Германы Дюссельдорф хотноо жүдо бөхийн дэлхийн цомын тэмцээн буюу гран-при тэмцээн монголчуудын хувьд гайхалтай өндөрлөлөө. Хэдийгээр хоёр дахь манай хүнд жингийнхэн төдийлэн сайн барилдаж чадаагүй ч эхний өдөр үзүүлсэн амжилтаар Япон, Германы дараа л амжилтаараа эрэмбэлэгдлээ.

Гран-при тэмцээнд 4 тивийн 45 орны 354 тамирчин барилдсанаас 24 улсын бөхчүүд медаль энгэртээ зүүсэн юм. Харин Монголчууд 2 алт, 1 хүрэл, 3 шагналт 5-р байрыг эзэлснээр багийн дүнгээр Япон (6 алт, 5 мөнгө, 1 хүрэл), Германы (2 алт, 3 хүрэл) багийн дараа бичигдлээ. Монголчууд түүхэндээ дэлхийн цомын тэмцээн болон гран-при, их дуулгаас нийт 18 алтан медаль хүртэж байжээ. Түүний 11-ийг нь сүүлийн 2 жилд авсан байна.  Х.Цагаанбаатар баатар сүүлийн 2 жилд 3 удаа түрүүлж. Гадны хэвлэлүүдээр дэлхийн жүдод монголчууд хүч түрэн орж ирж байна хэмээн бичиж байна. Яах аргагүй Монголын жүдочид дэлхийг айлгадаг болжээ. 66 кг-ийн жинд манай хоёр жүдока чансааг тэргүүлж буй нь үүний ердөө нэг нотолгоо.

Тэмцээний хоёр дахь өдөр бидний хувьд -100 кг-ийн жингийн барилдаан анхаарал татаж байлаа. Энэ жинд манайхаас олимпийн аварга Н.Түвшинбаяр, улсын аварга Б.Тэмүүлэн нар хүч үзсэн. Түүнчлэн энэ жингийн сүүлийн хэдэн жилийн шилдэгүүд олноороо барилдлаа. Аварга Н.Түвшинбаяр Азербейжаны бөх Гасимовтой барилдаж вазари үнэлгээгээр ялагдаж тэмцээнээ өндөрлөсөн бол Б.Тэмүүлэн Гүржийн Лориашвилид мөн ялагдлаа. Энэ жингийн шигшээд өнгөрөгч ДАШТ-ийн хүрэл медальт Такамаса Анай, Чехийн залуу бөх өсвөрийн дэлхийн хошой аварга Лукаш Крпалектай барилдаж Японы бөх цэвэр ялснаар гран-пригийн аварга боллоо. Энэ жингийн хүрэл медалийг Бразилийн Лучиано Корриа, Бельгийн Ван дер Геест нар энгэртээ зүүв.

81 кг-ийн жинд мөн манай хоёр бөх зодоглож Д.Нямхүү Бразилийн бөхтэй барилдаж вазари үнэлгээгээр, О.Ууганбаатар Словений бөхөд цэвэр ялагдсанаар тэмцээнээ дуусгалаа. Энэ жингийн алтан медалийг олимпийн мөнгөн медальт Солонгосын Ким Жэ-Бум хүртлээ.

Ингээд сүүлчийн бөх эмэгтэй -78 кг-д П.Лхамдэгд барилдсан. Тэрбээр эхний тойрогтоо хийлж хоёрдугаар тойрогт Украйны бөхийг ялсан ч дараагийн тойрогт Японы бөх Руйка Сатод ялагдснаар шагналт 5-р байранд орсон. Энэ жингийн алтан медалийг Германы Хайди Воллерт, мөнгөн медалийг Японы Руйка Сато, хүрэл медалийг АНУ, ОХУ-ын бүсгүйчүүд хүртжээ.