 12 дараалсан хожигдлыг нь өгөв. Гэдэс нь өвдсөнөөс болж өмнөх тоглолтыг өнжсөн Элтон Брэнд энэ удаа нөөц тоглогчоор тоглож 25 оноо авчээ. Харин өнгөрсөн жил Детройтод бүтэлгүй улирлыг үдсэн Айверсон өвдөгний гэмтлээс болж тоглосонгүй.

1994 оны 4 сараас хойш Пистонс анх удаа 12 дараалан хожигдож байгаа нь энэ. Тэрхүү улиралд Пистонс 14 дараалан хожигдож байв.

Энэ тоглолтын эхний үеийн 3:51-д Бен Гордон НБА-ын түүхэн дэх 10 000 сая дахь оноог авчээ.  Нью-Йоркийн Осси Шехтмен 1946 оны 11 сарын 1-нд НБА-ын түүхэн дэх анхны оноог авч байсан гэнэ.

“Оклахома” – “Индиана” – 108:102 (24:21, 29:26, 34:27, 21:28)

О: Дюрант – 40+12 самбар. Уэстбрук – 18+9 самбар. Харден – 13.

И: ГрейнЖер – 25. Прайс – 23. Мёрфи – 15+15 самбар.

Дюрант 40 оноо, үүнийхээ 10-ыг нь сүүлийн 4:35-д авснаар Оклахома талбай дээрээ Пейсерсийг хожиж, улирлын 20 дахь хожлоо авлаа. Өнгөрсөн улиралд нийт 23 хожиж байсантай харьцуулахад энэ улиралд Тюндерс маш сайн тоглож байна. Тэд одоо Өрнөдөд 8-р байранд бичигджээ.

Пейсерсийн хувьд айлын талбайд 9 дэхээ дараалан хожигдлоо.

“Чикаго” – “Миннесота” – 110:96 (28:32, 24:14, 27:18, 31:32)

Ч: Ноа – 20+9 самбар. Хинрич – 20. Сэлмонс – 14.

М: Гомес – 15. Флинн – 14+8 дамжуулалт.

Ноа, Хайнрич нар тус бүр 20 оноо авснаар Буллз Миннесотаг хожиж, 3 дараалсан хожигдлоо зогсоов.  Миннесота өчигдөр Индианаг хожсон ч дараалсан хожил авч чадсангүй. Тэд энэ улиралд ердөө ганц удаа л дараалан 2 хожоод байгаа юм.

Буллзын 110 оноо нь тэдний энэ улирлын хамгийн өндөр оноо болжээ.

“Даллас” – “Юта” – 93:111 (18:26, 22:24, 22:33, 31:28)

Д: Новицки – 29+8 самбар. Кидд – 19+8 дамжуулалт. Терри – 16.

Ю: Дер. Уильямс – 20+9 дамжуулалт. Бузер – 15. Окур – 14.

Даллас өчигдөр Спэрсийг талбайд нь гайхалтай хожсон ч энэ удаа талбай дээрээ Жаззад хожигдов. Эдгээр багуудын сүүлийн тоглолт 11 сарын 3-нд болоход Дирк Новицки 4-р үед 29 оноо авч Даллас хожиж байсан удаатай. Энэ удаа тийм түүх давтагдсангүй.

Ютагаас гэмтлээсээ эргэн ирсэн Дерон Уилльямс хамгийн сайн тоглож, 20 оноо, 9 оновчтой дамжуулалт хийжээ.

Далласчууд довтлогч Э. Нахераг Нетсээс авч, К. Хамприс, Ш. Уилльямс нарыг өгсөн байна. Нахера Далласт 2000-2004 онд тоглож байлаа.

“Хьюстон” – “Нью-Йорк” – 105:96 (21:32, 30:25, 27:22, 27:17)

Х: Скола – 23. Брукс – 20. Лоури – 16.

Н: Д. Ли – 26+12 самбар. Н. Робинсон – 20; Чэндлер – 17.

Сүүлийн үед тун сайн тоглож байгаа Никс энэ удаа Рокитсийн талбайд зочлоод барсангүй. Ер нь Никстэй тоглолт таарахгүй баг нь Рокитс л болов уу. Эдгээр багуудын сүүлийн 13 тоглолтын 11-т нь Рокитс хожоод байгаа гэнэ.

Рокитс ийн 3 дараалан хожигдсоныхоо дараа ялалт авлаа.

“Шарлотт” – “Мемфис” – 89:87 (25:21, 17:31, 22:16, 25:19)

Ш: Фелтон – 19. Ж. Уоллес – 18+8 самбар. С. Жексон – 15+8 самбар.

М: Майо – 25. З. Рэндолф – 17+12 самбар. Гэй – 15+10 самбар.

Өнөөдрийн бас нэгэн сонирхолтой болсон тоглолт. Майкл Жорданы үзсэн энэ тоглолтонд Жеральд Уоллес багтаа хожил бэлэглэв. Тэрээр сүүлийн мөчид Фелтоний алдсан бөмбөгийг цаг дуусахаас дөнгөж өмнө нь амжиж нэмснээр Бобкэтс улирлын 16 дахь хожлоо авав.

Маойгийн довтолгоог Уоллес “нам” блокдсон ч Фелтон 2 торгуулийн шидэлтээ алдаж, зөрүү 3 хэвээр үлдсэн. Майо Уоллесийн өөдөөс 3 онооны шидэлт хийн даагаа нэхэснээр тоо тэнцсэн юм. Тэгээд сүүлчийн довтолгоог Бобкэтс хийн Уоллес хожлын оноо авсан болно.