“Детройт” – “Бостон” – 100:105 (25:25, 27:30, 23:17, 25:33)

Д: Жеребко – 16 + 10 самбар. Принс – 15. Хэмилтон – 15.

Б: Р.Аллен – 18. Рондо – 15 + 11 дамжуулалт. Гарнетт – 14 + 9 самбар. Робинсон – 14.

Бостон-Детройт бол ердөө 2 улирлын өмнө Дорнод бүсийн аваргын төлөө өрсөлдөж байсан багууд. Түүнээс хойш их зүйл өөрчлөгджээ. Бостон бүсийнхээ хүчирхэг багийн нэг хэвээр байгаа бол Детройт “муучуудын” нэг болоод байна.

Пистонсийн талбайд болсон уг тоглолтын 4-р үеийн эхэнд талбайн эзэд 77:73-аар тэргүүлж байсан ч Нэйт Робинсон дараалан 3 удаа холын зайнаас оновчтой шидэж, Бостон 16-4 гэсэн шийдвэрлэх “ран” хийснээр хожсон байна.

Селтикс энэ улиралд айлын талбайд 21-10 амжилт үзүүлээд байгаа нь лигт Кавальерстэй зэрэгцэх сайн амжилт юм. Мөн тэд 5 тоглолт дараалан 100+ оноо авч байгаа бөгөөд Гарнетт-Рэй Аллен нарыг Селтикст ирснээс хойш ийм амжилт үзүүлж байгаагүй гэнэ.

“Майами” – “Голден Стэйт” – 110:106 (33:34, 23:20, 30:24, 24:28)

М: Уэйд – 35 + 12 дамжуулалт. Бизли – 15. Ричардсон – 15.

Г: Морроу – 24. Уотсон – 20. Карри – 18 + 8 дамжуулалт.

Уэйд 35 оноо, 12 оновчтой дамжуулалт, К. Ричардсон сүүлийн минутанд 2 чухал холын шидэлтээ оновчтой болгосноор Хит талбай дээрээ Голден Стэйтийг хожиж, дараалсан 4 хожигдлынхоо дараа хожил авлаа. Голден Стэйтийн хувьд сүүлийн 18 тоглолтынхоо 14-т нь хожигдов. 5 секунд дутуу байхад тоог тэнцүүлэх боломж зочдод байсан ч Карригийн дамжуулалтыг Туриаф авч чадсангүй алдсанаар тоглолт шийдэгджээ. Голден Стэйтийн Андрес Биедринс, Монта Эллис, Кори Маггетте зэрэг тоглогчид нь гэмтэлтэй байгаа.

Хит 30-31 болж, бүсдээ 8-руу оров. Тэдний яг ард Бобкэтс бичигдэж байна.

“Лейкерс” – “Индиана” – 122:99 (27:28, 33:26, 38:17, 24:28)

Л: Брайант – 24. Фармар – 19. Э. Байнум – 16 + 8 самбар.

И: Мэрфи – 17 + 13 самбар. Жонс – 16. Макробертс – 15.

Коби гэмтлээс ирснээсээ хойшхи тоглолтууддаа тун муу довтолж байгаа бөгөөд өнөөдөр 24 оноо авсан ч мөн л тааруу хувьтай довтолжээ. Гэхдээ тэрээр торгуулийн шидэлтүүдээ тун оновчтой шидсэний дээр Лейкерсийн бусад тоглогчид жигд сайн тоглосноор тэд талбай дээрээ Пейсерсийг хожив. 3-р үед Лейкерс илт давуу тоглож, өрсөлдөгчөөсөө 21 оноо илүү авчээ. Лейкерс Стаплес Центрт Пейсерстэй 14 тоглож, бүгдэд нь хожиж байгаа гэнэ.

“Оклахома Сити” – “Сакраменто” – 113:107 (28:25, 37:33, 25:24, 23:25)

О: Дюрант – 39 + 10 самбар. Уэстбрук – 30 + 13 дамжуулалт. Грин – 15.

С: Эванс – 27. Лэндри – 17. Удрих – 13. Гарсиа – 13.

Оклахома Сити залуу оддынхоо сайн тоглолт болон багийн сайн хамгаалалтынхаа ачаар энэ улиралд олон хожил аваад байгаа бол өнөөдөр тийм ч сайн хамгаалж чадаагүй ч Дюрант, Вестбрук нар довтолгоон бүрээ шахуу оноо болгож байснаар талбай дээрээ Кингзийг хожив. Дюрант 39 оноо, 10 самбар хийжээ. Тэрээр энэ улиралд 14 дэх удаагаа 30-10 амжилт үзүүлж байгаа бөгөөд энэ үзүүлэлтээрээ лигээ тэргүүлж байна. Харин Рассель Вестбрук 2002 оны 2 сарын 17-нд Гэри Пэйтон 30 оноо, 13 оновчтой дамжуулалт хийж байснаас хойш ийм амжилт үзүүлсэн анхны Тюндерийн тоглогч болжээ.

Тюндер сүүлийн 14 тоглолтынхоо 12-т  нь хожив.