Фернандо Алонсо Феррарид ирснээсээ хойш анх удаа хэвлэлийнхэнд ярилцлага өглөө. ”Эндхийн уур амьсгал үнэхээр сайхан юм. Яг л нэг гэр бүл шиг бүгдээрээ нэг нэгэндээ санаа тавьдаг нь надад маш их таалагдсан. Нисгэгч болгон л Ферраригийн хүлгийг унаж уралдахыг хүсдэг гэж би боддог. Тийм болохоор энэ багтай хамт би карьераа сэтгэл өөдрөг өндөрлүүлмээр байна” гэжээ. Мөн дэлхийн хоёр удаагийн аварга Испани эр хуучин багийн анд Льюс Хэмилтон болон Макларенд байсан үеийнхээ талаар   ‘‘Би хэзээ ч нэгдүгээр нисгэгч больё гэж шаардаж байгаагүй. Гэхдээ хоёрдогч байхыг хүсээгүй учраас сэтэл дундуур байдаг байсан. 2007 оноос би багийнхантай ам мурийх босон юм. Энэ бүхэн одоо нэгэнт өнгөрсөн болохоор би нэг их ярихийг хүсэхгүй байна. Шумахерийн эргэж ирж байгаа талаар юу бодож байна гэж үү. Мэдээж хэрэг өрсөлдөөн улам ширүүсэж тэр чинээгээрээ надад хэцүү байх болно. Үзэгчид сайхан шоу үзнэ гэж найдаж байгаа. Энэ 2010 оны улирал үнэхээр үзүүштэй болно гэж  би итгэж байна.
Одоо би шинэ багийнхантайгаа маш сайн ойлголцож байгаа. Улирал эхлэхээс өмнө нэг гэр шиг болчихно байх” гэжээ. Фернандо Алонсо шинэ багтаа Фелипе Массатай хоршино. Энд байх хугацаандаа Алонзо жилийн 25 сая еврогийн цалин авах бөгөөд Ферраричүүд түүнтэй бүр өнгөрсөн улиралын дундуур холбоо тогтоож гэрээ байгуулаад байсан гэдэг нь саяхан олонд ил болсон юм.