2010 он гарснаар  бидний ард дурсах зүйл ихтэй, адал явдлаар нэгэн арван жил хоцорч байна. Улиран өнгөрсөн 10 жилд спортын ертөнцөд тэр тусмаа хөлбөмбөгт олон гайхалтай үйл явдал, тоглолтууд өрнөсөн. Ингээд та бүхэнд өнгөрсөн 10 жилийн хөлбөмбөгийн ертөнцөд хамгийн өндөр амжилтанд хүрч, бусдыгаа манлайлсан шилдэг 11 тамирчныг танилцуулж байна. Энэхүү жагсаалтыг Их Британий Гоол.ком сайт уншигчдийнхаа дунд явуулсан нээлттэй  санал асуулгаар тодруулсан бөгөөд байрлал бүр дээр нэг шилдэг тоглогч тодруулах журмаар жагсаалтыг гаргасан юм байна. Тухайлбал хаалгачийн байрлал дээр Оливер Кан, Петр Чех, Жанлуйжи Буффон гэсэн шилдэг тамирчдыг нэр дэвшүүлж хамгийн өндөр оноо авсан нэгийг нь өнгөрсөн 10 жилийн шилдгээ тодруулсан байна.

Жанлуйжи Буффон (Итали)

Хаалгач бол багийнхаа амжилтын тавин хувийг ганцаараа дааж явдаг. Тийм ч учраас гоол хийдэг сайн довтлогчгүй баг  байсан ч гэсэн хаалгачийнхаа ачаар ядаж нэг оноо зулгаах боломжтой. Өнгөрсөн 10 жилийн хөлбөмбөгийн ертөнцөд Оливер Кан, Петр Чех, Эдвин ван Сар гээд олон гайхалтай хаалгачид тоглож байсан. Харин нэг л хаалгач шилдгийн шилдэг гэсэн өргөмжлөлийг хүртэх эрхтэй. Тэр бол Жанлуйжи Буффон юм. Чухам түүний ачаар л Италичууд 2006 оны дэлхийн аваргад түрүүлж, Ювентус доод лигээс ганцхан жилийн дотор эргэн ирсэн. Магадгүй өөнтөгч нэгэн нь түүнийг 2003 оноос хойш клубын хэмжээнд ямар нэгэн тэмцээн уралдаанд түрүүлж байгаагүй гэж муулж болох ч хөлбөмбөгч цом шагнал, хөрөнгөн мөнгөнөөс илүү фенүүдийн хайр хүндлэл гэдэг зүйл илүү чухал байдаг юм. 2006 онд Ювентусыг доод лиг рүү унасны дараа олон тоглогчид живж байгаа онгоцноос зугтах харх адил зугтаж өөр багт шилжсэн. Харин энэ багт зүрх сэтгэлээ өгсөн цөөхөн хэдэн тоглогчид Туриндаа үнэнч үлдсэний нэг нь Буффон байсан юм. Буффоны Ювентустэй холбогдсон түүх нь 2001 оноос эхтэй. Тухайн үед Буффон Италийн Парма багт 6 жил тоглоод муугүй хаалгач гэдгээ альхэдийнэ нотглоод байсан юм. 1999 онд тэрээр Парматай хамт Италийн цом, УЕФА-гийн цомд түрүүлсэн амжилтыг үзүүлжээ.  Ингээд 2001 оны зун Буффоныг 51.5  сая еврогоор Ювентус өөрийнхөө эгнээнд нэгтгэл ээ. Өмнө нь ямар ч хаалгач ийм өндөр үнэ хүрч байгаагүй гэдэг. Ийнхүү түүхэнд бичигдэх өндөр үнэхээр худалдагдаж ирсэн Буффон анх ирсэн жилээсээ л өөрийгөө хэн гэдгийг харуулж эхэлжээ. 2002, 2003 онд тэрээр Сери А лигт -д хоёр жил дараалан магнайлж улмаар 2003 оны Аваргуудын лигийн финалд шалгарсан юм. Харамсалтай нь шигшээ тоглолтонд нэг нутгийн АС Миланд торгуулийн цохилтоор ялагдаж мөнгөн медальтайгаа эвлэрхээс өөр аргагүй болжээ. Тэр тоглолтонд Буффон эсрэг багийнхаа хоёр цохилтыг хаасан ч Ювентусээс Трезеге, Монтеро , Залаета гэсэн тоглогчид цохилтоо алдаж багаа хөөдсөн юм. Ер нь Буффоны ганц сул талыг мэргэжилтнүд торгуулийн цохилдыг хаахдаа муу гэж дүгнэдэг.  