Өвлийн олимпийн наадмын нээлтийн ажиллагааны хамгийн их яригдсан, яригдаж үлдэх асуудал бол Гүржийн тамирчны үхэл, гал асаагүй хоёр байх төлөвтэй. Эзэн орныхон их бэлтгэж тал бүрээр чармайсан ч зуун зуунд дурсагдахуйц алдаа гаргачих юм аа. Бамбар асаахаар цучил бэлтгэсэн (нэг метр өндөр тайзны дороос гарч ирэх ёстой байсан) боловч нэг нь гацаад “болов” уу даа.

Нээлтийн ёслолд Монголын багаас багийн ахлагч (chef de mission), МҮОХ-ны Гүйцэтгэх зөвлөлийн гишүүн Л.Халтар, дасгалжуулагч, Монгол Улсын гавьяат тамирчин Л.Дорж, ОУХМ тамирчин Х.Хаш-Эрдэнэ, штабын ажилтан МҮОХ-ны спорт холбоод хариуцсан ажилтан П.Тунгалаг нар жагсаж, Монгол Улсын төрийн далбааг цанын спортын ОУХМ Эрдэнэ-Очирын Очирсүрэн залан оролцов. 21-р зууны 21-р олимпод 82 орны цас мөсний шилдгүүд эр чадал, авхаалж самбаагаа сорихоор ирсний дундаас “хувцасны хит парад”-ыг эндхийн нэртэй сонин “Ванкувер Сан” гаргажээ. Уг чансааг Мексикийнхэн өнгөлж, үндэсний хувцсаараа гоодсон манай тугч Очирсүрэн удаалсан аж. Ийнхүү олимпийн наадам эхлэхтэй зэрэгцээд ирсэн амжилт Монголынх байлаа.

Ванкувер хотоос тусгай сурвалжлагч Б.Цагаанбаатар