Хоёрдугаар сарын эхний өдөр буюу өнөөдөр Габриэль Батистута буюу “Батигоал” 40 насны босгонд хүрлээ. Флоренцийн “Фиорентина” багийн зүрх нь болж явсан энэ залууг одоо ч тэнд ихэд эрхэмлэн хүндэлдэг.Хэдийгээр тэр Сери А-д “Рома”-д тоглон түрүүлж, хөлбөмбөгчний замналаа Катарт өндөрлүүлсэн ч гэсэн “Фиорентина” түүний амьдралын баг нь байсан билээ.

Флоренцийн багт тоглосон сүүлийн улиралдаа “дөнгөж” 23 гоал оруулсан түүнийг Чекки Гори “Урьдын Батигоал биш болжээ” хэмээгээд зарахаар хөөцөлдсөн түүхтэй. Гэвч “Фиорентина”-гийн ерөнхийлөгч Гори төдхөн энэ шийдвэрийнхээ төлөө харамсахаас өөр аргагүй болсон. Учир нь “Рома”-д очсон Батигоал хуучин багийнхаа хаалганд төдөлгүй хожлын гоал оруулж амыг нь тагласан билээ.

Тухайн үед “Рома”-г удирдаж асан Фабио Капелло “Батистута ирээгүй бол бид Сери А-д түрүүлж чадахгүй байсан” хэмээн мэдэгдэж байсан. Тэр нийслэлийн багт гурван жил тоглоод дараа нь “Интер”-т очихдоо бараг зодог тайлах дөхсөн байлаа. “Интер”-т ирээд хагас жилд хоёр л гоал оруулж сэтгэлээр баахан унасан тэрбээр Катар руу одсон. Батистута Италид хүртэж болох бүхий л шагналыг авсан, бас Аргентиний шигшээ багтайгаа Өмнөд Америкын аваргын алдрыг хоёрантаа хүртсэн билээ.

Гэхдээ л тэр Дэлхийн аварга болон Европын багуудын тэмцээнд олигтой амжилтад хүрээгүй. “Фиорентина” түүний үед үнэхээр сайн баг байсан ч чухал ялалт байгуулахад дандаа бага зэрэг азгүйтдэг байв. Батигоалыг 1997 онд “Интер” 35 саяар худалдан авах хүсэлтээ тавихад нь Флоренцийг орхих ёстой байсан гэж үздэг хүмүүс бий. Гэвч аргентин эр үлдэх нь дээр гэж үзсэн юм. “Фиорентина” төдхөн л аварга болчих юм шиг санагдаад байсан хэрэг. Гэвч тэдэнд ямар нэгэн зүйл дутсаар энэ алдарт хүрч чадалгүй өнгөрсөн.

1996 оны Италийн цомын тэмцээнд Батигоал жинхэнэ баатар болсон. Тэр олон жилийн турш томоохон амжилтад хүрч чадаагүй асан Флоренцийн багт ялалтын амтыг дахин мэдрүүлсэн гавьяатай. Дараа нь тэд супер цомд “Милан”-ыг сөгдүүлэн түрүүлэхэд Батигоал гоал оруулаад “Ирина, би чамд хайртай” хэмээн зурагтаар эхнэртээ хайраа илчлэн гүйсэн нь олны сэтгэлд тод үлдсэн гэдэг.

Гэхдээ флоренцчүүд түүнд үүнээс өмнө аль хэдийнэ дурлачихсан байсан. Учир нь Батигоал Сери В рүү багаа унахад өөр багт одолгүй, туслахаар үлдэж байсан нэгэн. Батигоал Сери А-д “Фиорентина”-тай түрүүлж чадаагүй ч Сери Б-д түрүүлж байсан билээ.

1998/1999 оны улирлын эхний хагаст “Фиорентина” Сери А-г тэргүүлж байсан ч барианд гуравт орсон удаатай.

Амжилтын хуудас

Габриэль Омар Батистута
Төрсөн огноо: 1969.02.01

Төрсөн газар: Аргентин. Авельянда
Багууд: “Ньюэллс Олд Бойз” (1988—1989), “Ривер Плейт” (1989—1990), “Бока Хуниорс” (1990—1991), “Фиорентина” Итали (1991—2000), “Рома” (2000—2003), “Интер” (2003), “Аль-Араби” Катар (2003—2005).
Шигшээ баг: (1991—2002), 78 тоглолт, 56 гоал.

Амжилт: Италийн аварга (2000/2001), Италийн супер цомын аварга (1996, 2001), Италийн цомын аварга (1995/1996), Сери Б-гийн аварга 1993/1994), Сери А-гийн шилдэг мэргэж бууч (1994/1995), Өмнөд Америкын аварга (1991, 1993), Өмнөд Америкын аварга шалгаруулах тэмцээний шилдэг мэргэн бууя 1991 (6 гоал), Аргентины шилдэг хөлбөмбөгчин (1998).