Лион – Реал Мадрид

Хасагдах шатанд Реалтай таарахаас бүх багууд жийрхэж байсан гэхэд хилсдэхгүй. Хэсгийн шатанд гоолыг ар араас нь бөмбөгдөж байсан Роналду ид формондоо байгаагаас гадна Гранеро, Иугайн зэрэг залуус ямар ч супер хамгаалалтыг бут цохихоор хүчтэй байгаа. Лионы хувьд сүүлийн 7 жилийн гайхалтай амжилтын гол үндэс Жуниньогоо алдсанаас гадна ирээдүйн залуу халаа Карим Бенземагаа 35 сая еврогоор зарчихсан. Одоо Бензема нь Мадридадийн багийн мэргэн буучдыг тэргүүлж байгаа.  Португаас авсан Лисандро Лопез нь хурдан идээшиж гоолын онгодтой байгаа ч тааруухан хамгаалатаасаа болж хэрэггүй тэнцээ ихийг хийж лигийнхээ хүснэгтэд 4-р байранд жагсаж байгаа юм. Мэдээж бооцоо тавигчдийн ихэнхи хэсэг нь Реалд ялалтыг өгч байгаа ч Перезийн Галактико чууд  Барсагаас илүү гарч чадахгүй байгаа нь эргэлээ үүсгэж байна. Лион бол амархан мөчөөгөө өгөх баг ч бас биш.

Плэй -офф хүрэх замдаа

Лион : Өнгөрсөн жилийн тааруухан амжилтаасаа болж (3-р байр) Лиончууд сүүлийн 9 жилд анх удаа хэсгийн шатнаас бус урьдчилсан шатнаас аваргуудын лигийг эхлүүлсэн. Гэсэн ч тэд Бельгийн номер нэг баг Андерлехтийг хоёр тоглолтонд илт илүүрхэж 8 : 2-ийн харьцаатай буулган авсан юм. Португаас 28  сая еврогоор авсан Лисандро Лопез шинэ багтаа хурдан идээшиж байгаагаа харуулж 4 гоолоор Бельгийн багийн хаалганд оруулжээ. Улмаар E хэсэгт Ливерпуль, Фиорентина, Дебречен багуудтай нэг хэсэгт багтсан. Хэсгийн эхний тоглолтдоо энэ жилийн аваргуудын лигийн хамгийн том шуугианыг дэгдээсэн Фиорентинаг 1 : 0-ээр ялж дараа нь Унгарын аварга Дебреченийг 4 : 0-ээр ”ниргээд” л өнгөрсөн. Удаахь 2 тоглолтдоо  ”хямрал”-тай байсан Ливерпулиэс 4 оноо зулгааснаар  Лионы хэсгээсээ шалгарах зам шулуудсан юм. Ялангуяа Анфиелдэд байгуулсан гайхалтай ялалт нь клубын түүхэнд бичигдсэн үлдсэн бөгөөд аваргуудын лигт Английн багийг буулган авсан анхны тохиолдол нь болжээ. Гэсэн хэдий ч  5-р тойрогт талбайдаа Фиорентинатай тоглохдоо Хуан Мануель Варгас хэмээх ”жаалыг” барьж чадагүйнхээ гайгаар 1 : 0-ээр ялагдаж хэсгийн 1-р байр ”асуудалтай” болж ирсэн. Сүүлийн тойрогт Дебреченийг ”уламжлал ёсоор” 4 : 0-ээр ниргэсэн ч эсрэг талд нь Виало Ливерпулийг ”дөнгөсөн” тул 13 оноотойгоор хоёрдугаар байраар хасагдах  шатанд үлдсэн. Ийнхүү тэд сүүлийн 7 жил дараалан аваргуудын лигийн шөвгийн 16-д үлдэж чаджээ.

Цюрихт явагдсан плэй-оффын оноолтоос өмнө Лионыг энэ жил нилээд дээгүүр ”үзэх” болов уу гэх хүмүүс цөөнгүй байсан. Гэвч баг болгоны жийрхэж байсан Эзэн хааны багтай таарсан нь Францын ”дархан аваргуудын” ирээдүйг бүрхэг болгоод байна.

