Даллас хотноо болж өнгөрсөн Бүх Оддын тоглолтын хажуугаар солилцоо наймааны цонх хаагдах гээд багуудын менежерүүд завгүй ажиллаж байна.

Бямба гаригийн Бүх Оддын тоглолтын өмнө нэгэн шуугиантай наймаа явагдсан нь Вашингтон, Даллас багуудын хооронд болсон 7 тоглогч оролцсон наймаа байлаа. Даллас багт 2003 онд дарфтын 29-өөр шалгарснаасаа хойш хүчин зүтгэсэн Жош Ховард болон өнгөрсөн зун ирсэн Дрю Гуден, Куинтон Росс, Жеймс Синглтон нарыг нийслэл хот руу үдэж хоёр удаагийн Бүх Одод Кэрон Батлер, төвийн тоглогч Брэндон Хэйвүд, хамгаалагч Дешон Стивенсон нарыг багтаа авчээ.

Даллас багийн менежер Донни Нельсон энэхүү наймаа хийх шийдвэрээ гаргасны дараа “Манай багт анхнаасаа хүчин зүтгэж байсан Жош Ховардыг явуулна гэдэг үнэхээр хэцүү шийдвэр байлаа. Гэхдээ Батлерыг олж авах боломжийг алдахыг хүссэнгүй” гэсэн бол багийн эзэн Кубан “Энэ наймааг хийснээр манай багт илүү ашигтай гэж бодож байна. Бид одоо урагшаа давших л үлдлээ” гэжээ.

Тэгвэл Вашингтон баг энэ наймааг яагаад хийх болов оо гэсэн асуулт газар авч байна. Багийн ерөнхийлөгч Эрни Гранфилд “Манай баг энэ улиралд ямар хэцүү байгааг бүгд мэдэж байгаа. Манай багт шинэ уур амьсгал, шинэ сэргээх хүч хэрэгтэй байгаа учраас энэ наймааг хийлээ. Ирж байгаа дөрвөн тоглогч ийм байдлыг үүсгэж чадна. Бид энэ улиралд өрсөлдөгч байхыг хүсч байна. Бидэнд өөрчлөлт хэрэгтэй байсан. Үүнийгээ л хийлээ” гэжээ. Тэд мөн энэ наймааг хийснээрээ 14,6 сая долларыг цалингийн цэснээсээ хэмнэж байгаа юм.

Жош Ховард Дирк Новицкигийн дараа орох Далласт одоогоор тоглож буй тоглогчдоос хамгийн удаан багтаа тоглосон тоглогч байсан юм. Энэ улиралд бэртэл гэмтлээс болж төдийлэн тоглолтоо гаргаж чадахгүй байгаа түүнийг ийнхүү үдлээ. Тэр мөн талбайн гаднах байдлаараа ч олны анхаарлыг татдаг. Нэгэн радиод марихуан үе үе татдаг тухайгаа өгүүлж, америк хөлбөмбөгийн тоглолтын өмнө төрийн дуулалд хүндлэл үзүүлээгүйгээрээ асуудалд орсон гээд сахилгагүйтлын мэдээ нь мэр сэр гардаг. Дрю Гуден НБА-д найман улирал тоглохдоо найм дахь багийнхаа төлөө тоглох нь. Брэндон Хэйвүүд энэ улиралд 9,6 оноо, 10,3 самбараас авалт дунджилж байгаа. Харин Кэрон Батлерын хувьд 16,9 оноог энэ улиралд дунджилж байгаа билээ.

Энэ наймааны тухай Жейсон Кидд “Бид хамтдаа тийм ч сайн тоглосонгүй. Одоо шинэ тоглогчид ирээд бид хурдан формондоо орж шилдэг тоглолтоо үзүүлэхийг хүсч байна. Бидэнд 30 тоглолт үлдлээ. Энэ бол марафон биш ойрын зайн уралдаан л гэсэн үг.  Бид сүүлийн 7 тоглолтонд 5 ялагдсан байгаа. Харин энэ наймаа бидэнд их тус хүргэнэ гэж бодож байна” гэжээ.