2006 оны дэлхийн аваргын финалд Буффон Францын багийн ганц ч цохилтыг хааж чадаагүй юм. Гэхдээ 2008 оны Европын аварга шалгаруулах тэмцээнд Буффон Румыны Адриан Мутугийн цохилтыг багаа аварч байсан удаатай. Сүүлийн жилүүдэд энэ агуу хаалгачийн карьерийг бэртэл гэмтэл нилээд зовоож байгаа. 2009 оны ихэнхийг Буффон эмнэлэгийн оронд дээр хэвтэж өнгөрүүлсэн бөгөөд түүний оронд Ювентусын хоёрдугаар хаалгач Меннингер ихэнхидээ талбайд гарч байсан юм. Гэсэн хэдий ч Ювентусын удирдлага Буффоныг багаасаа явуулах талаар бодох ч дургүй байгаа. Хамгийн сүүлд тэд Буффонтой урт хугацааны гэрээ байгуулж 2013 оныг дуустал багтаа үлдээхээр болоод байгаа. Клубын карьертаа цом шагналаар дутмаг ч Буффоны хувийн шагналын цуглуулга тийм ч бага биш. Тухайлбал Италийн лигийн шилдэг хаалгачаар 1999 оноос 2008 оны хооронд 8 удаа тодорч байсан байна. Үүнээс гадна 2006 онд Лев Яшиний нэрэмжит шилдэг хаалгач, 2003 оны аваргуудын лигийн MVP, оны шилдэг хаалгач, 2003, 2004, 2006, 2007 онуудад хөлбөмбөгийн түүх статистикийн холбооноос тодруулдаг оны шилдэг хаалгач гэх мэтчилэн түүний шагнал хөвөрнө. Саяхан түүх статистикийн холбооноос бүх цаг үеийн шилдэг хаалгачдийг тодруулахад Буффон тэргүүн байр эзэлсэн юм .
Хувийн амьдралын хувьд Буффон Италий загвар өмсөгч Алена Середоватай хамтран амьдарч байгаа. Хосууд 2007 онд анхныхаа хүүг өлгийдөн авч  Луйс Томас Буффон гэж нэрлэсэн юм. Өнгөрсөн жилийн 11 сард тэдний хоёр дахь хүү , Дэвид Ли  мэндэлсэн юм.

Кафу (Бразил)

Кафу бол Бразилийн шигшээд хамгийн олон тоглолтонд оролцсон тамирчдийн нэг юм. Тэр 1990-ээс–2006 оны хооронд алдарт шар өмсгөлтнүүдтэй хамт нийт 143 тоглолтонд оролцож байсан бөгөөд энэ хугацаандаа дэлхийн аваргын 21  тоглолтонд оролцсон нь бас л ховор амжилтуудын нэг. 1994  оны дэлхийн аварга бол энэ алдарт тамирчний оролцсон хамгийн анхны дэлхийн аварга шалгаруулах тэмцээн. Америкийн нэгдсэн улсад зохиогдсон 15 дахь удаагийн хөлбөмбөгийн их баяр наадамд Кафу гараанд төдийлөн гараагүй ч шигшээ тоглолтонд Италийн эсрэг сэлгээгээр орж тогложээ. Тэр цагаас хойш Кафу Бразилийн шигшээн гарааны тоглогч болж дахиж хэзээ ч сэлгээний  сандалд суугаагүй юм. 1997, 1999 онуудад Бразил Копа Америка тэмцээнд түрүүлж, 1998 оны дэлхийн аваргын шигшээд шалгарахд Кафу багийнхаа гол ноён нуруу болж хамгаалалтын албыг хариуцаж байлаа. Мэдээж хэрэг Кафу багийн ахлагчийн туузыг