“Кливленд” – “Орландо” – 115:106 (37:23, 29:40, 21:20, 28:23)

К: Жеймс – 32 + 13 дамжуулалт + 8 самбар. Хиксон – 20. Варежао – 16.

О: Дуайт Ховард – 19 + 11 самбар. Льюис – 19. Картер – 14.

Кавальерс Шакийг авсан гол шалтгаан нь Дауйт Ховардийг 2 тоглогчоор хамгаалуулахгүй гэсэн бодол байж болох юм. Энэ 2 баг өнгөрсөн жилийн бүсийн аваргын төлөө таарч тоглож, Орландо ялагч болж байсан. Дуайт өөр дээр нь давхар хамгаалалт хийх үед бөмбөгийг багийнхаа холын сайн шидэгч нарт дамжуулж, сул гарсан тоглогчид нь оновчтой шидэлтүүдийг хийдэг. Энэ бол Мэжикийн гол тактик.

Шак ирснээс Дуайт дээр дабл-тим хийх хэрэггүй болсон нь өнөөдөр харагдаж, Кавальерс талбай дээрээ Орландог хожиж, Бүх оддын тоглолтын завсарлагыг 13 дараалсан хожлоор угтлаа. “Би хэзээ ч хэн нэгнийг дабл-тим хийж хамгаалж байгаагүй. Тэгэхээр хэн нь жинхэнэ супермэн болохыг хэлдээ” хэмээн Шак хэлжээ.

Дуайт өнгөрсөн плей-оффт Кавальерсийн эсрэг хийсэн 6 тоглолтонд дунджаар 25.8 оноо, 13 самбараас авалт хийж байсан бол энэ улиралд хийсэн 2 тоглолтондоо дунджаар 15 оноо, 9 самбараас авалт хийлээ.

Кавальерс энэ улиралд Лейкерс, Мэжикийн эсрэг 4 тоглохдоо 4 хожоод байна. Гэхдээ ЛеБрон: “Бид 2007 онд Спэрсийг улирлын тоглолтонд таарах бүртээ хожсон ч шигшээд хожигдсон…Улирлын тоглолтуудад хожих нь сайн хэрэг боловч плей-оффт бүх зүйл 0-0 гэж эхлэх болно” гэж хэлжээ.

“Денвер” – “Сан-Антонио” –  92:111 (29:32, 16:22, 25:29, 22:28)

Д: Нене – 20 + 9 самбар. Энтони – 19. Биллапс – 17

СА: Хилл – 17. Блэир – 17 + 9 самбар. Данкан – 16.

Спэрс Наггетсийг талбайд нь хожлоо. Энэ улиралд тэд талбай дээрээ Наггетстай 2 тоглохдоо 2-ууланд нь хожигдоод байв. Хэдий Тони Паркер тоглоогүй ч Жорж Хилл түүнийг сайн орлож, багаа оноогоор тэргүүлжээ.

“Энэ бол энэ улиралд бидний эхний хагастаа хамгийн сайн хамгаалсан 3 юм уу 4 тоглолтын нэг боллоо. Ер нь бид өнөөдөр энэ улиралд хийж байгаа тоглолтоосоо хавьгүй илүү тоглосон ” гэж Попович хэлжээ.

Наггетсийн Кармело гэмтлээсээ эргэн ирээд 2 дахь тоглолтондоо оролцсон ч даруухан байж, 19 оноо авчээ. Гэхдээ Наггетсд хамгийн сайн хамгаалалттай тоглогч нь болох Кенион Мартин нь дутагдаж байв. Наггетс энэ улиралд талбай дээрээ 28 тоглохдоо 4 дэхээ хожигдсон нь энэ.