Реал Мадрид

Эзэн хааны баг С хэсэгт Милан, Марсель, Цюрих багуудтай хамт багтсан. Эхний тоглолтоос эхлээд л дэлхийн хамгийн үнэтэй хөлбөмбөгч Роналду ”ид шидээ” үзүүлж гоолыг ар араас нь бөмбөгдөж байлаа. Цюрихийг 5 : 2-оор бутниргэхэд Ронни дубль хийсэн бол дараагийн тойрогт  Марселийн хаалганд мөн л дубльдэж ”баланс” барьжээ. Ийнхүү супер одуудынхаа ачаар Реал хоёрдугаар тойргийн дараа хэсгээ 100 хувийн амжилттай тэргүүлж байлаа. Харамсалтай нь Португал эрийн бэртэл Реалын амжилтыг тасалдуулж 3-р тойрогт тэд Сантьяго Бернабеу цэнгэлдэхдээ Миланд 3 : 2-оор ялагдсан. Миланы талбайд бас л ялалт байгуулж чадалгүй 1 оноотой буцсанаар тэдний байдал эвгүйдэж ирсэн ч дараагийн тоглолтдоо Марселийг Иугайний гоолоор буулган авснаар хэсгээсээ гарах болзлоо хангасан. Сүүлийн тойргийн тоглолтонд Роналду эргэн ирж дубль хийснээр хэсгийн шатны мэргэн буучаар 6 гоолтой тодорсон юм. Мөн Реал энэ шатанд хамгийн өндөр үзүүлэлт буюу нэг тоглолтонд дунджаар 2.5 гоол хийсэн үзүүлэлт үзүүлжээ

Сүүлийн үеийн мэдээ

Реал : Эзэн хааны баг Расингийн залуу од Серхио Каналесийг эгнээндээ нэгтгээд байгаа. 18 настай энэ залуу хагас хамгаалагч ирэх зургаан жилд Реал тоглох бөгөөд 4.5 сая евро болон нэмэлт нөхцөлүүдээр хоёр баг тохиролцжээ.

Карим Бензема хуучин багийнхаа эсрэг гарч магадгүй байна Хэдийгээр Реалын эмч нар түүний бэртлийг бүрэн эдгэрэх болоогүй байгаа гэсэн ч Карим өөрөө Лионд буцаж очихыг тэсгэлгүй хүсэж байгаа бололтой. Харин Гути, Ван дер Ваарт, Метзелдер нар бэртлийн улмаас Мадриддаа үлджээ.

Реалын хамгийн сул талыг хамгаалалт гэж хүн болгон ярьж байгаа. Тэгвэл Перез үүнд дүгнэлт хийж ирэх зуны наймааны цонхоор МанЮ-гийн Неманья Видичийг ”сугалахаар” төлөвлөөд байгаа гэнэ. Видич энэ улиралд бэртэл гэмтэлд их ороогдож байгаагаас гадна Сер Алекстэй тааруухан харилцаатай байгаа тул багаа орхиж магадгүй байгаа аж. Ойролцоогоор 20 сая фунтыг Реал түүнд санал болгох юм байна.

Лион

Францын багаас Камерун хагас Макоун торгуультай байгаа. Харин Миланд гологдсон Сиссоко бага зэргийн бэртэлтэй байж байгаад энэ тоглолтоос эргэн ирж байна. Лионы дасгалжуулагч Клод Пюэльд довтолгооны хослолоо сонгоход асуудал тулгараад байгаа бололтой. Учир нь Лисандро, Бастос, Гомиш, Гову, Делгадо нар бүгд сайн формтой байгаа юм.

Форм

Реал Мадрид

2 тоглолтоор торгуулаад байсан К.Роналду эргэн ирж гоолоо бөмбөгдөж эхэллээ. Хамгийн сүүлд Хересийн хаалганд дубльдэж багтаа 3 оноо авчирсан. Пеллегрини Гранерод итгэл хүлээлгэж гарааны эрх өгөх болсон нь алдаа болсонгүй. Кастильягийн хүү урамтай тоглолтыг үзүүлж фенүүдийн хайрыг татсаар байна. Тэд Барсагаас 2 оноо алдаж байгаа учир нэг бүдрэхэд л хүснэгтийг тэргүүлэх боломжтой. 22 тойргийн тоглолтонд 53 гоол оруулсан байгаа нь Барсатай адил үзүүлэлт.

Лион

2010 он гарснаас хойш ялагдал гээчийг амсаагүй байна. Хамгийн сүүлд Ленийг Делгадогийн гоолоор буулган аваад байгаа. Гэхдээ 4-р байрнаасаа ховхорч чадаагүй л байна. Хүснэгтийг тэргүүлж байгаа Бордогоос 8 оноо алдаж байгаа.