зүүж багаа ахлан тэмцээн уралдаанд оролцож байсан юм . Ер нь 1999-өөс 2003 оны хооронд Кафугийн карьерийн хамгийн оргил жилүүд өнгөрсөн юм. 2001 онд Италийн Рома багт тоглож байхдаа Кафу Сери А лигийн аваргаар тодорч карьерийнхаа анхны  лигийн түрүүг хүртсэн бол 2004 оны АС Миланд тоглож байхдаа мөн италийн аварга хэмээх эрхэм хүндтэй цолыг хүртжээ. Ялангуяа 2002 он бол Кафугийн хувьд хамгийн гайхалтай мөчүүд өнгөрсөн гэхэд болно. Ази тивд анх удаа зохиогдсон дэлхийн аваргад Кафу шигшээ багтайгаа хамт оролцож өрсөлдөгч болгоноо буулган авсаар түрүүлсэн юм. Ийнхүү тэрээр хоёр дэлхийн аваргад түрүүлсэн ховорохон амжилтын эзэн болжээ. Гэхдээ энэ тэмцээний өмнө Кафу хэд хэдэн бэрхшээл учирсан юм. Тэмцээний урьдчилсан шатанд Кафу Paraguayн эсрэг хийсэн тоглолтонд улаан хуудас хүртэж тухайн үед Бразилийг дасгалжуулж байсан Вандерлэй Люксембурготой муудалцахд хүрчээ. Энэ явдлаас болж Вандерлэй Кафугийн багийн ахлагчийн туузыг хураан авч Эмерсонд шилжүүлсэн юм. Гэвч  Эмерсон тэмцээний өмнө бэртэл авсан тул ахлагчийн тууз удалгүй Кафуд эргэ ирсэн түүхтэй. Энэ хооронд түүний клубын АС Миланд үргэлжилж байлаа. Миланд түүний шигшээ багийн Кака, Дида, Сержиньо зэрэг олон тоглогчид хамт хүчин зүтгэж байлаа. Тэд ч хамтдаа гайхалтай хөл нийлж 2007 оны Аваргуудын лиг, Италийн Супер цом, Клубын дэлхийн аваргад түрүүлж хетр-трик хийж байлаа. 2004 оны домогт Пеле бүх цаг үеийн хамгийн шилдэг 100 хөлбөмбөгчдийн жагсаалтдаа Кафуг багтаасан байна. Харамсалтай нь бас ахихийн хэр Кафу шигшээ багтаа дуудагдах нь цөөрч, сэлгээний сандалд ихэнхидээ суух болсон. Иймээс 2006 оны дэлхийн аваргын дараа Кафу шигшээ багаасаа зодог тайлж байгаагаа зарласан юм. Түүний Бразилийн өмсгөлтэй оролцсон хамгийн сүүлчийн тоглолт Испаний шигшээн эсрэг байсан бөгөөд Кафу багийн ахлагчаар энэ тэмцээнд сүүлчийн удаа оролцжээ. 2008 онд Кафу клубын карьераа өндөрлүүлж хөлбөмбөгөөс бүрмөсөн зодог тайлж байгаагаа зарлалаа. Миланы дэд ерөнхийлөгч түүний зодог тайлах ёслол дээр хэлсэн үгэндээ Кафуд Миланы хаалга үргэлж нээлттэй байх болно гэдгийг дурьдсан юм. Мэргэжлийн хөлбөмбөгт нийт 20 гаран жилийг өнгөрүүлэхдээ Кафу нийт 525 тоглолтонд оролцож 18 гоол оруулжээ
.
Роберто Карлос (Бразил)

Роберто Карлосыг ямар агуу хөлбөмбөгч вэ гэдгийг нотлохын тулд олон янзын тоо баримт дурьдах шаардлага огт байхгүй. Ердөө л түүний 1997 онд Францын багийн хаалганд оруулсан гоолыг харахад л хангалттай. Хаалганаас бараг 35  орчим метрийн зайнаас гүйцэтгэсэн түүний чөлөөт цохилтын эсрэг тухайн үеийн шилдэг хаалгач Фабьен Бартез юу ч хийж ч чадалгүй гоол алдсан юм.
Энэхүү гайхалтай гоолоос нэг жилийн дараа Карлос шигшээ багтайгаа хамт Франц 98 дэлхийн аваргад  оролцож мөнгөн медаль хүртсэн бөгөөд бүх тоглолтонд гараанд гарч багийнхаа зүүн жигүүрээ эзэгнэж байлаа. Харамсалтай нь Францтай хийсэн аваргын төлөөх тоглолтонд Бразилийн хамгаалагчид Зинедин Зидан хэмээх гайхалтай тоглогчийг яаж ч хичээгээд зогсоож чадаагүй  юм. Роберто Карлос хэдийгээр 1992 онд анх шигшээ багтаа дуудагдсан ч 1994 оны дэлхийн аваргын бүрэлдэхүүнд багтаж чадаагүй юм.  Харин 2002 онд Карлос карьерийнхаа оргил амжилтанд хүрч багийнхаа андуудын хамт дэлхийн аварга хэмээх нэр хүндтэй шагналыг хүртэж чадсан юм. Карлос хэдийгээр хамгаалалтанд тоглодог ч гэсэн үргэлж урагшаа довтлож байгаанхаа довтолгоонд  оролцдогоороо онцлогтой. Мэргэжлийн хөлбөмбөгт нийт 719 тоглолт хийхдээ 90 гоол оруулсан нь түүний ямархуу гоолын мэдрэмжтэй болохыг нотолно. Роберто Карлос Бразилийн зүүн жигүүрийг олон жил амжилттай хамгаалснаас гадна Реал Мадридийн зүүн талд өөрийнхөө ноёрхлыг 10 гаран жил тогтоосон гэхэд болно. 1996 онд Карлосыг Реал Интерээс худалдан авсан бөгөөд Интерт байхдаа Карлос жигүүрийн хагас хамгаалагчаар хэсэг хугацаанд тоглож байжээ. 2000 он гарсны дараа Реал Мадридад томоохон шинэчлэлт хийгдэж Флорентино Перезийн алдарт Галактико төлөвлөгөө хэрэгжиж эхэллээ. Олон зуун сая еврогийн хөрөнгө зарсан энэ аварга төлөвлөгөөний нэгэн хэсэг бол яах аргагүй Роберто Карлос байлаа. 2002 оны Аваргуудын лигийн финалд Карлос Зиданы гайхалтай гоолын дамжуулалтыг өгч 3 дахь удаагаа энэ нэр хүндтэй тэмцээний ялагчаар тодорсон юм. Өмнө нь тэрээр 1998, 2000 онуудад аваргуудын лигт Реалтай хамт түрүүлсэн байдаг. Харин Ла лигийн аваргаар 1997, 2001, 2003, 2007 онуудад тодорч байсан юм.
Шигшээ багийн анд Кафугийн адил 2006 оны дэлхийн аварга бол түүний оролцсон хамгийн сүүлчийн томоохон тэмцээн болсон. Сүүлчийнхээ дэлхийн аваргад Карлос өөрийнхөө дархан зүүн жигүүртээ тоглож шөвгийн найм хүртэл тэмцсэн ч Францын багт ялагдал хүлээж тэмцээнээ өндөрлүүлжээ. Тэр тоглолтын дараа Карлосыг муу тоглосон гэж шүүмжлэх хүн олон байлаа. Учир нь Тьерри Анригийн гоолын үеэр Роберто Карлос алдаа гаргаж Анриг хаалгачийн эсрэг ганцаар тулах боломжыг олгосон юм. Гэхдээ Карлос хөлбөмбөгийн ертөнцөд байгуулсан гавьяа зүтгэлийг юугаар ч бүдгэрүүлэх аргагүй. Мадрид дахь сүүлчийн улиралдаа Карлос тун гайхалтай тоглож Испаний лигийн түрүү хүртсэн бөгөөд Испаниас явсаныхаа дараа Туркийн аварга Фенербахче багтай 2 жилийн гэрээ байгуулж олон мянган фенүүдээр угтуулан анхныхаа тоглолтыг хийж байлаа. Харамсалтай нь Фендербахче улиралын төгсгөлд лигийн титмээ Галатасарайд алдаж аваргуудын лигээс хасагдсанаар карлос ямар ч цомгүй хоцорсон. Энэ явдал Карлосын урмыг маш их хугалсан бөгөөд дараагийн улиралд Туркаас явах болсноо зарлажээ. Ингээд 2009 оны өвөл Роберто Карлос нутгийнхаа Коринтианс багтай гэрээ байгуулж цаашдын карьераа үргэлжлүүлэхээ шийдсэн юм. Энэ жилийн дэлхийн аварга шалгаруулах тэмцээнд Карлосыг харахыг хүсэж байгаа олон хүн байгаа. Мөн шигшээн менежер Дунга ч карлосыг форм сайн байвал өмнөд африк явах  бүрэлдэхүүндээ багтаах боломжтой гэдгээ өгүүлсэн юм.

Сами Хуупиа (Финлянд)

Хуупиа бол Ливерпулийн амин сүнс, өнгөрсөн 10 жилд  үзүүлсэн амжилт болгоных нь амин сүнс байсан юм. 1999 онд түүнийг Ливерпуль ирэх хүртэл Улаануудын хамгаалалт тийм ч сайн байгаагүй. Харин Хуупиа ирснээр тэд хоёрдугаар давхарт хэнд ч дээрэлхүүлэхээргүй болж чөлөөтэй довтлох боломжтой болсон юм. Хотон шувуунуудад ирэхээсээ өмнө Хуупиа Финляндын Ма Па, Виллем гэсэн жижиг багуудад тоглож байлаа. Тийм ч учраас Ливерпулийн фенүүдийн ихэнхи нь хөлбөмбөгийн мэргэжилтнүүд ч түүнийг үл тоомсорлосон байдалтай угтаж авсан юм. Зарим нь бүр ямар ч хэрэгггүй наймаа гэж дүгнэж байлаа. Гэхдээ тэдний буруу байсан гэдгийг Хуупиа маш богино хугацааны дотор нотолж чадсан бөгөөд Стефан Хенчозтой төвийн шугамын найдвартай хослолыг Ливерпульд бүрдүүлжээ. 2001 оны улиралаас Хуупиа,  Робби Фаулертэй хамт багийн ахлагчийн үүргийг хуваалцах боллоо. Тухайн үеийн Ливерпульд Майкл Овен , Стивен Жеррард гэсэн довтолгооны эрч хүчтэй залуус гарч ирсэн бөгөөд Хуупиагийн төгс хамгаалалтай гайхалтай ойлголцож байлаа. Үүнийхээ хүчинд тэд Карлин кап, ФА кап болон УЕФА-гийн цомд түрүүлж хет-трик хийсэн амжилтаар 2001 оныг үдсэн билээ. Энэхүү улиралын дараа Ливерпулийн ахлагч байсан Жэйми Реднап зодог тайлж Фаулер багаа орхисон тул багийн ахлагчийн тууз Хуупайд ирсэн юм. Хуупиа төвөийн  хамгаалагч хүн гэхэд шар улаан хуудсыг карьерийнхаа туршид харьцангуй цөөхөн хүртэж байсан юм. Түүний карьерийн цорын ганц улаан карт 2003 улиралд Манчестер Юнайтедийн эсрэг хийсэн тоглолтонд ирсэн бөгөөд Рууд Ван Нистелрой дээр алдаа гаргасан хэмээн талбайд шүүгч Хуупиаг улаан хуудсаар торгож байлаа. Хожим энэ талаар Хуупиа дурсахдаа ”Би яаж тийм мөчийг мартах билээ дээ. Миний карьерийн цорын ганц улаан карт тэр байсан. Рууд миний хажуугаар өнгөрөхөд  нь би цамцнаас нь бага зэрэг татах нь татсан. Гэхдээ шүүгч улаан хуудас өргөсөн нь арай л хэтрүүлсэн хэрэг байсан юм. Хувцас солих өрөөнд ороод би үнэхээр уурлаж байсан юмдаг” гэжээ

Цаг хугацаа өнгөрсөөр Ливерпульчууд 2001 оны гайхалтай улиралаас хойш цом шагнал хүртэж чадахгүй л байлаа. Ингээд эцэст нь Жерар Ульег ажлаас нь чөлөөлж Испани мэргэжилтэн Рафаель Бенитез Ливерулийг удирдахаар боллоо. Энэ үеэс Бенитез Хуупиагийн хамтрагчаар Жэйми Каррагерийг томилсон нь нүдээ олсон хэрэг байв. Тэд хамтдаа төвийн шугамын хүчирхэг хослолыг үүсгэж 2005 оны аваргуудын лигийн түрүү хүртсэн Ливерпулийн амжилтын цөм болсон юм. Мэдээж хэрэг энэ гайхалтай улиралын дараа Хуупиа багаа орхихийг хүсэх нь байутгай шинэ гэрээ байгуулж зодог тайлтлаа Ливерпульдээ тоглоно гэдгээ амласан юм. Тэр өдрөөс хойш олон удаа Хуупиад өндөр цалинтай ашигтай гэрээг дэлхийн шилдэг багууад санал болгож байсан ц Хуупиагийн зүрх сэтгэлд зөвхөн нэг л баг байсан бөгөөд тэр нь мэдээж Ливерпуль. Рафаель Бенитез  Хуупиагийн дадлага туршлагаар Мартин Шктрел, Даниель Аггер зэрэг залуу хамгаалагчдаа сургаж ирээдүйн залуу халаагаа бэлдэж байлаа. Ливерпулийн домог Иан Раш нэгэнтээ ”Хуупиа бол Улаануудын хийсэн хамгийн сайн наймаа. Түүнгүйгээр Ливерпуль өнгөрсөн 10 жилд нэг ч цом хүртэж чадахгүй байсан” хэмээсэн удаатай. Үнэхэээр ч ноён Раш  даваадуулсан хэрэг бус Финлянд залуугийн өндөр нуруу, ухаалаг тоглолт, тоглолтыг мэдрэх чадвар нь Ливерпулийг олон тоглолтонд ялагдахаас аварч байсан нь гарцаагүй.
Хуупиагийн Анфиелд дахь сүүлийн тоглолт 2009 оны 4 сард Тоттенхэмийг 3 : 1-ээр ялсан тогллтонд тохиосон бөгөөд Стивен Жеррард домогт Финлянд эрд багийн ахлагчийн туузыг өөрөө зүүж өгч байлаа. Ийнхүү түүний Ливерпультай холбогдсон 10 жилийн түүх өндөрлөж цоо шинэ амьдрал цоо шинэ адал явдалтай учрахаар Хуупиа Германы Бундеслигийг зорьсон юм.
Мэдээж хэрэг Хуупиаг эгнээндээ нэгтгэсэн Байер Леверкузений тоглолт эрс дээшилж одоо лигийн хүснэгтийг тэргүүлж байгааг санамсаргүй амжилт гэж хэн ч хэлэхгүй. Яагаад гэвэл Хуупагийн өнгөрсөн10 жилд юу хийж чаддаг ямархуу потенциалтай тоглогч вэ гэдгийг дэлхий даяар мэддэг болсон учир нэг багийн хамгаалалтыг хөл дээр нь босгох түүний хувьд энгийн л зүйлийн нэг бизээ. Ливерпулийн өмсгөлтэйгээр Хуупиа нийт 459 тоглолтонд оролцсон нь тус багийн түүхэнд нилээд дээгүүр бичигдэх амжилт юм. Финляндын шигшээ багт ч мөн Хуупиа хамгийн олон тоглолтонд оролцсон амжилтыг эзэмшдэг аж.

Макелеле  (Франц)

Ер нь ДМ буюу хамгаалах чиглэлийн хагас хамгаалагчийн байрлалыг Макелеле гээд нэрлэчихэд нэг их андуурагдаад байх зүйл гарахгүй л болов уу. Мэргэжлийн хөлбөмбөгт Макелеле энэ байрлалыг ямар үнэ цэнэтэй ямар үүрэг рольтой болохыг өөрийн биеэр харуулж, баталсан болохоор арга ч үгүй биз. Тэрээр Францын шигшээ багт тоглодог ч Заир улсад ядруухан гэр бүлд мэндэлсэн гэдэг. Түүний эцэг нь Конгийн шигшээ багт тоглодог мэргэжлийн хөлбөмбөгч байсан ч 16 нас хүртлээ Макелеле гудамжанд тоглох маягаар л өөрийгө боловсруулж байлаа. Харин 1989 онд хүүгийн амьдралд алтан боломж олдож Францын доод лигийн багт суралцах боломж олдсон юм. 16 нас хүртлээ гэрээсээ холдож үзээгүй түүний хувьд Франц дахь амьдрал нь эхэндээ үнэхээр хүнд байдаг байлаа. Гагцхүү эцгийнхээ зааж зөвлөсөнөөр шаргуу хичээллэж шилдэг тамирчин болох хүсэл нь л түүнийг бууж өгөхөөс авардаг байв. Эцэст тэр санасандаа хүрч Нант багийн скаутад тоогдсон бөгөөд тухайн үед Нантад Эманүель Петит хэмээх ДМ ид гялалзаж байсан үе билээ. 170 см гэдэг Европынхны хувьд дэндүү намханд тооцогдоно. Гэхдээ л Макелеле биеийн харьцааг үл хайхран өөрөөсөө биерхүү том довтлогч нартай бөмбөгний төлөө үзэлцэж ихэнхидээ ялдаг байсан юм. 2001 онд Реал Мадрид түүнийг 14  сая еврогоор худалдан авлаа. Энэ үеэс эхлэн даржин цуглуулгатай байсан Макелелегийн шагналын өрөө цом шагналаар дүүрч амжилт ялалтыг ээлж дараалан байгуулж эхэллээ. Ла лиг, Аваргуудын лиг, Испани Европын супер цом гэх зэргээр энэхүү цуврал үргэлжилж байсан ч Реалын амжилтын гол үндэс нь Макелеле гэдгийг хүмүүс төдийлөн онцолсонгүй. Удалгүй Галактико төлөвлөө хэрэгжиж Роналдо, Зидан зэрэг супер одууд Эзэн хааны багт цуглаж эхэллээ. Эдгээр оддын авч байгаа цалингийн хажууд Макелелегийнх харьцангуй бага байсан бөгөөд Клод цалингаа нэмэхийг шаардсан нь зүй ёсны хэрэг байв. Гэвч Мадридийн удирдлага түүний саналыг хүлээж авахаас татгалзсан тул уурссан Клод багаа орхиж 2003 онд 16.8 сая фунтээр Лондоны Челси багт шилжжээ. Макелелег зарсан нь Галактикогийн төгсгөл байсан гэдгийг Фернандо Иерро хожим өөрийнхөө намтар номондоо бичсэн байдаг.  Макелелег зарж Бекхэмийг авчирсан явдал нь ямархуу наймаа үр дагавартай наймаа болсныг домогт Зинедин Зидан тэр үед маш онож хэлсэн. ”Ta Бентлэйнхээ моторыг алдчихаад шараад будуулаад хэрэг байна уу” хэмээн Зизу Переэз асууж байсан юм. Үнэхээр моторгүй Бентлэй хаашаа ч явж чадаагүйг та бүхэн сайн мэдэж байгаа.
Макелеле гэхдээ Челсид очсоноороо юу ч алдаагүй. Харин ч ихийг хожсон. Тухайн үеийн Челсигийн менежер Раньери Клодыг шинэ Челсигийн мотор болно хэмээн зөгнөсөн нь тун удалгүй биелэлээ олсон юм. Раниеригийн дараа ирсэн Жозе Моуриньогийн Макелелегийн багт гүйцэтгэх үүргийг маш сайн ажиглаж, Лампард Коул Роббен Дафф гэсэн дундын шугамын тоглогчидтойгоо гайхалтай хослуулж чадсан юм. Челси премьер лигийн аваргаар 2 жил дараалан тодорч, ФА цом, лигийн цомд түрүүлж аваргуудын лигт тогтмол плэй шатанд өрсөлддөг болсон нь мэдээж Макелелегийн оролцоотой холбоотой. ДМ-ийн байрлалын нэг дутагдалтай тал нь гоол оруулах баяр тэр мэдрэмжийг барагтай бол амсаж чаддагүй. Гэхдээ Клод Челсид байхдаа ямар ч байсан 2 удаа лигийн тоглолтонд айлын хаалгыг мялааж байсан. 2006 оны 11 сард Клод Тоттенхэмийн хаалганд 20 орчим метрээс гоол оруулсан бөгөөд оны төгсгөлд тэр энэ гоолынхоо ачаар хамгийн шилдэг мэргэн буучаар тодорч байсан байна. Учир нь Клодын хаалга руу цохисон ганцхан оролдлого нь гоол болсон тул ийнхүү 100 хувийн амжилтаар бусад мэргэн буучдыг ардаа орхисон хэрэг.
Челси дэх амжилттай карьераа 2008 онд тэрээр өндөрлүүлж нутаг буцахаар шийдлээ. Ингээд 7 сарын  21-нд Клод  багийн андууд фенүүдтэйгээр салах ёс хийгээд Парис руу нисэж PSG багтай гэрээ байгуулсан юм.
Макелелегийн шигшээ багийнх нь карьер ч гэсэн амжилт ялалтаар арвин. 1995–2008 оны хооронд хоёр ч дэлхийн аваргад оролцож байлаа. 2004 оронд Челси дэх карьертаа анхаарлаа хандуулахаар шигшээгээсээ зодог тайлсан боловч 2006 оны ДАШТ-ий өмнө Зидан, Тюрам гэсэн найдынхаа хамт эргэн ирж мөнгөн медаль зүүсэн билээ

Алессандро Неста (Итали)

Алессандро Неста бол байгалиас заяасан авьяаслаг тогглогч. Миланы төвийн хамгаалагчын байрлал дээр Неста 2002 оноос хойш амжилттай тоглож байгаа юм. Гэхдээ карьерийнхаа эхний жилүүдэд Неста хамгаалагч бус хагас хамгаалагчийн байрлал дээр тоглодог байсан бөгөөд Лациогийн академд суралцаж байхдаа өнөөгийн төвийн хамгаалагчийн байрлалаа олж авсан гэдэг. Залуу авьяастныг хамгийн анх анзаарч өөрийнхөө багт нэгтгэх гэж оролцсон баг бол Рома. Гэсэн хэдий Нестагийн аав Лациогийн үнэнч балиашиг байсан тул мэдээж тэдний саналыг хүлээж аваагүй. 1993 онд Неста эрийн цээнд хүрч Лациогийн үндсэн багт анхны тоглолтоо хийлээ. Гэвч  бэлтгэлийн үеэр багийн анд Пол Гаскойны хөлийг хугалснаар Нестагийн Лацио дахь карьер хар дурсамжтайгаар эхэлсэн юм. Лациогийн дэмжигчдийн хувьд эрч хүчтэй  хүчирхэг төвийн хамгаалагчтай боллоо гэдгэээ ийнхүү мэджээ. Жил өнгөрөх тусам Нестагийн оролцох тоглолт гүйцэтгэх үүрэг нь Лациод нэмэгдэж байлаа. 1998 онд тэрээр карьерийнхаа анхны цомыг Бүргэдүүдтэй хамт хүртсэн бөгөөд Италийн цомын финалд АС Миланыг ялахад өөрөө гоол оруулсан юм. Энэ цом нь Лациогийн дараа дараагийн амжилуудын эхлэл болсон бөгөөд 1998 онд Италийн супер цом, 1999 онд цомтой багуудын цом хүртэж улмаар 2000 онд олон жил хүсэн хүлээсэн Италийн лигийн аварга цолоо эргүүлэн авч чадсан юм.  Павел Недвед, Синиса Михайлович гээд олон тоглогчид тэдний энэ амжилтад нөлөө үзүүлсэн боловч багийн ахлагч Алессандро Нестагийн гавьяа зүтгэл хамгийн их байсан нь дамжиггүй. Харамсалтай нь энэ амжилттай жилүүдийн дараа Лацио санхүүгийн хямралд өртөж гол тоглогчдоо зарахаас өөр аргагүй болсон бөгөөд АС Милан энэ боломжыг ашиглан 30  сая еврогоор Нестаг өөрийнхөө эгнээнд нэгтгэжээ. Үүнээс нэг жилийн өмнө Милан Нестаг авахаар 50 саяыг санал болгож байсан Лацио хүлээж аваагүй гэдэг. 2004 онд Неста карьерийнхаа хоёр дахь скудеттог Милантай хамт  хүртлээ. Тухайн үеийн Миланд Андрэй Шевченко, Кака гээд олон гайхалтай тоглогчид нэгэн дор цуглараад байлаа. Тийм ч учраас Сери А лигт түрүүлэхдээ хоёрдугаар байранд орсон Ромагаас 10 гаран оноогоор тасарсан байсан юм.
Милан дахь Нестагийн карьер амжилтай үргэлжилж, аваргуудын лиг, италийн цом, оиталийн супер цомоор шагналынхаа цуглуулгыг арвижууллаа. Мэдээж хэрэг 2005 оны аваргуудын лигийн финал бол түүний карьерийн хар дурсамжуудын нэг болон үлджээ. 2006-07 оны улиралын ихэнхийг Неста өвдөгний бэртлээс болж өнжсөн. Гэхдээ аваргуудын лигийн финалд Ливерпулийн эсрэг ногоон талбайдаа эргэн ирсэн бөгөөд гайхалтай ялалтынхаа дараа 2011 он хүртэл багтаа үлдэхээр болсон юм.
2008–09 оны улиралд Нестаг өөр нэгэн бэртэл зовоож эхэллээ. Нурууны хүнд бэртлээс болж улиралын ихэнхийг сэлгээний сандалд өнгөрүүлсэн Нестаг бэртлээсээ эргэж ирээд дахин өндөр түвшний тоглолтоо үзүүлж чадна гэхэд олон хүн эргэлзэж байв. 2009 оны 10 сард Неста Кьевогийн хаалганд дубль хийсэн нь карьерийнхаа туршид нэг тоглголтонд хоёр гоол оруулсан цорын ганц тохиолдол нь болж байв.
Италийн шигшээ багт багт өнгөрсөн 10 жилд хамгаалалтын гол ноён нуруу болж байсан гэхэд хилсдэхгүй. Түүний оролцсон анхны олон улсын тэмцээн нь 1996 оны Европын аварга байсан бөгөөд 98 оны дэлхийн авага, 2000 оны Европын аварга, 2002 оны дэлхийн аварга гээд Италий шигшээн бүх хүнд хэцүү цаг үеүүдийг хамтдаа тэр даван туулсан юм. Хамгийн харамсалтай нь Нестад европ дэлхийн аваргын шийдвэрлэх тоглолтын өмнө ямар нэгэн бэртэл аваад оролцож чадаагүй тохиолдол цөөнгүй байгаа. 1998 оны Дэлхийн аваргад л гэхэд Австрийн эсрэг хийсэн тоглолтонд шагайгаа бэртээж багтаа төдийлөн тус болж чадаагүй бол 2002 онд өмнөд Солонгосын эсрэг бас л гарч чадаагүй гэдэг. 2006 оны ДАШТ энэ агуу хамгаалагчийн Аззуригийн төлөө зүтгэсэн сүүлчийн тэмцээн байсан юм. Энэ тэмцээний дараа Неста шигшээ багаасаа зодог тайлж байгаагаa зарласан билээ.

үргэлжлэл бий…